ولسمشر دونالډ ټرمپ ژمن دی چې یو امریکایي هم ترشا پرېنښودل شي. واک ته د بیرته راتګ راهېسي ولسمشر ټرمپ او د هغه اداره د ګڼ شمیر هغو امریکایانو په خوشې کولو کې بریالي شوي چې په بهر کې زنداني وو. تر ټولو وروستی خوشې شوی عدان الکساندر دی چې حماس نیولی و او د ۱۹ میاشتو لپاره یې په غزې کې زنداني کړی و. دغه ۲۱ کلن ځوان د ۲۰۲۳ کال د اکتوبر په اوومه نیټه د اسرائیل د پوځ په لیکو کې په سرحد کې په دندې بوخت وو چې د حماس ترهګرو ونیوه.
د الکساندر د سمدستي خوشې کیدو تر اعلان وروسته، ولسمشر ټرمپ پر خپلې ټولنیزې شبکې سوشل ټروټ کې د هغو ټولو خواو نه مننه وکړه چې د دې تاریخي خبر او د خلاصون په زیار کې شریک وو.
دا د متحده ایالاتو او د منځګړو هیوادونو قطر او مصر په اړه د ښه نیت یو ګام و چې دا ظالمانه جنګ پای ته ورسیږي او ټول ژوندي پاتې او د وژل شویو یرغملو جسدونه یې عزیزانو ته ورسپارل شي.
د منځني ختیځ دپاره د امریکا ځانګړي استازي ستیف ویتکوف د ایکس په ټولنيزې شبکې کې ولیکل چې "خپل کور ته د الکساندر ستنېدل" نورو ته امید بخښي. هغه د ولسمشر ټرمپ د مشرتابه ستاینه وکړه چې د هغه د خلاصون لاره یې پرانیستله. هغه زیاته کړه، "مونږ د ټولو یرغمل نیول شویو خلاصون ته ژمن یو."
د ولسمشر ټرمپ د بیا واکمنېدو راهیسي د هغو کسانو په لست کې چې د هغه په زیار خوشي شوي دا نومونه هم شامل دي.
زینیا کرولینا- هغه امریکایۍ نڅاګره چې په ناسمه توګه يې ۱۴ میاشتې د روسیې په هغې سیمې کې تیرې کړې چې زندانیان استول کېږي چې سزا وګالي. هغه په اپریل کې خپل کور ته ستنه شوه.
مارک فوګل – یو امریکایي ښوونکی چې په ناسمه توګه د روسیې په یو بند کې د کلونو دپاره زنداني و. هغه تېرې فبرورۍ کې کور ته ستون شو. ولسمشر ټرمپ د فوګل د ازادولو هغه ژمنه پر ځای کړه چې د هغه له ۹۵ کلنې مورمالفین سره یې کړې وه.
کیت سیګل- د حماس په لاس امریکایي یرغمل چې د ۴۸۴ ورځو نه وروسته په فبروري کې خوشې شو.
سیګل وویل، " زه دلته یم او ژوندی یم. ولسمشر ټرمپ تاسو زما ژوند وژغوره. تاسو په خپل زیار د۳۳ نورو زندانیانو ژوند هم ژغورلی دی."
جورچ ګیلزمن – هغه امریکایي چې په افغانستان کې د طالبانو سره د ۸۳۶ ورځو دپاره بندي و، د مارچ په میاشت کې خوشې شو. هغه د راین کوربت او ویلیم مکینتي سره یو ځای شو چې د ولسمشر ټرمپ د لوړې د مراسمو پر شپه خوشې شول.
د ولسمشر دپاره د یرغمل نیول شویو د خلاصون د چارو ځانګړی استازي، ادم بویلر وویل " دا هغه نوې دوره ده چې په هیڅ حالت کې هم مونږ ته دا د منلو نه ده چې یو امریکایي تبعه دې د هیواد نه بهر په ناسمه توګه زنداني وي او د ولسمشر ټرمپ فشار به تر هغې روان وي ترڅو پورې چې په بهر کې زمونږ ټول امریکايي وګړي، که ژوندي دي او یا نه، بېرته راستانه شوي نه وي.