ເມື່ອສອງປີທີ່ຜ່ານມາ, ຣັດເຊຍ ໄດ້ບຸກລຸກປະເທດເພື່ອນບ້ານຂອງເຂົາເຈົ້າ, ຢູເຄຣນ. ແຕ່ສົງຄາມບໍ່ໄດ້ເລີ່ມຂຶ້ນໃນວັນທີ 24 ກຸມພາ, 2022. ມັນໄດ້ດຳເນີນມາໃນພາກຕາເວັນອອກຂອງປະເທດນັບຕັ້ງແຕ່ປີ 2014 ເປັນຕົ້ນມາ, ເວລາທີ່ພວກຕົວແທນຕິດອາວຸດ ແລະ ໄດ້ຮັບການຝຶກຊ້ອມໂດຍ ຣັດເຊຍ ໃນພາກພື້ນທີ່ເອີ້ນວ່າ ດອນບາສ ໄດ້ພະຍາຍາມທີ່ຈະແຍກຕົນອອກຈາກ ຢູເຄຣນ ແລະ ລວມເຂົ້າກັບ ຣັດເຊຍ. ຄວາມພະຍາຍາມຫຼາຍຄັ້ງ ເພື່ອລະງັບສະຖານະການດ້ວຍການທູດ, ທີ່ເອີ້ນວ່າຂໍ້ຕົກລົງ ມິງສ໌, ບໍ່ໄດ້ສົ່ງຜົນໃຫ້ເກີດຂໍ້ແກ້ໄຂໄລຍະຍາວ. “ຣັດເຊຍ ບໍ່ໄດ້ຫົວຊາຕໍ່ຄຳໝັ້ນສັນຍາທຸກອັນທີ່ເຂົາເຈົ້າໄດ້ເຮັດ ໃນຖານະເປັນຜູ້ເຊັນຂໍ້ຕົກລົງ ມິງສ໌ ນັ້ນ,” ອີງຕາມການກ່າວຂອງທູດສຳຮອງ ສະຫະລັດ ປະຈຳອົງການສະຫະປະຊາຊາດ, ທ່ານ ໂຣເບີດ ວູດ.
ທ່ານກ່າວວ່າ “ຣັດເຊຍ, ແລະ ບໍ່ມີຄົນອື່ນໃດ, ແມ່ນຮັບຜິດຊອບສຳລັບສົງຄາມນີ້, ເຊິ່ງໄດ້ກໍ່ໃຫ້ເກີດການນອງເລືອດຈຳນວນຫຼາຍໃນທົດສະວັດທີ່ຜ່ານມາ. ຣັດເຊຍ ໄດ້ບຸກລຸກແຫຼມໄຄຣເມຍຂອງ ຢູເຄຣນ ແລະ ພາກຕາເວັນອອກຂອງ ຢູເຄຣນ. ພວກເຂົາໄດ້ໃຫ້ທຶນ, ຄວາມພ້ອມ, ແລະ ນຳພາກອງກຳລັງຕົວແທນໃນການພະຍາຍາມທີ່ຈະສ້າງຕັ້ງຂໍ້ອ້າງທຽມເພື່ອປ້ອງກັນຊາວ ຢູເຄຣນ ບໍ່ໃຫ້ໃຊ້ສິດທິຂອງເຂົາເຈົ້າເພື່ອຕັດສິນໃຈເອງ.”
ບໍ່ມີການບິດເບືອນຂໍ້ມູນ ຫຼື ການພະຍາຍາມໃດໆໂດຍສະຫະພັນ ຣັດເຊຍ ເພື່ອຂຽນຄືນປະຫວັດສາດ, ຈະສາມາດປ່ຽນແປງຂໍ້ເທັດຈິງນັ້ນ, ອີງຕາມການກ່າວຂອງເອກອັກຄະລັດຖະທູດ ວູດ.
ທ່ານກ່າວວ່າ “ຣັດເຊຍ ແມ່ນ ແລະ ມັກຈະເປັນຜູ້ຍຸແຍ່ຄົນດຽວຂອງຄວາມຂັດແຍ້ງນີ້. ພວກເຂົາໄດ້ເຂົ້າຮ່ວມໂດຍກົງໃນການເຈລະຈາຂໍ້ຕົກລົງ ມິງສ໌, ແລະ ຜູ້ແທນໂດຍກົງຂອງພວກເຂົາໄດ້ເຊັນເອກະສານສາມສະບັບ ທີ່ຕັ້ງຂໍ້ຕົກລົງດັ່ງກ່າວໃນປີ 2014 ແລະ 2015… ຣັດເຊຍ ໄດ້ຢືນຢັນຄືນຢູ່ກອງປະຊຸມສຸດຍອດ Normandy Four ໃນປີ 2019 ທີ່ວ່າຂໍ້ຕົກລົງມິງສ໌ ທັງໝົດສາມສະບັບ ຍັງຄົງອີງໃສ່ຂະບວນການສັນຕິພາບ.”
