ເທັກໂນໂລຈີ ເຊັ່ນປັນຍາປະດິດ, ຄວາມປອດໄພທາງໄຊເບີ ຫຼື ຄອມພິວເຕີ ແລະ ພື້ນຖານໂຄງລ່າງດ້ານດິຈິຕອລ ແມ່ນມີຄວາມຈຳເປັນຕໍ່ຊີວິດແຕ່ລະວັນໃນໂລກຍຸກໃໝ່. ນະວັດຕະກຳໃໝ່ໃນຂົງເຂດນີ້ແມ່ນ “ໄດ້ເປັນແຫຼ່ງທີ່ມາພື້ນຖານຍິ່ງຂຶ້ນຂອງອຳນາດພູມສາດການເມືອງ,” ອີງຕາມການກ່າວ ຂອງທ່ານ ນາທານນຽລ ຟິກ, ເອກອັກຄະລັດຖະທູດພິເສດກະຊວງການຕ່າງປະເທດ ທີ່ຮັບຜິດຊອບ ກ່ຽວກັບ ນະໂຍບາຍໂລກເທັກໂນໂລຈີສາລະສົນເທດ ແລະ ດິຈິຕອລ ໃນການໃຫ້ການຕໍ່ລັດຖະສະພາເມື່ອບໍ່ດົນມານີ້. ສະຫະລັດ ໄດ້ໃຫ້ບູລິມະສິດຄວາມຮັບຜິດຊອບໃນການໃຊ້ເທັກໂນໂລຈີທີ່ກຳລັງເຕີບໂຕນີ້ໂດຍບັນດາພັນທະມິດ ແລະ ຄູ່ຮ່ວມໃນພາກພື້ນອິນໂດ-ປາຊີຟິກ.
ສະຫະລັດ ໄດ້ດຳເນີນການເຈລະຈາກັບ ສິງກະໂປ, ສາທາລະນະລັດ ເກົາຫຼີ, ອິນເດຍ, ອອສເຕຣເລຍ ແລະ ຫຼາຍປະເທດເກາະໃນມະຫາສະໝຸດປາຊີຟິກເພື່ອສ້າງຄວາມສາມັກຄີໃນ “ຫົວຂໍ້ເທັກໂນໂລຈີ ທີ່ກຳລັງຂະຫຍາຍອອກຈຳນວນຫຼາຍ ກ່ຽວກັບ ພູມສາດການເມືອງທີ່ສຳຄັນເປັນຢ່າງສູງ,” ອີງຕາມການກ່າວຂອງເອກອັກຄະລັດຖະທູດ ຟິກ.
ທ່ານກ່າວວ່າ “ຄວາມພະຍາຍາມທີ່ວ່ານີ້ ຈະຕັດຜ່ານລະບົບນິເວດດິຈິຕອລ, ຈາກການປົກປ້ອງຄວາມປອດໄພທາງໄຊເບີຂັ້ນພື້ນຖານຕໍ່ເຄືອຂ່າຍ 5G ຫາດ້ານອື່ນໆຂອງພື້ນຖານໂຄງລ່າງດິຈິຕອລ, ລວມທັງສູນຂໍ້ມູນ, ດາວທຽມທີ່ໝູນອ້ອມໂລກໃນລະດັບຕ່ຳ ແລະ ສາຍເຄເບິລໃຕ້ທະເລ, ເຊັ່ນດຽວກັບເທັກໂນໂລຈີທີ່ສາມາດໃຊ້ໄດ້ທົ່ວໄປ, ລວມທັງ ປັນຍາປະດິດ ຫຼື AI.
ໃນຂະນະທີ່ໄດ້ມີການບັນລຸກັນຢ່າງເປັນເອກະສັນ, ບໍ່ແມ່ນທຸກປະເທດໃນພາກພື້ນໄດ້ນຳໃຊ້ເທັກໂນໂລຈີໃໝ່ທີ່ວ່າຢ່າງມີຄວາມຮັບຜິດຊອບ, ອີງຕາມການກ່າວຂອງເອກອັກຄະລັດຖະທູດ ຟິກ.
ທ່ານກ່າວວ່າ “ພວກເຮົາປະເຊີນກັບຄູ່ແຂ່ງ ທີ່ມີແຫຼ່ງຊັບພະຍາກອນຢ່າງຫຼວງ ຫຼາຍ ແລະ ມີຄວາມສາມາດທາງເທັກໂນໂລຈີ ແລະ ສັດຕູຜູ້ທີ່ມີວິໄສທັດຜະເດັດການ ແລະ ໃຊ້ແຜນຍຸດທະສາດໄລຍະຍາວທີ່ອີງໃສ່ເທັກໂນໂລຈີເພື່ອພັດທະນາຄວາມທະເຍີທະຍານນັ້ນ. ຜູ້ແຂ່ງຂັນທີ່ວ່ານີ້ໂດດເດັ່ນທີ່ສຸດແມ່ນລວມມີສາທາລະນະລັດ ປະຊາຊົນ ຈີນ ຫຼື ສປ ຈີນ, ເຊິ່ງໃຊ້ທຸກອົງປະກອບຂອງອຳນາດຂອງປະເທດ ເພື່ອພະຍາຍາມຈະຫັນເຫລະບົບສາກົນ ທີ່ອີງໃສ່ກົດລະບຽບໃຫ້ພໍໃຈເຂົາເຈົ້າ.”
