Այս տարվա թեման է՝ «Ընտրիր իրավունքների ուղին․ իմ առողջությունը իմ իրավունքն է»։ Սա հիշեցում է, որ յուրաքանչյուր ոք իրավունք ունի օգտվել իրեն անհրաժեշտ առողջապահական ծառայություններից՝ ներառյալ ՄԻԱՎ-ի կանխարգելումը, բուժումն ու խնամքը, երբ և որտեղ դրա կարիքը կլինի։ Այս իրավունքը պետք է հասանելի լինի բոլորին՝ անկախ նրանց ՄԻԱՎ կարգավիճակից, ծագումից, էթնիկ պատկանելությունից, սեռից կամ բնակության վայրից։
ՄԻԱՎ-ը սպանում է իր զոհերին՝ խաթարելով նրանց իմունային համակարգը: Երբ 36 տարի առաջ առաջին անգամ նշվեց ՁԻԱՀ-ի դեմ պայքարի համաշխարհային օրը, ՄԻԱՎ/ՁԻԱՀ-ի ախտորոշումը մահվան դատավճիռ էր, և հիվանդի կյանքի տևողությունը մոտ երկու տարի էր։ Սակայն այսօր` տեսանելի ապագայում ՁԻԱՀ-ից զերծ սերունդ ունենալու հնարավորության շեմին ենք։
Այդուհանդերձ, չնայած կանխարգելման և բուժման ոլորտում գրանցված հսկայական առաջընթացին, հասարակության մարգինալացված խմբերը շարունակում են մնալ ՄԻԱՎ-ով վարակվելու անհամաչափ բարձր ռիսկի տակ։ Բնակչության այդ խմբերի ներկայացուցիչները հաճախ ենթարկվում են պարսավանքի, խտրականության և բռնության, իսկ երբեմն նույնիսկ քրեական հետապնդման այնպիսի օրենքների շրջանակում, որոնք ուղղված են որոշակի մարգինալացված խմբերի դեմ, ինչպիսիք են սեռական ծառայություններ մատուցողները կամ նույնասեռական տղամարդիկ։
Սակայն ՄԻԱՎ/ՁԻԱՀ-ը՝ որպես հանրային առողջապահական սպառնալիք, հնարավոր չէ հաղթահարել՝ առանց հաշվի առնելու այս և այլ առանցքային խմբերի յուրահատուկ կարիքները։
Իր հերթին, Միացյալ Նահանգներում գործում է ՁԻԱՀ-ի դեմ պայքարի նախագահական արտակարգ ծրագիր (PEPFAR)։ 2003 թվականին մեկնարկելուց ի վեր ծրագիրը հաջողությամբ կրճատել է վարակի փոխանցման նոր դեպքերը, ընդլայնել թեստավորման հնարավորությունները և նախորդ երկու տասնամյակների ընթացքում փրկել ավելի քան 25 միլիոն կյանք շուրջ 50 գործընկեր երկրներում։ «PEPFAR-ը նպատակ ունի ձևավորել այնպիսի ապագա, որտեղ կկանխվի ՄԻԱՎ-ի յուրաքանչյուր վարակ, յուրաքանչյուր ոք կունենա բուժման հասանելիություն, և որտեղ յուրաքանչյուր սերունդ կարող է ապրել առանց խարանի, որը շատ հաճախ ուղեկցում է ՄԻԱՎ ունեցողին»,- նշված է նախագահ Ջո Բայդենը գրավոր ուղերձում։
«Մոտ ենք ՄԻԱՎ-ի փոխանցումը վերացնելուն։ Ունենք գիտություն։ Ունենք բուժման մեթոդներ։ Բայց ամենակարևորը՝ ունենք միմյանց»,- ասել է նա։
«Եկեք հարգենք այս հիվանդության պատճառով իրենց սիրելիներին կորցրած բոլոր ընտանիքների և ներկայում ՄԻԱՎ/ՁԻԱՀ-ով ապրող բոլոր մարդկանց հիշատակը։ Հիշենք ակտիվիստներին, գիտնականներին, բժիշկներին և հիվանդների խնամողներին, որոնք երբեք չեն հանձնվել ՄԻԱՎ/ՁԻԱՀ-ի համաճարակի դեմ պայքարում։ Վերահաստատե՛նք այս պայքարը միասին ավարտին հասցնելու մեր հանձնառությունը»։
Սույն խմբագրականն արտացոլում է Միացյալ Նահանգների կառավարության տեսակետը։