ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ເມື່ອບໍ່ດົນມານີ້ ຢູເຄຣນແມ່ນນຶ່ງ ໃນບັນດາປະເທດທີ່ຜະລິດອານຫານສຳລັບສົ່ງອອກລາຍໃຫຍ່ທີ່ສຸດຂອງໂລກ. ຢູເຄຣນເປັນປະເທດທີ່ສົ່ງອອກເຂົ້າເບລ່ ໃຫຍ່ສຸດອັນດັບ 5 ແລະນ້ຳມັນດອກຕາເວັນໃຫຍ່ສຸດອັນດັບ 2 ຂອງໂລກ.
ການຮຸກຮານຢ່າງໂຫດຮ້າຍຂອງຣັດເຊຍທີ່ເລີ້ມຂຶ້ນໃນເດືອນກຸມປີກາຍ ໄດ້ປ່ຽນແປງສິ່ງເຫຼົ່ານີ້ທັງໝົດ. ກອງທັບຂອງຣັດເຊຍ ໄດ້ຈົງໃຈແນເປົ້າໝາຍໃສ່ການຜະລິດອາຫານ ແລະບ່ອນຂົນສົ່ງອາຫານ ຂອງຢູເຄຣນ. ພວກເຂົາໄດ້ຖິ້ມລະເບີດໃສ່ແລະຈູດເຜົາຜົນລະປູກ ພ້ອມທັງຝັງລະເບີດໃສ່ທົ່ງໄຮ່ທົ່ງນາ ຂັດຂວາງກຳປັ່ນຂົນສົ່ງເຂົ້າເບລ່ຂອງຢູເຄຣນບໍ່ໃຫ້ອອກຈາກທ່າກຳປັ່ນໃນທະເລດຳ ແລະທຳລາຍສາງເກັບອາຫານປະເພດເມັດຂອງຢູເຄຣນ ເພື່ອຂັດຂວາງບໍ່ໃຫ້ຜົນລະປູກຂອງຢູເຄຣນ ໄປເຖິງຕະຫຼາດແຫ່ງຕ່າງໆໃນໂລກ, ເຮັດໃຫ້ລູກຄ້າທີ່ໜ້າເຊື່ອຖືຂອງເຂົາເຈົ້າ ແລະບັນດາອົງການໃຫ້ຄວາມຊ່ວຍເຫຼືອທາງດ້ານມະນຸດສະທຳບໍ່ມີອາຫານທີ່ຈະສົ່ງໄປຊ່ວຍເຫຼືອ. ສະພາບການດັ່ງກ່າວເຮັດໃຫ້ສະຖານະການຢູ່ໃນຫຼາຍໆຂົງເຂດ ທີ່ເພິ່ງພາການຊ່ວຍເຫຼືອທາງດ້ານອາຫານ ຊຶ່ງມີຄວາມຮ້າຍແຮງຢູ່ແລ້ວນັ້ນ ຊຸດໂຊມລົງຕື່ມ.
ນັ້ນຄືເຫດຜົນທີ່ວ່າເປັນຫຍັງອົງການພັດທະນາລະຫວ່າງປະເທດຂອງສະຫະລັດ ຫຼືຢູເສດ ໃນເດືອນກໍລະກົດປີກາຍ ຈຶ່ງໄດ້ລິເລີ້ມໂຄງການປັບຕົວທາງດ້ານກະສິກຳສຳລັບຢູເຄຣນ ທີ່ຮູ້ກັນໃນອີກຊື່ນຶ່ງວ່າ AGRI-Ukraine.
ໂຄງການ AGRI-Ukraine ນີ້ ແມ່ນແນເປົ້າໝາຍ ເພື່ອຊ່ວຍກະເສດຕະກອນຊາວຢູເຄຣນ ໃຫ້ເອົາຊະນະອຸບປະສັກທີ່ຮ້າຍແຮງຫຼາຍໆຢ່າງສຳລັບການຜະລິດ ເກັບສະສົມແລະຂົນສົ່ງອາຫານ ຢູ່ໃນປະເທດຢູເຄຣນທີ່ປະສົບກັບໄພສົງຄາມນັ້ນ. ເພື່ອເປັນການຕອບແທນ ຄວາມສຳເລັດຂອງພວກເຂົາເຈົ້າ ຈະຊ່ວຍບັນເທົາ ວິກິດການທາງດ້ານຄວາມໝັ້ນຄົງ ອາຫານຂອງໂລກ ທີ່ໄດ້ຊຸດໂຊມລົງຍ້ອນການເຮັດສົງຄາມຮຸກຮານຂອງຣັດເຊຍເຂົ້າໄປໃນຢູເຄຣນ. ໃນໄລຍະຍາວ ໂຄງການ AGRI-Ukraine ຈະມີຄວາມຫຼໍ່ແຫຼມສຳຄັນ ໃຫ້ການສະໜັບສະໜຸນ ຕໍ່ການສົ່ງອອກຂອງຢູເຄຣນ ແລະພາກສ່ວນການກະສິກຳ ທີ່ມີຄວາມຈຳເປັນຂອງຢູເຄຣນ ຊຶ່ງຈະສືບຕໍ່ມີຄວາມອ່ອນໄຫວ ຈາກການຮຸກຮານຂອງສະຫະພັນຣັດເຊຍໃນຊຸມເດືອນແລະຊຸມປີຕໍ່ໜ້າ.