“ແລະຕໍ່ມາ ຣັດເຊຍ ໄດ້ເປີດການບຸກລຸກເຕັມອັດຕາໃສ່ປະເທດ ຢູເຄຣນ ທີ່ມີອຳນາດອະທິປະໄຕ,” ອີງຕາມການກ່າວ ຂອງເອກອັກຄະລັດຖະທູດ ວູດ.
ທ່ານກ່າວວ່າ “ໃນຂະນະທີ່ຜູ້ເຊັນຂໍ້ຕົກລົງ ມິງສ໌ ອື່ນໆໄດ້ພະຍາຍາມທີ່ຈະປະຕິບັດຄຳໝັ້ນສັນຍາຂອງເຂົາເຈົ້າດ້ວຍຄວາມຈິງໃຈນັ້ນ, ປະທານາທິບໍດີ ປູຕິນ ໄດ້ປະຕິເສດເຂົາເຈົ້າເພື່ອຄວາມໂລບມາກໂລພາ ທີ່ເປັນຕາຢ້ານ.”
“ຈຸດປະສົງສູງສຸດຂອງ ຣັດເຊຍແມ່ນຍັງຄົງເປັນການເອົາຊະນະ ຢູເຄຣນ ຢ່າງເຕັມທີ່ ແລະ ປະຕິເສດການມີຢູ່ຂອງເອກະລັກທີ່ພິເສດຂອງຊາວ ຢູເຄຣນ. ຈຸດປະສົງພື້ນຖານຂອງຂໍ້ຕົກລົງ ມິງສ໌, ດັ່ງທີ່ໄດ້ອະທິບາຍໂດຍຜູ້ເຊັນທັງໝົດນັ້ນ, ແມ່ນເພື່ອລວມເອົາເຂດຄວາມຂັດແຍ້ງທັງໝົດມາໃຫ້ ຢູເຄຣນ ແລະ ຟື້ນຟູດິນແດນທີ່ມີອະທິປະໄຕຂອງ ຢູເຄຣນ. ແຕ່ ຣັດເຊຍ ບໍ່ໄດ້ມີຄວາມສົນໃຈໃນສັນຕິພາບ.”
ພວກເຮົາໄດ້ຮຽນຮູ້ຈາກການພັງທະລາຍຂອງຂໍ້ຕົກລົງມິງສ໌ ທີ່ຂໍ້ຕົກລົງສັນຕິພາບຢ່າງດຽວຈະບໍ່ສິ້ນສຸດຄວາມຮຸນແຮງ, ເພາະວ່າ ຣັດເຊຍ ບໍ່ໄດ້ມີຄວາມສົນໃຈໃນການປະຕິບັດຕາມກົດໝາຍສາກົນ.
ທ່ານກ່າວວ່າ “ການຕັດສິນໃຈຂອງທ່ານ ປູຕິນ ເພື່ອເປີດສົງຄາມທີ່ບໍ່ໄດ້ຖືກຍຸແຍ່ ແລະ ບໍ່ມີເຫດຜົນຕໍ່ປະເທດເພື່ອນບ້ານຂອງທ່ານ ໄດ້ເຮັດໃຫ້ຂໍ້ຕົກລົງ ມິງສ໌ ເປັນໂມຄະຢ່າງເຕັມທີ່ ແລະ ຕະຫຼອດໄປ. ສະຫະລັດ ຮຽກຮ້ອງໃຫ້ ຣັດເຊຍ ຢຸດການໂຈມຕີຢ່າງບໍ່ລົດລະຕໍ່ ຢູເຄຣນ ແລະ ປະຊາຊົນຂອງເຂົາເຈົ້າ, ຈົ່ງຖອນກອງກຳລັງຂອງເຂົາເຈົ້າອອກຈາກດິນແດນຂອງ ຢູເຄຣນ ແລະ ສິ້ນສຸດສົງຄາມທີ່ໂຫດຮ້າຍນີ້ມື້ນີ້.”