Kounyea, yon editoryal ki reflete opinyon Gouvènman Etazini an:
Nan kad efò li pou retabli souverènte nasyonal, kidonk dwa granmoun Etazini sou fwontyè li, Prezidan Donald Trump siyen yon dekrè pou laji Sant Operasyon pou Migran nan Baz Naval Bè Guantanamo a. Lajisman an, li ekri, « pwal bay plis espas pou kenbe gwo kriminèl ki te antre Etazini ilegalman. »
Nan yon konferans pou laprès, prezidan Trump te deklare, « Nou gen 30-mil kabann nan Guantanamo pou kenbe pi move migran kriminèl yo ki menase pèp ameriken an. Kèk nan yo tèlman pa bon ke nou pa menm fè peyi kote yo soti a konfyans pou kenbe yo, paske nou pa vle yo tounen, konsa nou pwal voye yo nan Guantanamo. »
Sant pou kenbe migran yo nan Bè Guantanamo a fonksyone separe ak sant militè a kote nou kenbe teworis yo. Depi nan ane 1990 yo, sant pou migran yo sèvi sitou pou kenbe Ayisyen ak Kiben ke nou te ranmase sou lanmè. Enstalasyon an sèvi tou kòm sant sekou imanitè pou rejyon an ak pou asistans nan ka dezas.
Sekretè laprès Mezon Blanch Karoline Leavitt fè konnen dekrè ki konsène Guantanamo a bati sou aksyon ke Prezidan Trump te poze deja pou bay sekirite sou fwontyè Etazini, epi depòte migran kriminèl ilegal yo pou yo pa antre andan peyi a.
« Nou konnen nou gen yon pwoblèm espas isit la andan peyi a pou kenbe migran. …Prezidan an santi ke Estasyon Naval la nan Guantanamo se yon kote ki apwopriye pou sa. Espas lan la a. Poukisa pou nou pa sèvi ak li ? Sekretè Defans la ap travay sou sa, pandan n ap pale a. »
Nan yon entèvyou nan televizyon, Sekretè Defans Pete Hegseth kalifye Guantanamo kòm « meyè kote a » pou sa nou vle fè a. Li di, « Se yon pasaj tanporè, e se deja misyon Estasyon Naval Bè Guantanamo a, ke nou ka laji pou fè li pran dè milye moun anplis – ak dè dizèn milye, si nesesè – pou nou voye ilegal yo ale yon fason imen, fè yo kite peyi nou an kote yo pa gen plas yo, e fè yo retounen nan peyi kote yo soti a yon fason kòrèk. »
Sekretè Defans Hegseth deklare, « Nou di li, ‘ase vle di ase. Yo pwal tounen lakay yo’. Bè Guantanamo a se yon lye pasaj san fot pou loje tanporèman pi move pami pi move yo jouk tan nou tounen yo nan pwòp peyi pa yo ki, tankou Prezidan Trump te di li byen klè, pi byen prepare pou pran yo ak tout fòs epi anvan lontan.»
Sete yon editoryal ki reflete opinyon Gouvènman Etazini an.