ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ປະຊາທິປະໄຕຍັງສືບຕໍ່ໄດ້ຮັບການຂົ່ມຂູ່ ຢູ່ໃນຫຼາຍໆເຂດຂອງໂລກ ປະທານາທິບໍດີໂຈ ໄບເດັນ ໃຫ້ຂໍ້ສັງເກດໃນຄຳປາໄສຂອງທ່ານ ທີ່ກອງປະຊຸມສະມັດຊາໃຫຍ່ອົງການສະຫະປະຊາຊາດໃນເດືອນນີ້.
“ເຄື່ອງມືທີ່ດີທີ່ສຸດ ເພື່ອຮັບມືກັບບັນຫາທ້າທາຍ ທີ່ພວກເຮົາກຳລັງປະເຊີນໜ້າຢູ່ໃນທົ່ວໂລກ” ປະທານາທິບໍດີໄບເດັນ ໃຫ້ການອະທິບາຍ ກໍແມ່ນເພື່ອ “ສະແດງໃຫ້ເຫັນວ່າປະຊາທິປະໄຕສາມາດນຳສະເໜີຫຼາຍໆຊ່ອງທາງທີ່ມີຄວາມສຳຄັນຕໍ່ຊີວິດຂອງຜູ້ຄົນ.”
“ພາຄີໃນດ້ານພື້ນຖານໂຄງລ່າງ ແລະການລົງທຶນ ໄດ້ແກ້ໄຂຄວາມຈຳເປັນອັນໃຫຍ່ຫຼວງ ສຳລັບການລົງທຶນໃນດ້ານພື້ນຖານໂຄງລ່າງ ຢູ່ໃນບັນດາປະເທດທີ່ມີລາຍໄດ້ຕ່ຳຫາປານກາງ ໂດຍສະເພາະແລ້ວ ໃນອາຟຣິກາ ອາເມຣິກາລາຕິນ ແລະເອເຊຍຕາເວັນອອກສຽງໃຕ້. ໂດຍຜ່ານເປົ້າໝາຍຍຸດທະສາດ ໃນການລົງທຶນນັ້ນ ພວກເຮົາສາມາດອະນຸມັດການເງິນຈຳນວນມະຫາສານໃຫ້ແກ່ພາກເອກກະຊົນ.”
ກຸ່ມຈີ 7 ໄດ້ໃຫ້ຄຳໝັ້ນສັນຍາ ທີ່ຈະສະໜອງເງິນ 600 ພັນລ້ານໂດລາ ເພື່ອສະໜັບສະໜຸນພື້ນຖານໂຄງພາຍໃນປີ 2027. ການລົງທຶນຮ່ວມໃນທຳນອງນີ້ ຈະເປັນຜົນສຳລັບຫຼາຍປະເທດແລະຫຼາຍໆພາກສ່ວນ. ຕົວຢ່າງເສັ້ນທາງລໍບິໂຕ ຈະໄດ້ຮັບການຂະຫຍາຍ ໃນທົ່ວທະວີບອາຟຣິກາ ນັບແຕ່ທ່າກຳປັ່ນໃນພາກຕາເວັນຕົກອັງໂກລາ ຜ່ານສາທາລະນະລັດປະຊາທິປະໄຕຄອງໂກໄປຫາແຊມເບຍ ຊຶ່ງຈະສົ່ງເສີມການເຊື່ອມຕໍ່ຢູ່ໃນຂົງເຂດແລະເສີມຂະຫຍາຍການຄ້າແລະຄວາມໝັ້ນຄົງດ້ານອາຫານ ຢູ່ໃນທະວີບອາຟຣິກາ.
ບໍ່ມີປະເທດໃດໃນພາຄີເຫຼົ່ານີ້ແມ່ນຮວມກັນເພື່ອຄວບຄຸມກິດຈະການຂອງຈີນຢູ່ໃນໂລກ. ພວກເຂົາເຈົ້າມີວິໄສທັດໃນທາງບວກກ່ຽວກັບການມີອະນາຄົດຮ່ວມກັນຂອງພວກເຮົາ ປະທານາທິບໍດີໄບເດັນ ໃຫ້ຂໍ້ສັງເກດ.
