Accessibility links

Breaking News

ບົດບັນນາທິການ: ທ່ານບລິງເກັນ ກ່າວເຖິງສົນທິສັນຍາ ຫ້າມແຜ່ຜາຍອາວຸດນິວເຄລຍ


​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ແອນ​ໂທ​ນີ ບ​ລິງ​ເກັນ ກ່າວ​ຄຳ​ປ​າ​ໄສ​ຕໍ່​ກອງ​ປະ​ຊຸມ​ເພື່ອ​ທົບ​ທວນ​ສົນ​ທິ​ສັນ​ຍາ​ຫ້າມ​ແຜ່​ຜາຍ​ອາ​ວຸດ​ນິວ​ເຄ​ລຍ ປີ 2022 ທີ່​ສະ​ມັດ​ຊາ​ໃຫຍ່​ສະ​ຫະ​ປະ​ຊາ​ຊາດ ເມື່ອ​ວັນ​ທີ 1 ສິງ​ຫາ 2022.

ສົນທິສັນຍາ NPT ເຮັດໃຫ້ໂລກຂອງເຮົາ ມີຄວາມປອດໄພຕື່ມຂຶ້ນ ໃນຂະນະທີ່ບັນດາປະເທດມີອາວຸດນິວເຄລຍ ພາກັນເອົາບາດກ້າວ ເພື່ອຫຼຸດການເກັບສະສົມອາວຸດນິວເຄລຍຂອງເຂົາເຈົ້າ.

ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ

ເມື່ອ​ຫ້າ​ທົດ​ສະ​ວັດ​ກວ່າໆ​ຜ່ານ​ມາ ​ລະ​ຫວ່າງ​ຈຸດ​ສູງ​ສຸດ​ຂອງ​ສົງ​ຄາມ​ເຢັນ ຜູ້​ຕາງ​ໜ້າ​ຂອງ 18 ປະ​ເທດ ໄດ້​ຮ່າງ​ສົນ​ທິ​ສັນ​ຍາ ​ວ່າ​ດ້ວຍ​ການ​ຫ້າມ​ແຜ່​ຜາຍ​ອາວຸດ​ນິວ​ເຄ​ລຍທີ່​ເອີ້ນ​ຫຍໍ້​ວ່າ NPT. ໃນ​ໄລ​ຍະ​ຫຼາຍໆ​ປີ​ທີ່​ຕິດ​ຕາມ​ມາ ເກືອບ ທຸກໆ​ປະ​ເທດ​ໃນ​ໂລກ ໄດ້​ເຂົ້າ​ຮ່ວມ​ສົນ​ທິ​ສັນ​ຍາ NPT.

ສົນ​ທິ​ສັນ​ຍາ NPT ເຮັດ​ໃຫ້​ໂລກ​ຂອງ​ເຮົາ​ມີ​ຄວາມ​ປອດ​ໄພ​ຕື່ມ​ຂຶ້ນ ໃນ​ຂະ​ນະ​ທີ່​ບັນ​ດາ​ປະ​ເທດ​ມີ​ອາ​ວຸດ​ນິວ​ເຄ​ລຍ ພາ​ກັນ​ເອົາ​ບາດ​ກ້າວ​ເພື່ອ​ຫຼຸດ​ການ​ເກັບ​ສະ​ສົມ​ອາ​ວຸດ​ນິວ​ເຄ​ລຍ​ຂອງເຂົາ​ເຈົ້າ. ແຕ່​ແນວ​ໃດ​ກໍ​ຕາມ ສົນ​ທິ​ສັນ​ຍາ​ດັ່ງ​ກ່າວ ພວມ​ໄດ້​ຮັບ​ການ​ກົດ​ດັນ​ຫຼາຍ​ຂຶ້ນ ນັ້ນ​ຄື​ຄຳ​ເວົ້າ​ຂອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ສະ​ຫະ​ລັດ ທ່ານ​ແອນ​ໂທ​ນີ ບ​ລິງ​ເກັນ ໃນ​ຄຳ​ປາ​ໄສ​ຕໍ່​ກອງ​ປະ​ຊຸມ​ ທົບ​ທວນ​ຄືນ​ສົນ​ທິ​ສັນ​ຍາ​ຫ້າມ​ແຜ່​ຜາຍ​ອາ​ວຸດ​ນິວ​ເຄ​ລຍ. ທ່ານ​ເວົ້າ​ວ່າ ສ​ປ​ປ ເກົາ​ຫຼີ ຍັງ​ສືບ​ຕໍ່​ຂະຫຍາຍ​ໂຄງ​ການ​ນິວ​ເຄ​ລຍ ​ແບບ​ຜິດ​ກົດ​ໝາຍ​ຂອງ​ຕົນ ແລະ​ສືບ​ຕໍ່​ທ້າ​ທາຍ​ເກາະ​ຜິດ ຢູ່​ໃນ​ຂົງ​ເຂດ​ດັ່ງ​ກ່າວ.

