តទៅនេះ គឺជាបទវិចារណកថាដែលឆ្លុះបញ្ចាំងពីគោលនយោបាយរដ្ឋាភិបាលសហរដ្ឋអាមេរិក
លោក Adam Boehler ទីប្រឹក្សាជាន់ខ្ពស់សហរដ្ឋអាមេរិកថ្លែងថា៖ «គ្មានអ្វីសំខាន់សម្រាប់ប្រទេសនេះជាងឲ្យពលរដ្ឋគ្រប់រូបដឹងថា ប្រសិនបើអ្នកនៅបរទេសហើយអ្នកត្រូវគេចាប់ជាចំណាប់ខ្មាំងនោះ ប្រទេសនេះនៅតែគាំទ្រអ្នក។ លោកប្រធានាធិបតី Trump បានយកបញ្ហានេះជាអាទិភាពសំខាន់របស់លោក ហើយរដ្ឋបាលលោកនឹងធ្វើកិច្ចការនេះ។ លោកប្រធានាធិបតីបានធ្វើការបញ្ជាក់យ៉ាងច្បាស់ថា ការចាប់ពលរដ្ឋអាមេរិកាំង ឬពលរដ្ឋផ្សេងទៀតដោយខុសច្បាប់ គឺជាការមិនត្រឹមត្រូវ ហើយវានឹងត្រូវបានឆ្លើយតបយ៉ាងខ្លាំងក្លាបំផុត។ ដូច្នេះ ខ្ញុំជឿជាក់យ៉ាងប្រាកដថា សករាជថ្មីមួយកំពុងចាប់ផ្តើម គឺយើងនិយាយថា ការចាប់ពលរដ្ឋអាមេរិកាំងនៅបរទេសដោយខុសច្បាប់ គឺមិនអាចទទួលយកបានទេ»។
ក្នុងខែដំបូងនៃការកាន់តំណែងអាណត្តិទី២របស់លោកប្រធានាធិបតី Trump ចំណាប់ខ្មាំងសហរដ្ឋអាមេរិកចំនួន១១នាក់ ឬមនុស្សដែលត្រូវបានឃុំខ្លួនដោយខុសច្បាប់ត្រូវបានដោះលែង។
លោក Kash Patel នាយកការិយាល័យស៊ើបអង្កេតសហព័ន្ធ FBI របស់សហរដ្ឋអាមេរិកថា៖ «មិនមានទីភ្នាក់ងារតែមួយណា ដែលធ្វើកិច្ចការនេះសម្រេចទេ។ យើងនឹងធ្វើការជាមួយដៃគូរបស់យើងនៅក្នុងទីភ្នាក់ងារកណ្តាលស៊ើបការណ៍សម្ងាត់ CIA និងសហគមន៍ស៊ើបការណ៍សម្ងាត់។ ហើយយើងនឹងកម្ទេចចោលឧបសគ្គនយោបាយដែលរារាំងផ្លូវនេះ។ ខ្ញុំនឹងធ្វើអ្វីៗក្នុងឋានៈជានាយក FBI ដើម្បីត្រៀមធនធានសំខាន់ៗ ដើម្បីធ្វើឱ្យប្រាកដថា មិនមានក្រុមគ្រួសារអាមេរិកាំងផ្សេងទៀតមានអារម្មណ៍ឈឺចាប់ទៀត។ ប្រធានាធិបតីនេះខ្លាចធ្វើសកម្មភាពនៅពេលចាំបាច់ ហើយយើងនឹងគាំទ្រគ្រប់បែបយ៉ាងដល់លោកប្រធានាធិបតី។ លោកប្រធានាធិបតីនឹងបន្តជំរុញរហូតទាល់តែពលរដ្ឋអាមេរិកាំងទាំងអស់របស់យើងដែលស្លាប់ឬនៅរស់មានជីវិត វិលត្រឡប់មកកាន់ប្រទេសវិញ»៕