“ເມື່ອເວົ້າເຖິງຈີນ ຂ້າພະເຈົ້າຢາກໃຫ້ເປັນທີ່ຈະແຈ້ງແລະສະເໝີຕົ້ນສະເໝີປາຍ. ພວກເຮົາຢາກໃຫ້ມີການຄຸ້ມຄອງແບບມີຄວາມຮັບຜິດຊອບໃນລະຫວ່າງປະເທດຂອງພວກເຮົາ ເພື່ອບໍ່ໃຫ້ມັນກາຍເປັນບັນຫາຂັດແຍ້ງ. ດັ່ງທີ່ຂ້າພະເຈົ້າໄດ້ເວົ້າໄປ ພວກເຮົາແມ່ນເພື່ອຫຼຸດຜ່ອນຄວາມສ່ຽງ ບໍ່ແມ່ນແຍກຈາກຈີນ. ພວກເຮົາຈະຍູ້ຄືນການຮຸກຮານແລະການຂົ່ມຂູ່ ແລະປ້ອງກັນກົດລະບຽບຂອງເສັ້ນທາງຈາກອິດສະຫຼະພາບໃນການເດີນເຮືອ ການບິນຜ່ານ ໄປສູ່ລະດັບການແຂ່ງຂັນທາງດ້ານເສດຖະກິດແບບສະເໝີພາບ ທີ່ຊ່ວຍຄຸ້ມຄອງຄວາມໝັ້ນຄົງແລະຄວາມອຸດົມຮັ່ງມີ ສຳລັບໃນຫຼາຍໆທົດສະວັດຕໍ່ໜ້າ.”
ນອກນັ້ນ ສະຫະລັດຍັງຈະສືບຕໍ່ການດຳເນີນຄວາມພະຍາຍາມເພື່ອຫຼຸດຜ່ອນໄພຂົ່ມຂູ່ຂອງໂລກທີ່ມາຈາກອາວຸດທີ່ມີອະນຸພາບຮ້າຍແຮງ ປະທານາທິບໍດີໄບເດັນກ່າວ.
“ພວກເຮົາໄດ້ທຳລາຍດ້ວຍຄວາມປອດໄພ ຢ່າງໜ້ອຍແມ່ນຕໍ່ລູກປືນທີ່ມີສານເຄ ມີ ທີ່ສະຫະລັດເກັບສະສົມໄວ້ ຊຶ່ງເປັນການປະຕິບັດຕາມຄວາມໝັ້ນໝາຍທີ່ຈະເຮັດໃຫ້ໂລກມີຄວາມປອດໄພຈາກອາວຸດເຄມີ. ແລະພວກເຮົາຂໍປະນາມ ການ ລ່ວງລະເມີດຂອງ ສປປ ເກົາຫຼີຕໍ່ມະຕິຫຼາຍໆສະບັບຂອງສະພາຄວາມໝັ້ນຄົງອົງການສະຫະປະຊາຊາດ. ແຕ່ພວກເຮົາມີຄວາມໝັ້ນໝາຍທາງດ້ານການທູດ ທີ່ຈະເຮັດໃຫ້ແຫຼມເກົາຫຼີເປັນເຂດປອດນິເຄລຍ. ພວກເຮົາກຳລັງເຮັດວຽກຮ່ວມກັບບັນດາປະເທດພາຄີ ທີ່ຈະແກ້ໄຂບັນຫາ ການສ້າງຄວາມບໍ່ທຸ່ນທ່ຽງຂອງອີຣ່ານ ທີ່ເປັນໄພຂົ່ມຂູ່ຕໍ່ຄວາມໝັ້ນຄົງ ຂອງຂົງເຂດ ແລະຂອງໂລກ ແລະຍັງມີຄວາມໝັ້ນໝາຍຢ່າງແນ່ວແນ່ ທີ່ວ່າ ອີຣ່ານຈະບໍ່ສາມາດມີອາວຸດນິວເຄລຍໄວ້ຢູ່ໃນຄວາມຄອບຄອງໄດ້.”
ສະຫະລັດຈະສືບຕໍ່ດຳເນີນການຮ່ວມມືແລະເປັນພາຄີ ໂດຍຜ່ານອົງການສະຫະ ປະຊາຊາດ. ດັ່ງທີ່ປະທານາທິບໍດີໄບເດັນ ໄດ້ກ່າວໄວ້ ນີ້ແມ່ນ “ພື້ນຖານຂອງຄວາມຮັບຜິດຊອບ ໃນການເປັນຜູ້ນຳຂອງໂລກ.”
