Како одговор, кубанскиот режим насилно ги потисна протестите, уапсувајќи стотици демонстранти едноставно за остварување на нивните основни слободи и човекови права за слобода на изразување и мирно собирање.
Акциите на кубанските безбедносни сили и насилните толпи мобилизирани од првиот секретар на Кубанската комунистичка партија Мигел Дијаз-Канел го открија стравот на режимот од сопствениот народ и неподготвеноста да се исполнат барањата на кубанскиот народ да ги ужива своите човекови права.
Како одговор на репресијата на комунистичкиот кубански режим, Соединетите држави воведоа санкции против Mинистерот на револуционерните вооружени сили на Куба, Алваро Лопез Миера и специјалната национална бригада на кубанското Министерство за внатрешни работи „Боинас неграс“ или Црни беретки.
Лопез Миера и Специјалната национална бригада беа вклучени во задушување на протестите, вклучително и преку физичко насилство и заплашување. Преку програмата за глобални санкции „Магнитски“, Соединетите држави се обидуваат да наметнат опипливи и значајни последици за да ги обесхрабрат злонамерните актери и да промовираат одговорност за оние кои вршат сериозни кршења на човековите права. Ако не се контролираат, злоупотребите ги поткопуваат вредностите што формираат стабилни, безбедни и функционални општества.
Во меѓународен приказ на солидарност со кубанскиот народ, САД и 20 други демократии ги осудија масовните апсења во Куба и повикаа на целосно враќање на пристапот до Интернет во оваа островска држава. „Демократиите ширум светот се собираат за да го поддржат кубанскиот народ, повикувајќи ја кубанската влада да ги почитува барањата на Кубанците за универзални човекови права“, рече државниот секретар Антони Блинкен.
„Ние стоиме покрај секој Кубанец што бара влада што ги почитува човековите права и достоинство на кубанскиот народ“, рече секретарот Блинкен, „ние ќе продолжиме да преземаме активности за промовирање одговорност за кршењето на човековите права од страна на кубанската влада, вклучително и преку дополнителни санкции“.