Извештајот на ОБСЕ тврди дека главната цел на мерките за сузбивање преземени од Лукашенко била „да ги казни демонстрантите и да ги заплаши нив и потенцијално други демонстранти.“
Злоупотребите против мирните демонстранти, опозициски активисти и новинари вклучуваат мачења, неосновани притвори и ограничување на слободата на изразување, здружување и мирно собирање.
Главниот автор и професор по меѓународно право, Волфганг Бенедек, во извештајот нотира дека е „особено загрижувачко тоа што добро документираните случаи на мачење и лош третман за време на сузбивањето на политичките дисиденти од страна на безбедносните сили сеуште не резултирале со одговорност за некого, со што се потврдуваат обвинувањата за општа неказнивост и отсуство на фер судења при политички случаи.“
Масовните демонстрации продолжуваат низ Белорусија откако завршија оспорените избори, со што се зголемува притисокот врз претседателот Лукашенко кој владее со земјата 26 години и кој одбива да признае дека изборите биле нерегуларни.
Според новинските извештаи претседателот Лукашенко ја зајакна својата моќ со делумно затворање на западната граница, смена на министерот за внатрешни работи и поттикнување на безбедносните сили кои ги обезбедуваат протестите да ги зголемат мерките за сузбивање на демонстрантите.
Соединетите Држави „остануваат инспирирани од отпорноста и достоинството на белорускиот народ,“ соопшти државниот секретар Мајк Помпео. „Соединетите држави продолжуваат да ги повикуваат белоруските власти да прекинат со мерките за сузбивање и да ги слушнат барањата на белорускиот народ за слободни и фер избори под меѓународно набљудување.“
Препораките во извештајот на ОБСЕ даваат и начин на кој белоруските власти можат да стават крај на кризата. Планот вклучува: набљудувачка мисија на ОБСЕ, крај на насилствата врз белорускиот народ, обезбедување на одговорност за оние кои извршиле злоупотреби. Исто така, сите кои се неправедно притворени треба да бидат ослободени и мора да постои содржаен национален дијалог со претставници од политичката опозиција и од граѓанското општество.
САД стојат заедно со народот на Белорусија во нивната потрага за правда и за слободни и фер избори.