ສ່ວນ​ປະ​ເທດ​ອີ​ຣ່ານ​ ກໍ​ຍັງ​ຢູ່​ໃນ​ເສັ້ນ​ທາງ​ໄປ​ສູ່​ການ​ເພີ້ມ​ຄວາມ​ເຄັ່ງ​ຕຶງ​ ທາງ​ດ້ານ​ນິວ​ເຄ​ລຍຂອງ​ຕົນ. ເຖິງ​ແມ່ນ​ອີ​ຣ່ານ​ໄດ້​ກ່າວ​ອ້າງຢ່າງ​ເປັນ​ການ​ເປີດ​ເຜີຍ​ວ່າ ຕົນຢາກ​ຈະ​ກັບ​ຄືນ​ໄປ​ສູ່​ ແຜນ​ປະ​ຕິ​ບັດ​ງານ​ຮ່ວມ​ຮອບ​ດ້ານ ຫຼື JCPOA ​ກໍ​ຈິງ ນັບ​ແຕ່​ເດືອນ​ມີ​ນາ​ເປັນ​ຕົ້ນ​ມາ ອີ​ຣ່ານ​ ແມ່ນ​ບໍ່​ເຕັມ​ໃຈ ​ທີ່​ຈະ​ຮັບ​ເອົາ ​ຂໍ້​ຕົກ​ລົງ​ໃນ​ທຳ​ນອງນີ້​. ລັດ​ຖະ​ມົນ​ຕີ​ການ​ຕ່າງ​ປະ​ເທດບ​ລິງ​ເກັນ ໃຫ້​ການ​ຢືນ​ຢັນ​ວ່າ “ການ​ກັບ​ຄືນ​ໄປ​ສູ່ແຜນ​ປະ​ຕິ​ບັດ​ງານ​ຮ່ວມ​ຮອບ​ດ້ານ JCPOA ຍັງ​ເປັນ​ທາງ​ອອກ ​ທີ່​ດີ​ທີ່​ສຸດ ສຳ​ລັບ​ສະ​ຫະ​ລັດ ສຳ​ລັບ​ອີ​ຣ່ານ ແລະ​ສຳ​ລັບ​ໂລກ​ຂອງ​ເຮົາ.”

