តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកព្រួយបារម្ភថា សាធារណរដ្ឋប្រជាមានិតចិន កំពុងតែមិនចែករំលែកទិន្នន័យអំពីសុខមាលភាព និងការគ្រប់គ្រងដើមទឹកនៃទន្លេមេគង្គ ដែលចិនហៅថាទន្លេ Lancang។
អាងទន្លេមេគង្គលាតសន្ធឹងពីប្រទេសចិន និងហូរឆ្លងកាត់ប្រទេសមីយ៉ាន់ម៉ា កម្ពុជា ឡាវ ថៃ និងវៀតណាម រួចហូរចូលសមុទ្រចិនខាងត្បូង។ តំបន់នេះមានប្រជាជនជាង ៦០ លាននាក់រស់នៅ។
ពួកគេប្រមាណ ៨៥ ភាគរយ មានជីវភាពពឹងផ្អែកដោយផ្ទាល់លើទន្លេនេះ ជាពិសេសអ្នកដែលពឹងផ្អែកលើកសិកម្មស្រោចស្រព និងការនេសាទ។ នេះមានន័យថា រាល់ព្រឹត្តិការណ៍ដែលគេមិនអាចដឹងទុកជាមុនដែលបណ្តាលឱ្យមានការប្រែប្រួលលើលំហូរនៃទឹកទន្លេមេគង្គ នឹងអាចមានផលប៉ះពាល់យ៉ាងខ្លាំងដល់សន្តិសុខសេដ្ឋកិច្ច និងសុខមាលភាពរបស់ពលរដ្ឋរាប់លាននាក់នៅទូទាំងតំបន់នេះ។
ក្នុងពេលថ្មីៗនេះ ការប្រែប្រួលនៃកម្រិតទឹកទន្លេនៅតាមបណ្តោយខ្សែទឹកទន្លេមេគង្គក្រោម រួមជាមួយនឹងគ្រោះរាំងស្ងួតខ្លាំង បានបង្កឱ្យមានភាពមិនប្រាកដប្រជាយ៉ាងខ្លាំង ក្នុងចំណោមបណ្តាប្រទេសនៅតាមខ្សែទឹកខាងក្រោមនៃទនេ្លមេគង្គ។
រដ្ឋាភិបាលទីក្រុងប៉េកាំង កំពុងដំណើរការទំនប់វារីអគ្គិសនីចំនួន ១១ កន្លែង នៅតាមបណ្តោយទន្លេមេ និងដៃទន្លេមេគង្គក្នុងដែនដីរបស់ខ្លួន។ ទំនប់ទាំងនេះ បង្កផលប៉ះពាល់ដល់បរិមាណនិងគុណភាពទឹកទន្លេ ដែលហូរកាត់ប្រទេសនៅបណ្តោយខ្សែទឹកទន្លេមេគង្គក្រោម។
កាលពីខែសីហា ឆ្នាំមុន សាធារណរដ្ឋប្រជាមានិតចិន បានសន្យាផ្តល់ទិន្នន័យជលសាស្ត្រពេញមួយឆ្នាំដែលខ្លួនប្រមូលបាន នៅក្នុងកិច្ចប្រឹងប្រែងកាត់បន្ថយផលប៉ះពាល់នៃការប្រែប្រួលអាកាសធាតុ ទឹកជំនន់ និងគ្រោះរាំងស្ងួត។
ប៉ុន្តែនៅដើមឆ្នាំនេះ រដ្ឋាភិបាលទីក្រុងប៉េកាំង មិនបានជូនដំណឹងជាមុនអ្វីទាំងអស់ នៅពេលដែលកម្ពស់ទឹកទន្លេចាប់ផ្តើមប្រែប្រួលយ៉ាងខ្លាំង នៅភាគខាងត្បូងទំនប់ Jinghong របស់ចិន។ ហេតុនេះហើយទើបសហគមន៍នានាដែលនៅតាមបណ្តោយខ្សែទឹកខាងក្រោម មិនមានពេលគ្រប់គ្រាន់ដើម្បីត្រៀមខ្លួន ឬទប់ទល់នឹងកម្រិតទឹក ដែលពេលខ្លះបានស្រកដល់ ៥០ ភាគរយ តិចជាងកម្ពស់ទឹកធម្មតា។
សាធារណរដ្ឋប្រជាមានិតចិន មានការទទួលខុសត្រូវ ក្នុងការជូនដំណឹងដល់ប្រទេសនៅតាមបណ្តោយខ្សែទឹកខាងក្រោម អំពីស្ថានភាពប្រែប្រួល ឬសកម្មភាពនានា ដែលអាចប៉ះពាល់ដល់ទន្លេមេគង្គ។
លោក Ned Price អ្នកនាំពាក្យក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា៖ «សហរដ្ឋអាមេរិកគាំទ្រតម្លាភាពនិងគណនេយ្យភាពនៅក្នុងការគ្រប់គ្រងធនធានរួមឆ្លងព្រំដែន។ អស់ជាច្រើនទសវត្សរ៍មកហើយ យើងបានធ្វើកិច្ចការដោយផ្អែកលើគុណតម្លៃទាំងនេះ ដើម្បីលើកតម្កើងសុខមាលភាពនិងនិរន្តរភាពនៃទន្លេមេគង្គ និងប្រជាជនជិត ៧០ លាននាក់ដែលមានជីវភាពពឹងផ្អែកលើទន្លេនេះ»។
លោកបន្តថា៖ «យើងក៏មានក្តីបារម្ភ ដូចគ្នានឹងបណ្តារដ្ឋាភិបាលនៃប្រទេសតាមបណ្តោយទន្លេមេគង្គ និងគណៈកម្មការទន្លេមេគង្គ អំពីការប្រែប្រួលកម្ពស់ទឹកទន្លេយ៉ាងខ្លាំង នៅពេលថ្មីៗនេះ និងការធ្លាក់ចុះយ៉ាងខ្លាំងនៃកម្រិតទឹកទន្លេមេគង្គ។ យើងចូលរួមជាមួយរដ្ឋាភិបាលទាំងនេះក្នុងការអំពាវនាវឱ្យសាធារណរដ្ឋប្រជាមានិតចិន ចែករំលែកឱ្យបានទាន់ពេលនូវទិន្នន័យទឹកទន្លេចាំបាច់ រួមមានព័ត៌មានអំពីប្រតិបត្តិការរបស់ទំនប់នៅដើមទឹកទន្លេផងដែរ។ ប្រទេសចិនចាំបាច់ត្រូវតែគោរពឱ្យបានតាមការប្តេជ្ញារបស់ខ្លួន និងធ្វើការប្រឹក្សាជាមួយបណ្តាប្រទេសនៅបណ្តោយខ្សែទឹកខាងក្រោម»។
អ្នកនាំពាក្យក្រសួងការបរទេសលោក Ned Price បញ្ជាក់ថា៖ «សហរដ្ឋអាមេរិក តាមរយៈកម្មវិធីស្តីពីភាពជាដៃគូរវាងសហរដ្ឋអាមេរិកនិងតំបន់ទន្លេមេគង្គ នឹងបន្តគាំទ្ររដ្ឋាភិបាលនិងសហគមន៍មូលដ្ឋាននានានៅក្នុងតំបន់ទន្លេមេគង្គ»៕