ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ນັບເປັນເວລາ 7 ທົດສະວັດມາແລ້ວ ທີ່ກຳລັງຂອງສະຫະລັດ ແລະຟີລິບປິນໄດ້ຮັບການຝຶກແອບ ແລະສູ້ລົບ ຄຽງບ່າຄຽງໄຫຼ່ ຊຶ່ງກັນແລະກັນ. “ທຸກມື້ນີ້” ລັດຖະມົນຕີກະຊວງປ້ອງກັນປະເທດສະຫະລັດ ທ່ານລອຍ ອອສຕິນ ໄດ້ກ່າວ ວ່າ “ພວກເຮົາຈະເສີມສ້າງບົນພື້ນຖາ ນຂອງຄວາມສຳພັນເຫຼົ່ານັ້ນ ເພື່ອໃຫ້ມີຄວາມໝັ້ນຄົງຕື່ມຂຶ້ນ ສະຖຽນລະພາບ ແລະຄວາມອຸດົມຮັ່ງມີ ຕໍ່ເຂດອິນໂດປາຊີຟິກ ສຳລັບໄລຍະ 70 ປີຕໍ່ໜ້າ ແລະໄກອອກໄປກວ່ານັ້ນ.”
ສະຫະລັດແລະຟີລິບປິນ ຂໍຢືນຢັນອີກເທື່ອນຶ່ງວ່າ ສົນທິສັນຍາໃນດ້ານປ້ອງກັນປະເທດຮ່ວມ ຍັງສືບຕໍ່ເປັນຫຼັກການພື້ນຖານ ຂອງການຮ່ວມມື ຂອງພວກຕົນ. ສົນທິສັນຍານີ້ ທ່ານລັດຖະມົນຕີປ້ອງກັນປະເທດ ອອສຕິນ ໃຫ້ການອະທິບາຍວ່າ “ນຳໃຊ້ສຳລັບການໂຈມຕີດ້ວຍກຳລັງອາວຸດຕໍ່ກຳລັງທະຫານຂອງພວກເຮົາ ເຮືອບິນຂອງພວກເຮົາ ຫຼືກຳປັ່ນພວກເຮົາ ຮວມທັງຂອງໜ່ວຍຍາມຝັ່ງພວກເຮົາ ຢູ່ໃນທຸກໆແຫ່ງ ຂອງທະເລຈີນໃຕ້.”
ທັງສອງປະເທດ ໄດ້ປຶກສາຫາລືກ່ຽວກັບແຜນການ ເປີດສະຖານທີ່ໃໝ່ 4 ແຫ່ງໃນຂໍ້ຕົກລົງການຮ່ວມມືດ້ານປ້ອງກັນປະເທດທີ່ໄດ້ຮັບການປັບປຸງ ທີ່ແຂວງປາລາວານ ແລະເກາະລູຊອນ ທີ່ຕັ້ງຢູ່ທາງພາກເໜືອ ທ່ານລັດຖະມົນຕີອອສຕິນກ່າວ:
“ສະຖານທີ່ເຫຼົ່ານີ້ຈະໃຫ້ການສະໜັບສະໜຸນໃນການຝຶກແອບຊ້ອມລົບຮ່ວມແລະການຕິດຕໍ່ສື່ສານທາງດ້ານຄອມພິວເຕີລະຫວ່າງກຳລັງຂອງພວກເຮົາ ເພື່ອໃຫ້ການຄ້ຳປະກັນວ່າ ພວກເຮົາໄດ້ກຽມພ້ອມ ເປັນຢ່າງດີແລ້ວ ເພື່ອຮັບມືກັບວິກິດການໃນອະນາຄົດ.”
