ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ທຸກໆຂົງເຂດໃນໂລກ ພວມປະສົບກັບໄພອັນຕະລາຍ ອັນເປັນຜົນກະທົບທີ່ເນື່ອງມາຈາກວິກິດການດ້ານດິນຟ້າອາກາດ ນັ້ນຄືຄຳເຕືອນ ຂອງທ່ານແອນໂທນີ ບລິງເກັນ ລັດຖະມົນຕີການຕ່າງປະເທດຂອງສະຫະລັດ. ທ່ານໃຫ້ຂໍ້ສັງເກດ ໃນລະຫວ່າງການເດີນທາງໄປຢ້ຽມຢາມປະເທດດັ່ງກ່າວເມື່ອໄວໆມານີ້ວ່າ “ປະເທດຟີລິບປິນ ແມ່ນມີຄວາມຫຼໍ່ແຫຼມເປັນພິເສດ. ພວກທ່ານກຳລັງຮັບມືກັບລົມໄຕ້ຝຸ່ນທີ່ຮ້າຍແຮງຂຶ້ນນັບມື້ ຝົນຕົກໜັກແຮງເປັນພິເສດ ອຸນຫະພູມ ແລະລະດັບນ້ຳທະເລທີ່ພວມສູງຂຶ້ນ.”
ໃນປີກາຍນີ້ ຟີລິບປິນໄດ້ປະກາດກ່ຽວກັບເປົ້າໝາຍໃນການນຳໃຊ້ພະລັງງານສະອາດທີ່ມີຄວາມທະເຍີທະຍານ ໂດຍຈະຜະລິດພະລັງງານ ຂອງປະເທດທັງໝົດຈາກແຫຼ່ງທາງເລືອກ 35 ເປີເຊັນພາຍໃນປີ 2030 ແລະ 50 ເປີເຊັນພາຍໃນປີ 2040. ລັດຖະມົນຕີການຕ່າງປະເທດບລິງເກັນ ປະກາດວ່າ “ສະຫະລັດ ຂໍຊົມເຊີຍເປົ້າໝາຍເຫຼົ່ານີ້ແລະພວກເຮົາມີຄວາມໝັ້ນໝາຍທີ່ຈະຊ່ວຍໃຫ້ຟີລິບປິນບັນລຸເປົ້າໝາຍດັ່ງກ່າວ. ດ້ວຍເງິນຊ່ວຍເຫຼືອລ້າຈາກອົງການໆຄ້າແລະການພັດທະນາຂອງສະຫະລັດ ພວກເຮົາຈະວາງພື້ນຖານຮ່ວມກັນ ເພື່ອສ້າງໂຄງການໄຟຟ້າພະລັງລົມນອກຝັ່ງແຫ່ງທຳອິດໃນຟີລິບປິນ. ໃນອີກບໍ່ຊ້າ ໂຄງການທີ່ວ່ານັ້ນກໍຈະຜະລິດພະລັງງານທີ່ສະອາດໄດ້ເຖິງ 3,000 ເມກາວັດ ໃນແຕ່ລະປີ.” ນັ້ນແມ່ນພະລັງງານທີ່ບ້ານເຮືອນຫຼາຍກວ່າ 2 ລ້ານຫຼັງສາມາດນຳໃຊ້ໄດ້ຢ່າງເປັນການພຽງພໍ.
ນີ້ບໍ່ແມ່ນເປັນໂຄງການຮ່ວມມືທາງດ້ານພະລັງງານ ລະຫວ່າງສະຫະລັດແລະຟີລິບປິນພຽງແຫ່ງດຽວເທົ່ານັ້ນ. ເມື່ອໄວໆມານີ້ ສະຫະລັດຍັງໃຫ້ການສະໜັບສະໜຸນແກ່ໂຄງການປະມູນທີ່ມີການແຂ່ງຂັນ ລະຫວ່າງບໍລິສັດສະໜອງໄຟຟ້າທີ່ມີຄວາມໝັ້ນໝາຍຈະຜະລິດພະລັງງານທີ່ສາມາດໃຊ້ຄືນໃໝ່ໄດ້ ອີກ 2,000 ເມກາວັດ ພາຍໃນປີ 2025. ໃນຮອບເດືອນມີນາຜ່ານມານີ້ ຟີລິບປິນກໍໄດ້ເຂົ້າຮ່ວມກັບອົງການລິເລີ້ມຕ້ອງການພະລັງງານທີ່ສະອາດ ຊຶ່ງເປັນໂຄງການທີ່ດຳເນີນງານໂດຍສະຫະລັດ ທີ່ເຊື່ອມໂຍງກັບປະເທດຕ່າງໆເພື່ອຂົນຂວາຍຫາທາງປ່ຽນໄປໃຊ້ພະລັງງານທີ່ສະອາດ ກັບບັນດາບໍລິສັດຕ່າງໆທີ່ສາມາດຊ່ວຍພວກເຂົາເຈົ້າໃຫ້ດຳເນີນການສິ່ງນັ້ນໄດ້.
ໃນປີກາຍນີ້ ສະຫະລັດແລະຟີລິບປິນໄດ້ເປີດໂຕອົງການລິເລີ້ມພະລັງງານທີ່ໝັ້ນຄົງຂອງຟີລິບປິນ ຊຶ່ງໄດ້ລະດົມການລົງທຶນຂອງເອກກະຊົນແລະການຜະລິດພະລັງງານທີ່ສະອາດໃນທົ່ວປະເທດຟີລິບປິນ.
ປະເທດທັງສອງໄດ້ເຮັດວຽກຮ່ວມກັນ ເພື່ອພັດທະນາພາກສ່ວນພະລັງງານນິວເຄລຍຢູ່ໃນຟີລິບປິນ ໂດຍມີການຕົກລົງກັນເມື່ອໄວໆມານີ້ ທີ່ຈະອຳນວຍໃຫ້ມີການຮ່ວມມືກັນ ລະຫວ່າງພວກນັກຊ່ຽວຊານຂອງສະຫະລັດແລະຟີລິບປິນ.
ແລະໃນຖານະຜູ້ກໍ່ຕັ້ງປະເທດນຶ່ງ ໃນຂອບເສດຖະກິດຂອງອິນໂດ-ປາຊີຟິກນັ້ນ ຟີລິບປິນໄດ້ເຂົ້າຮ່ວມກັບ 13 ປະເທດ ຢູ່ໃນທົ່ວຂົງເຂດ ທີ່ມີຄວາມໝັ້ນໝາຍ ໃນການນຳໃຊ້ພະລັງງານທີ່ສະອາດ ແລະເສດຖະກິດທີ່ມີຄວາມຍຸຕິທຳຫຼາຍຂຶ້ນ ສາມາດປັບໂຕໄດ້ງ່າຍຂຶ້ນ.
ລັດຖະມົນຕີບລິງເກັນ ກ່າວວ່າ “ວຽກງານອັນນີ້ແມ່ນມີຄວາມສຳຄັນຫຼາຍ ແລະ ພວກເຮົາຂໍສະແດງຄວາມຮູ້ບຸນຄຸນຕໍ່ບັນດາຄູ່ຮ່ວມງານຂອງພວກເຮົາຢູ່ໃນຟີລິບປິນ - ລັດຖະບານ ພາກເອກກະຊົນ ແລະກຸ່ມສັງຄົມພົນລະເຮືອນ ທີ່ໄດ້ອຸທິດຕົນຕໍ່ການນຳໃຊ້ພະລັງງານທີ່ສະອາດຂອງປະເທດໃນອະນາຄົດ. ຮວມກັນແລ້ວ ພວກເຮົາໄດ້ຫຼຸດຜ່ອນການປ່ອຍທາດຄາບອນ ໃນຂະນະທີ່ສ້າງວຽກເຮັດງານທຳ ພວກເຮົາໄດ້ລິເລີ້ມນະວັດຕະກຳໃໝ່. ພວກເຮົາກຳລັງຜະລິດພະລັງງານລາຄາຖືກ ແລະມີຄວາມໜ້າເຊື່ອຖື ສຳລັບບັນດາຄອບຄົວ ແລະປະຊາຄົມ ຢູ່ໃນທົ່ວປະເທດ.”