ເມື່ອໄວໆມານີ້ ໃນທ້າຍເດືອນມັງກອນອົງການຢູເສດ ແລະບໍລິສັດເພຊັດສະກຳ ບາຍເຢີ້ແລະໄບໂອແອັນເທັກ ໄດ້ປະກາດໃນການບໍລິຈາກຮອບໃໝ່ເມັດພືດທີ່ມີຄຸນນະພາບສູງ ໃຫ້ແກ່ຊາວໄຮ່ຊາວສວນຂະໜາດນ້ອຍຢູເຄຣນ 25,000 ຄອບຄົວ. ກ່ອນໜ້ານີ້ ບໍລິສັດບາຍເຢີ້ ກໍເຄີຍບໍລິຈາກເມັດສາລີ ສຳລັບປູກ 40,000 ຖົງມາແລ້ວ. ນີ້ແມ່ນເພື່ອສືບສານຕໍ່ ການເປັນພາຄີຂອງອົງການຢູເສດ ແລະບໍລິສັດບາຍເຢີ້ ເພື່ອໃຫ້ພວກພໍ່ໄຮ່ຊາວສວນສາມາດເຂົ້າເຖິງເມັດສາລີ ໂດຍຜ່ານການລົງທຶນ 34 ລ້ານ 9 ແສນໂດລາ ເພື່ອເພີ້ມຄວາມສາມາດ ໃຫ້ແກ່ສະຖານທີ່ຜະລິດເມັດພັນສາລີໃນຢູເຄຣນ. ນອກນັ້ນທາງບໍລິສັດຍັງໄດ້ປະກອບສ່ວນເຂົ້າໃສ່ກອງທຶນສ້າງເຄື່ອງກວດລະເບີດ ເພື່ອຊ່ວຍພວກພໍ່ໄຮ່ຊາວສວນ ສາມາດປູກອາຫານໄດ້ດ້ວຍຄວາມປອດໄພໃນການປະສານງານເກັບກູ້ລະເບີດທີ່ໄດ້ຮັບທຶນສະໜັບສະໜຸນຈາກກະຊວງການຕ່າງປະເທດສະຫະລັດ.
ໂຄງການ AGRI-Ukraine ທີ່ແນເປົ້າໝາຍເພື່ອເພີ້ມຊ່ອງທາງໃນການເຂົ້າເຖິງສິ່ງທີ່ມີຄວາມຈຳເປັນຕ່າງໆ ສຳລັບພວກຊາວໄຮ່ຊາວນາຢູເຄຣນ ເຊັ່ນວ່າ ເມັດພັນ ຝຸ່ນວິທະຍາສາດ ອຸບປະກອນ ແລະການຄຸ້ມຄອງຜະລິດຕະພັນຈາກຜົນລະປູກ. ມັນເຮັດວຽກ ເພື່ອປັບປຸງພື້ນຖານໂຄງລ່າງ ໃນການສົ່ງອອກຂອງຢູເຄຣນແລະດ້ວຍເຫດນີ້ກໍຄືປະລິມານແລະສັກກະຍະພາບ ໃນການສົ່ງອອກແບບມີປະສິດທິຜົນຂອງສິນຄ້າກະສິກຳ ເຮັດໃຫ້ພວກພໍ່ໄຮ່ຊາວນາເຂົ້າເຖິງການເງິນໄດ້ຫຼາຍຂຶ້ນ ຂະຫຍາຍຄວາມອາດສາມາດທາງດ້ານທຸລະກິດຂອງຢູເຄຣນໃນການຕາກແຫ້ງ ເກັບຮັກສາຊົ່ວຄາວ ແລະແປຮູບສິນຄ້າກະສິກຳຕ່າງໆ.
ສະຫະລັດຂໍຢືນຄຽງບ່າຄຽງໄຫຼ່ກັບຢູເຄຣນແລະຍັງສືບຕໍ່ມີຄວາມໝັ້ນໝາຍທີ່ຈະ ໃຫ້ການສະໜັບສະໜຸນຕໍ່ຢູເຄຣນ ແລະປະຊາຊົນຂອງປະເທດດັ່ງກ່າວ ລຸນຫຼັງ ການຮຸກຮານແບບບໍ່ມີການເກາະຜິດໃດໆຈາກຣັດເຊຍ ໃນສົງຄາມທີ່ບໍ່ເປັນທຳນັ້ນ.