ພາຍໃນທ້າຍສົກງົບປະມານ ປີ 2023 ສະຫະລັດຄາດວ່າ ຈະຈັດສັນເງິນຫຼາຍ ກວ່າ 100 ລ້ານໂດລາ ໃນການລົງທຶນດ້ານພື້ນຖານໂຄງລ່າງ ສຳລັບສະຖານທີ່ຕ່າງໆໃນຂໍ້ຕົກລົງການຮ່ວມມືດ້ານປ້ອງກັນປະເທດທີ່ມີຢູ່ໃນປັດຈຸບັນແລະສະບັບທີ່ໄດ້ຮັບການປັບປຸງໃໝ່. ການລົງທຶນເຫຼົ່ານັ້ນຈະຊ່ວຍສ້າງວຽກເຮັດງານທຳແລະການເຕີບໂຕຂອງເສດຖະກິດສຳລັບປະຊາຄົມຊາວຟີລິບປິນຢູ່ໃນທ້ອງຖິ່ນ ທ່ານອອສຕິນກ່າວ. “ພວກເຮົາ ນອກນັ້ນແລ້ວ ຍັງມີຄວາມໝັ້ນໝາຍທີ່ຈະດຳເນີນການຢ່າງວ່ອງໄວ ເພື່ອສະຫຼຸບແນວນະໂຍບາຍ ຂໍ້ຕົກລົງການຮ່ວມມືສອງຝ່າຍ ດ້ານປ້ອງກັນປະເທດ ລະຫວ່າງສະຫະລັດກັບຟີລິບປີນ ຊຶ່ງຈະເປັນທິດທາງສຳລັບວິໄສທັດໃນການຮ່ວມມືຂອງພັນທະມິດ ກ່ຽວກັບການປະຕິບັດງານຕ່າງໆ ຮວມທັງໃນດ້ານອະວະກາດແລະດ້ານໄຊເບີ້.”
ລັດຖະມົນຕີອອສຕິນ ແລະຄູ່ຕຳແໜ່ງຝ່າຍຟີລິບປິນ ລັດຖະມົນຕີກາລເວສ ຍັງໄດ້ຕົກລົງກັນທີ່ຈະເພີ້ມຄວາມພະຍາຍາມຂຶ້ນເປັນສອງເທົ່າ ເພື່ອເສີມຂະຫຍາຍຄວາມສາມາດໃນການຕ້ານຢັນ ການໂຈມຕີດ້ວຍກຳລັງອາວຸດ ໂດຍການປັບປຸງກອງທັບຂອງສະຫະລັດແລະຂອງຟີລິບປິນ. ພວກຜູ້ນຳທັງສອງຍັງໄດ້ຫາລືກັນກ່ຽວກັບແຜນການທີ່ຈະຈັດສົ່ງເຣດ້າ ລະບົບອາກາດຍານບໍ່ມີຄົນຂັບ ເຮືອບິນຂົນສົ່ງທະຫານແລະລະບົບປ້ອງກັນເຂດຊາຍຝັ່ງແລະທາງອາກາດ ໄປໃຫ້ຟີລິບປິນໃນໄລຍະ 5 ຫາ 10 ປີຕໍ່ໜ້າ.
ລັດຖະມົນຕີກະຊວງປ້ອງກັນປະເທດອອສຕິນ ກ່າວວ່າ “ພັນທະມິດຂອງພວກເຮົາ ຊຶ່ງໃນທີ່ສຸດແມ່ນນຳພາໂດຍຄວາມໝັ້ນໝາຍອັນເລິກເຊິ່ງແລະຍືນຍົງຂອງພວກເຮົາຕໍ່ອິດສະຫຼະພາບ ດັ່ງນັ້ນ ພວກເຮົາຈຶ່ງບໍ່ແມ່ນເປັນພຽງແຕ່ພັນທະມິດ ພວກເຮົາຍັງເປັນພັນທະມິດປະຊາທິປະໄຕນຳດ້ວຍ. ສະຫະລັດ ແລະຟີລິບປິນ ຈຶ່ງມີຄວາມຜູກພັນໂດຍວິໄສທັດຮ່ວມສຳລັບອະນາຄົດ - ຊຶ່ງເປັນວິໄສທັດທີ່ໄດ້ຝັງແໜ້ນໃນການປົກຄອງດ້ວຍຕົວບົດກົດໝາຍ ແລະອິດສະຫຼະພາບທາງທະເລ ແລະກໍໃຫ້ການເຄົາລົບຕໍ່ຜືນແຜ່ນດິນອັນຄົບຖ້ວນແລະອະທິປະໄຕຂອງປະເທດຕ່າງໆ.”