Kounyea, yon editoryal ki reflete opinyon Gouvènman Etazini an:
Nan Siri, apre 50 lane yon rejim bout di kote se fanmi Assad-la ki t ap reye e apre 13 lane gè sivil, rejim Prezidan Bashar al-Assad la tonbe. Nan yon ti bout tan plis pase yon semenn, fòs rebèl islamis yo pase pran vil Aleppo, Homs, ak Damas, e kontwole yo, nan moman twoup gouvènman yo te rale kò yo, e kote Assad te kouri kite peyi a.
Nan Mezon Blanch, Prezidan Joe Biden di: « Rejim sa a te britalize epi maspinen e touye, lè nou byen konte, dè santèn milye Siryen inosan. » Li kalifye disparisyon rejim nan kòm « yon aksyon jistis fondamantal. »
« Se yon moman opòtinite istorik pou pèp Siri a ki t ap soufri lontan, rive bati yon avni miyò pou peyi yo a ki chaje ak fyète. Se an menm tou yon moman riske e ki gen ensètitid. »
Gwoup rebel ki te pran tèt mouvman pou chavire rejim nan, Hayat Tahrir, Etazini ak l-ONU deziye li kòm gwoup teworis. Prezidan Biden avèti ke «kèk nan gwoup rebel yo ki te jete Assad la gen pwòp dosye pa yo nan zak teworis ak abi dwa moun. »
« Nou pran nòt sou deklarasyon lidè gwoup rebèl sa yo nan jou ki pase yo. … Yo di bon bagay kounye a, men lè yo pran pi gwo responsablite, nou pwal evalye pa sèlman pawòl yo, men tou aksyon yo. »
Prezidan Biden ensiste pou di ke Etazini pwal kontinye misyon li a kont gwoup Eta Islamik la nan Siri.
Nou wè klè ke gwoup sa a pwal chache pwofite nenpòt twou vid nan pouvwa a pou li retabli kapasite li epi kreye yon refij pou sekirite li. Nou pa pwal kite sa rive. »
Sepousa 8 Desanm, fòs ameriken yo te lanse dè douzèn frap aeryen kont lidè gwoup Eta Islamik la yo, moun ki travay pou yo, ak kèk kan nan sant Siri.
« Tout òganizasyon nan Siri ta dwe konnen, se Kòmandan CENTCOM, Jeneral Erik Kurilla ki ap pale, ke nou pwal mande yo rann kont si yo fè patnè ak Eta Islamik oubyen sipòte li yon jan kèlkonk. »
Prezidan Biden pwomèt pou li travay ak « tout gwoup Siryen … pou tabli yon tranzisyon ki bay rejim Assad la do – pou ale nan direksyon yon Siri endepandan … yon Siri ki granmoun lakay li. »
« Kounye a se responsablite tout gwoup opozisyon ki ap chache jwe yon wòl nan gouvènman Siri a pou yo demontre angajman yo pou fè respekte dwa tout Siryen, moute yon rejim lalwa, e bay pwoteksyon pou minorite relijye ak minorite etnik yo. »
« Etazini pwal fè tou sa li kapab pou sipòte [pèp siryen an], nan sekou imanitè, » se Prezidan Biden ki ap pale, « pou ede retabli Siri apre plis pase yon dizèn lane lagè ak plizyè jenerasyon britalite anba men fanmi Assad la. »
Sete yon editoryal ki reflete opinyon Gouvènman Etazini an.