ບົດບັນນາທິການ ທີ່ສະທ້ອນເຖິງນະໂຍບາຍ ຂອງລັດຖະບານສະຫະລັດ
ສະຫະລັດຂໍສະແດງຄວາມເປັນຫ່ວງຢ່າງເລິກເຊິ່ງ ກ່ຽວກັບການຈັບກຸມຜູ້ນຳສະຫະພັນກຳມະບານຄົນຄົນສຳຄັນ ໃນກຳປູເຈຍ ເມື່ອໄວໆມານີ້.
ທ່ານນາງຊິມ ສີທາ ຜູ້ນຳກຳມະບານທີ່ບ່ອນຫຼິ້ນກາໂຊນິ NagaWorld ໃນນະຄອນຫຼວງພະນົມເປັນ ໄດ້ຖືກຈັບເມື່ອວັນທີ 26 ພະຈິກຜ່ານມານີ້ ໃນຂະນະທີ່ທ່ານນາງ ເດີນທາງກັບມາຈາກກອງປະຊຸມສະຫະພັນກຳມະບານສາກົນ ທີ່ນະ ຄອນແມລເບິນ ປະເທດອອສເຕຣເລຍ. ຢູ່ໃນຖະແຫຼງການທີ່ນຳອອກເຜີຍແຜ່ບໍ່ ດົນ ຫຼັງຈາກໄດ້ມີການຈັບກຸມທ່ານນາງແລ້ວ ໂຄສົກກະຊວງການຕ່າງປະເທດ ສະຫະລັດ ທ່ານເນດ ໄພຣສ໌ ກ່າວວ່າ “ພວກເຮົາຂໍຮຽກຮ້ອງໃຫ້ເຈົ້າໜ້າທີ່ກຳປູເຈຍ ປ່ອຍທ່ານນາງຊິມ ສີທາ ແລະຍຸຕິການດຳເນີນຄະດີຕໍ່ຜູ້ນຳກຳມະບານ ທີ່ໄດ້ຊົມໃຊ້ສິດເສລີພາບຂອງພວກເຂົາເຈົ້າ ໃນການຄົບຄ້າສະມາຄົມ ແລະການໂຮມຊຸມນຸມກັນແບບສັນຕິ ຍົກເລີກຂໍ້ກ່າວຫາຕໍ່ພວກເຂົາເຈົ້າແລະທຳການເຄື່ອນໄຫວແບບສ້າງສັນເພື່ອແກ້ໄຂຂໍ້ຍັດແຍ້ງ.”
ທ່ານນາງຊິມ ສີທາ ໄດ້ຖືກຈັບເທື່ອທຳອິດໃນເດືອນມັງກອນປີ 2022 ຫຼັງຈາກໄດ້ນຳພາການເດີນຂະບວນຂອງສະມາຊິກຳມະບານຄັ້ງໃຫຍ່ ຮຽກຮ້ອງໃຫ້ຈ້າງຄືນບັນດາພະນັກງານ NagaWorld ຫຼາຍຮ້ອຍຄົນ ຍ້ອນພວກຄົນງານເຫຼົ່ານີ້
ມີການກ່າວຫາວ່າຖືກປົດອອກຈາກວຽກແບບບໍ່ເໝາະສົມ. ເຈົ້າໜ້າທີ່ໄດ້ໃຊ້ວິທີແບບຮຸນແຮງເພື່ອທັບມ້າງການປະທ້ວງແບບສັນຕິຮວມທັງມີລາຍງານວ່າ ຊຸກແລະທຸບຕີພວກເດີນຂະບວນໃນລະຫວ່າງການປະທ້ວງເມື່ອວັນທີ 27 ມິຖຸນາແລະ 11 ສິງຫາ. ນອກນັ້ນ ພວກເຈົ້າໜ້າທີ່ຍັງຖືກກ່າວຫາວ່າໃຊ້ກົດໝາຍສາທາລະນະສຸກເພື່ອທັບມ້າງການປະທ້ວງໂດຍບັງຄັບໃຫ້ພວກຄົນງານທີ່ນັດຢຸດງານຂຶ້ນໄປເທິງລົດບັດ ແລ້ວຂົນພວກເຂົາເຈົ້າໄປສະຖານທີ່ກັກບໍລິເວນ ເພື່ອຄຸມຂັງພວກເຂົາເຈົ້າໄວ້ຢູ່ທີ່ນັ້ນໃນຕອນກາງຄືນ. ລັດຖະບານກຳປູເຈຍເອີ້ນການນັດຢຸດງານວ່າ “ຜິດກົດໝາຍ” ແລະຟ້ອງທ່ານນາງຊິມ ສີທາ ດ້ວຍຂໍ້ຫາ “ຍຸແຍ່ໃຫ້ກໍ່ອາຊະຍາກຳຮ້າຍແຮງໂດຍລົບກວນຄວາມເປັນລະບຽບຂອງສັງຄົມ.” ລາຍງານສະບັບຫຼ້າສຸດຂອງກະຊວງການຕ່າງປະເທດກ່ຽວກັບການນັບຖືສິດທິມະນຸດໃນກຳປູເຈຍ ກ່າວເຖິງຂໍ້ກ່າວຫານັ້ນວ່າ ເປັນ “ມາດຕະຖານທີ່ຄຸມເຄືອ ເພື່ອໃຊ້ສຳລັບກົດຂີ່ແລະລົງໂທດຕໍ່ການສະແດງອອກດ້ວຍການປາກເວົ້າແລະບໍ່ພໍໃຈທາງດ້ານການເມືອງ.”
ທ່ານນາງຊິມ ສີທາ ໄດ້ຖືກປ່ອຍດ້ວຍການປະກັນໂຕອອກມາ ໃນເດືອນມີນາ. ລັດຖະບານກຳປູເຈຍກ່າວອ້າງວ່າ ທ່ານນາງໄດ້ຖືກຈັບຄືນອີກ ຍ້ອນລະເມີດເງື່ອນໄຂການປະກັນໂຕ ໃນການເດີນທາງໄປຕ່າງປະເທດ. ທ່ານນາງແລະທະນາຍຄວາມ ໄດ້ປະຕິເສດວ່າທາງສານບໍ່ເຄີຍແຈ້ງໃຫ້ທ່ານນາງສີທາຊາບກ່ຽວກັບຂໍ້ຈຳກັດຕ່າງໆ.
ທ່ານເນດ ໄພຣສ໌ ໂຄສົກກະຊວງການຕ່າງປະເທດສະຫະລັດກ່າວວ່າ “ພວກເຮົາຍັງສືບຕໍ່ຮຽກຮ້ອງໃຫ້ລັດຖະບານກຳປູເຈຍປະຕິບັດຕາມພັນທະແລະຄວາມໝັ້ນໝາຍຂອງຕົນ ແລະໃຫ້ການໄກ່ເກ່ຍເພື່ອຫາທາງແກ້ໄຂບັນຫາຂັດແຍ້ງລະຫວ່າງບໍລິສັດ NagaWorld ແລະສະຫະພັນກຳມະບານທີ່ຕາງໜ້າໃຫ້ແກ່ພວກຄົນງານທີ່ຖືກປົດ.”
ປະຊາຊົນໃນກຳປູເຈຍ ກໍເຊັ່ນດຽວກັນກັບປະຊາຊົນຢູ່ໃນແຫ່ງອື່ນໆ ຕ້ອງໄດ້ຮັບອະນຸຍາດໃຫ້ຊົມໃຊ້ສິດທິມະນຸດຂອງພວກເຂົາເຈົ້າ ໂດຍປາສະຈາກຄວາມຢ້ານກົວວ່າລັດຖະບານຈະແກ້ແຄ້ນແລະປາບປາມເຂົາເຈົ້າ.