ການ​ສືບ​ຕໍ່​ເຮັດ​ສົງ​ຄາມ​ຮຸກ​ຮານ​ຂອງ​ຣັ​ດ​ເຊຍໃນ​ຢູ​ເຄ​ຣນ ແມ່ນ​ເປັນ​ການ​ລ​ະ​ເມີດແບບ​ໜ້າ​ດ້ານ​ຕໍ່​ກົດ​ໝາຍ​ລະ​ຫວ່າງ​ປະ​ເທດ ແຕ່​ການ​ກະ​ທຳ​ດັ່ງ​ກ່າວ​ຂອງ​ຣັດ​ເຊຍຍັງ​ລະ​ເມີດ​ຕໍ່​ການ​ຄ້ຳ​ປະ​ກັນ​ທີ່​ຕົນ​ໄດ້​ໃຫ້​ໄວ້​ກັບ​ຢູ​ເຄ​ຣນ ໃນ​ບົດ​ບັນ​ທຶກ​ຄວາມ​ເຂົ້າໃຈ​ ບູ​ດາ​ແປັສ​ທ໌ ສະ​ບັບ​ປີ 1994. ພາຍ​ໃຕ້​ເງື່ອນ​ໄຂ​ຂອງ​ບົດ​ບັນ​ທຶກ​ຄວາມ​ເຂົ້າ​ໃຈ​ສະ​ບັບ​ນີ້ ຊຶ່ງ​ໄດ້​ຕ້ອນ​ຮັບ​ຢູ​ເຄ​ຣນ ເຂົ້າ​ຮ່ວມໃນ​ສົນ​ທິ​ສັນ​ຍາ ​ຫ້າມ​ແຜ່​ຜາຍ​ອາ​ວຸດ​ນິ​ວ​ເຄ​ລຍ ແລະ​ຄວາມ​ໝັ້ນ​ໝາຍ​ທີ່​ຈະ​ຍົກ​ຍ້າຍ​ອາ​ວຸດ​ນິວ​ເຄ​ລຍ​ທັງ​ໝົດ​ອອກ ຈາກ​ດິນ​ແດນ​ຂອງ​ຕົນ ຣັດ​ເຊຍ​ໄດ້​ສັນ​ຍາ​ວ່າ ຈະ​ໃຫ້​ການ​ເຄົາ​ລົບ ​ຕໍ່​ຄວາມ​ເປັນ​ເອກ​ກະ​ລາດແລະ​ຜືນ​ແຜ່ນ​ດິນ​ອັນ​ຄົບ​ຖ້ວນ​ຂອງ​ຢູ​ເຄ​ຣນ. ນີ້​ແມ່ນອາດ​ເປັນ​ການ​ສົ່ງ​ຂ່າວ​ຂີ້​ຮ້າຍ​ສຸດ​ເທົ່າ​ທີ່​ເປັນ​ໄປ​ໄດ້​ ໄປ​ຍັງ​ບັນ​ດາ​ປະ​ເທດ​ຕ່າງໆ ​ຢູ່​ໃນ​ທົ່ວ​ໂລກ ທີ່​ອາດ​ຄິດ​ວ່າ​ພວກ​ເຂົາ​ເຈົ້າ​ອາດ​ຈຳ​ເປັນ​ຕ້ອງ​ມີ​ອາ​ວຸດ​ນິວ​ເຄ​ລຍ ໄວ້​ປົກ​ປ້ອງ​ອະ​ທິ​ປະ​ໄຕ​ຂອງ​ພວກ​ເຂົາ​ເຈົ້າ.

ລັດ​ຖະ​ມົນ​ຕີບ​ລິງ​ເກັນ ປະ​ກາດ​ວ່າ “ບໍ່​ມີ​ບ່ອນ​ໃດ​ຢູ່​ ໃນ​ໂລກ​ຂອງ​ເຮົາ ​ທີ່ຈະ​ຢັບ​ຢັ້ງ​ການ​ມີ​ອາ​ວຸດ​ນິວ​ເຄ​ລຍ ໂດຍ​ອີງ​ຕາມ ການ​ບີບ​ບັງ​ຄັບ ການ​ຂົ່ມ​ຂູ່ ຫຼື ​ການ​ຂູ່​ເຂັນແບ​ລັກ​ແມ​ລ.”