ສະຫະລັດ ແມ່ນຍັງເປັນຫ່ວງກັບແຜນຍຸດທະສາດທີ່ປະສົມພົນລະເຮືອນ ແລະ ທະຫານຂອງ ສປ ຈີນ, ດ້ວຍການບັງຄັບບັນດາບໍລິສັດ ຈີນ ໃຫ້ແບ່ງປັນເທັກໂນໂລຈີນະວັດຕະກຳໃໝ່ກັບກອງທັບ ຈີນ, ກອງທັບປົດປ່ອຍປະຊາຊົນ. ແຜນຍຸດທະສາດນີ້ “ໄດ້ຫຼຸດຄວາມໝັ້ນໃຈຂອງພວກເຮົາໃນຄວາມສາມາດ ທີ່ຈະຮັບປະກັນວ່າ ເທັກໂນໂລຈີ ສະຫະລັດ ທີ່ຖືກສົ່ງອອກໄປ ສປ ຈີນ ຈະຖືກໃຊ້ສຳລັບພົນລະເຮືອນທີ່ຖືກຕ້ອງກົດໝາຍເທົ່ານັ້ນ,” ອີງຕາມການກ່າວຂອງທ່ານ ເອລຽດ ຄາງ, ຮອງລັດຖະມົນຕີກະຊວງການຕ່າງປະເທດ ຮັບຜິດຊອບຫ້ອງການຮັກສາຄວາມປອດໄພສາກົນ ແລະ ປອດອາວຸດນິວເຄລຍ.
ເພື່ອຕອບໂຕ້ແຜນຍຸດທະສາດນີ້, ສະຫະລັດ ໄດ້ກໍ່ຕັ້ງກອງທຶນການຮັກສາຄວາມປອດໄພເທັກໂນໂລຈີສາກົນ ແລະ ນະວັດຕະກຳໃໝ່, ຫຼື ITSI, ເຊິ່ງ ໄດ້ສ້າງຄວາມຕື່ນຕົວ ກ່ຽວກັບ ສປ ຈີນ ທີ່ເປັນຜູ້ບໍລິໂພກ ທີ່ມີບັນຫາ ແລະ ທຳລາຍກິດຈະກຳທີ່ຜິດກົດໝາຍ. ກະຊວງການຕ່າງປະເທດ “ຍັງໄດ້ຈັດການກັບໂຄງການຊ່ວຍເຫຼືອຕ່າງປະເທດອື່ນໆ ເພື່ອເສີມຂະຫຍາຍລະບົບກົດລະບຽບຕ່າງໆໃນພາກພື້ນ, ປັບປຸງການປະຕິບັດການ ແລະ ບັງຄັບໃຊ້ມາດຕະການຕ່າງໆ, ແລະ ຍົກລະດັບການຄົ້ນຄວ້າດ້ານການຮັກສາຄວາມປອດໄພໃນບັນດາຄູ່ຮ່ວມ,” ອີງຕາມການກ່າວຂອງຮອງລັດຖະມົນຕີ ຄາງ.
“ເຂດອິນໂດ-ປາຊີຟິກແມ່ນມີຄວາມສຳຄັນເປັນພິເສດ. ເປັນພາກພື້ນທີ່ອຸດົມສົມບູນໄປດ້ວຍຜູ້ລິເລີ່ມເທັກໂນໂລຈີ ແລະ ຜູ້ສະໜອງທີ່ສຳຄັນ,” ອີງຕາມການກ່າວຂອງຮອງລັດຖະມົນຕີ ຄາງ. ສະຫະລັດ ແມ່ນມີຄວາມມຸ່ງໝັ້ນທີ່ຈະສະໜັບສະໜູນບັນດາຄູ່ຮ່ວມຂອງເຂົາເຈົ້າໃນຂະແໜງທີ່ວ່ານີ້, ໃນຂະນະດຽວກັນກໍຕອບໂຕ້ຕໍ່ປະເທດໃດໆທີ່ພະຍາຍາມຈະຫັນເອົາເທັກໂນໂລຈີທີ່ກຳລັງເຕີບໂຕນີ້ເພື່ອຜົນປະໂຫຍດຂອງຕົນເອງ.