Ranar 22 ga Afrilu ita ce Ranar Duniya, wadda dama ce ta bayyana farin ciki da yanayin halitta, yin nazari kan tasirin da mutane ke da shi a kan muhallinmu, da kuma tabbatar da goyon bayanmu ga harkar kare muhalli.
Bikin ya samo asali ne daga yadda jama'a ke nuna bacin ransu dangane da yadda ake wofinta muhalli a sassan kasar, da kuma rashin niyya, a siyasance, ta yin wani abu akai. Gaylord Nelson, wanda Sanata ne a lokacin kuma dan rajin kare muhalli, ya lura cewa ba za a yi wani abu ba har sai mutane masu yawa sosai sun nuna bacin ransu a bainar jama'a, don haka ya shirya Ranar Duniya ta farko a ranar 22 ga Afrilu, 1970.
"Ya kasance wani muhimmin lokaci ga kasarmu ta yi nazari da kuma kara himma wajen kiyaye muhalli," in ji Monica Medina, mataimakiyar sakatariyar harkokin teku da harkokin muhalli ta kasa da kasa da kimiyya.
A cewar ta, “Ranar Duniya muhimmin lokaci ne da ya kamata dukkanmu mu tsaya mu yi tunanin yadda muhalli ke da muhimmanci ga ingancin rayuwa, da tattalin arzikinmu da kuma lafiyar dan Adam. . . Taken wannan shekara shine saka hannun jari a duniyarmu, wanda ba wani abinda ya fi haka mahimmanci. Kasar Amurka na aiki tukuru don ƙara yawan jarin da take zubawa a cikin abubuwa kamar wuraren shakatawa da wuraren kariya, ingancin ruwa, kiyayewa, kowane nau'i na hanyoyin da za su inganta rayuwa, canza kayan aikin makamashi da duk burinmu na makamashi don zama fiye da sabuntawa."
"Dukkan wannan zai haifar da fa'idodi da yawa ga ingancin rayuwa, amma kuma da inganta ayyukan yi da tattalin arzikin kasa," in ji mataimakiyar Sakatare Medina, wacce kuma ke aiki a matsayin wakiliya ta musamman kan halittu da albarkatun ruwa. “Sabbin wuraren kariya, a kan kasa da kuma cikin teku. . . muhimman hanyoyin da gwamnati ke samun ci gaba wajen kiyaye duniyarmu da muhallinmu."
Ta ce, "Muna saka hannun jari a kan ababen more rayuwa na itatuwa don tabbatar da cewa bakin tekun da kasarmu sun samu dacewa don sauyin yanayi da kuma matsalolin yanayi. Kuma duk kudaden da muke kashewa a cikin lissafin abubuwan more rayuwa don inganta abubuwan more rayuwa ta hanyoyin da za su fi amfanar muhalli. Kuma… muna canza kayan aikin mu na makamashi don mu dogara sosai ga makamashin da ake sabunta shi wanda ke da tsabta ba mai guba ba.”
A Ranar Duniya, ya kamata mu tuna cewa muhallinmu na yin matukar tasiri kan ingancin dorewarmu. “Idan ba mu da muhalli mai tsabta da lafiya,” in ji mataimakiyar Sakatare Medina, “da gaske ba za mu iya ci gaba da kula da kanmu ba kuma mu yi rayuwa mai irin ingancin da za mu so.”
Wannan shine sharhi kan ra’ayoyin gwamnatin Amurka