Kounyea, yon editoryal ki reflete opinyon Gouvènman Etazini an:
Nan kad premye vizit ofisyèl li nan Amerik Santral ak Karayib la, Sekretè Deta Marco Rubio te vwayaje nan Repiblik Dominiken kote li te rankontre ak Prezidan Dominiken Luis Abinader.
Youn nan sijè ki pi ijan ke 2 mesye yo te diskite se kriz Ayiti a, an palan peyi vwazen Dominikani an ki chita sou pati lwès zile Hispaniola a.
Ayiti ap lite anba enstabilite politik, mizè ak vyolans gang ekstrèm, ki fè dè santèn milye Ayisyen janbe fwontyè a.
Se yon kokenn pwoblèm pou Repiblik Dominiken, dapre Prezidan dominiken Abinader ki di « Pa gen solisyon dominiken pou kriz Ayiti a. »
Vrèman vre, nou paka iyore kesyon Ayiti a, se pawòl Sekretè Deta Rubio. « Se yon trajedi. Se yon bagay terib, e fòk gen moun ki chache rezoud li. »
« Mwen vle pou m klè : avni Ayiti se pou pèp Ayiti a, e elit li yo nan sosyete a dwe deside sa yo vle, e yo gen pou yo byen panse ki jan de avni ke yo vle genyen, paske se peyi pa yo, e avni pa yo se pou yo menm. Men nou pwal ede. »
Nan finisman mwa Janvye a, Sekretè Rubio siyen yon eksepsyon pou asire ke pwogram Etazini yo ann Ayiti ap kontinye.
Epi tou, « Etazini pran angajman pou li kontinye travay ak misyon entènasyonal la [ann Ayiti], » sa se pawòl Sekretè Rubio.
« Li enpòtan tou pou nou klè : nou paka e nou pa pwal mande Repiblik Dominikani pou li aksepte, ni espere ke li pwal aksepte yon vag migran san kontwòl. Pèsonn pa dwe mande okenn peyi nan mond la pou aksepte sa, e peyi sa a pa ta dwe aksepte li nonplis tou. »
Li t ap moutre ke li patwone lwa HOPE/HELP la nan Sena Etazini an, yon lwa ki, si li pase, pwal bay tretman prefere pou enpòtasyon kèk pwodui ki soti Ayiti, e nan menm moman an, Sekretè Rubio kwè ke si gen pi bon opòtinite pou envestisman etranje, sa pwal ede amelyore sityasyon Ayiti a.
« Gen yon vrè opòtinite pou Ayiti grandi pou tounen yon santral pou faktori bò lanmè, faktori bò lanmè pou pwodui leje. Prezans sa a deja la kounye a menm. Sa ka laji toujou. Peyi a gen yon fòs travay jèn epi solid, yon fòs travay djanm. »
« Si nou ka fè fas ak defi pou sekirite a e pase lwa ki bay envestisè yo sètitid sou avni peyi a,» se Sekretè Rubio ki ap pale, « Nou espere wè plis envestisman ki pote izin sa yo soti nan lòt kontinan pou vini nan emisfè nou an, fè chèn distribisyon yo vin pi kout, e kreye pwosperite ak opòtinite pou pèp ayisyen an. »
Sete yon editoryal ki reflete opinyon Gouvènman Etazini an.