“ພ້ອມ​ກັນ​ກັບ​ສະ​ຫະ​ຣາ​ຊະ​ອາ​ນາ​ຈັກ ແລະ​ຝ​ຣັ່ງ ພວກ​ເຮົາ​ໄດ້​ນຳ​ອອກ​ເຜີຍ​ແຜ່​ຫຼັກ​ການ ແລະ​ການ​ປະ​ຕິ​ບັດ​ທີ່​ດີ​ທີ່​ສຸດ​ຈຳ​ນວນ​ນຶ່ງ ທີ່​ຄວນ​ຄາດ​ຫວັງ​ໃຫ້​ທຸກໆ​ປະເທດ​ທີ່​ມີ​ອາ​ວຸດ​ນິວ​ເຄ​ລຍ ​ພາຍ​ໃຕ້​ສົນ​ທິ​ສັນ​ຍາ NPT ຊຶ່ງ​ຮວມ​ຢູ່​ໃນ​ນັ້ນ ​ກໍ​ແມ່ນ​ມີການ​ດຳ​ເນີນ​ທຸກ​ຄວາມ​ພະ​ຍາ​ຍາມ ເພື່ອ​ຄ້ຳ​ປະ​ກັນ​ວ່າຈະ​ບໍ່​ມີ​ການ​ໃຊ້ອາ​ວຸດ​ນິວ​ເຄ​ລຍ​ອີກ.”

ສະ​ຫະ​ລັດ ​ມີ​ຄວາມ​ໝັ້ນ​ໝາຍ​ທີ່​ຈະ​ຫຼີກ​ລ່ຽງ​ຕໍ່​ການ​ແຂ່ງ​ຂັນ​ອາ​ວຸດ​ທີ່​ຕ້ອງ​ໃຊ້​ຈ່າຍ​ເປັນ​ຈຳ​ນວນ​ຫຼວງ​ຫຼາຍ ແລະ​ຊຸກ​ຍູ້​ໃຫ້​ມີ​ການ​ຄວບ​ຄຸມ​ດ້ານ​ອາ​ວຸດ ເວ​ລາ​ໃດ​ທີ່​ມີ​ຄວາມ​ເປັນ​ໄປ​ໄດ້​. ທີ່​ຈິງ​ແລ້ວ ປະ​ທາ​ນາ​ທິ​ບໍ​ດີ​ໄບ​ເດັນໄດ້​ທຳ​ການ​ເຈ​ລະ​ຈາ​ເພື່ອຕໍ່​ອາ​ຍຸ​ສົນ​ທິ​ສັນ​ຍາ START ສະ​ບັບ​ໃໝ່​ກັບ​ຣັດ​ເຊຍ ພາຍ​ໃນ​ປີ 2026. ປະ​ທາ​ນາ​ທິ​ບໍ​ດີ​ໄບ​ເດັນ ນອກນັ້ນ ຍັງ​ໄດ້​ກ່າວ​ຢ້ຳ​ເຖິງ​ຄວາມ​ພ້ອມ​ຂອງ​ທ່ານທີ່​ຈະ​ເຈ​ລະຈາ​ກ່ຽວ​ກັບ​ຮ່າງຂໍ້​ຕົກ​ລົງ ທີ່​ຈະ​ໃຊ້​ແທນສົນ​ທິ​ສັນ​ຍາ START ສະ​ບັບ​ໃໝ່.

ບົດ​ບາດ​ພື້ນ​ຖານ​ທາງ​ດ້ານ​ອາ​ວຸດ​ນິວ​ເຄ​ລຍ​ຂອງ​ສະ​ຫະ​ລັດ ກໍ​ຄື​ຂັດ​ຂວາງ​ບໍ່​ໃຫ້​ມີ​ການໃຊ້ອາ​ວຸດ​ນິວ​ເຄ​ລຍ​ໂຈມ​ຕີສະ​ຫະ​ລັດ ​ພັນ​ທະ​ມິດແລະ​ພາ​ຄີ. ສະ​ຫະລັດ​ຈະພິ​ຈາ​ລະ​ນາ​ ການ​ໃຊ້​ອາ​ວຸດ​ໃນ​ທຳ​ນອງນີ້ ກໍ​ຕໍ່​ເມື່ອ​ ຕົກຢູ່​ໃນ​ສະ​ພາບ​ການ​ທີ່​ຮ້າຍ​ແຮງ​ສຸດ​ຂີດ ເພື່ອ​ປ້ອງ​ກັນ​ຜົນ​ປະ​ໂຫຍດ​ທີ່​ສຳ​ຄັນ​ຂອງ​ຕົນ​ເທົ່າ​ນັ້​ນ.

XS
SM
MD
LG