តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
រដ្ឋបាលរបស់លោកប្រធានាធិបតី Biden និងលោកស្រីអនុប្រធានាធិបតី Harris បានកំណត់របៀបដោះស្រាយទូលំទូលាយមួយ និងមានការទាក់ទងនឹងផ្នែកជាច្រើនដើម្បីដោះស្រាយបុព្វហេតុដែលជាឫសគល់នៃចំណាកស្រុកមិនធម្មតា ឬការឆ្លងកាត់ព្រំដែនក្រៅប្រព័ន្ធច្បាប់ ក្រៅបទបញ្ញត្តិ ឬមិនធ្វើតាមកិច្ចព្រមព្រៀងនៃការឆ្លងកាត់ព្រំដែនអន្តរជាតិ។ របៀបដោះស្រាយនេះ ទាក់ទិននឹងការធ្វើការជាមួយរដ្ឋាភិបាលក្នុងតំបន់អាមេរិកកណ្តាល និងរដ្ឋាភិបាលជាដៃគូឯទៀតៗ សង្គមស៊ីវិល វិស័យឯកជន និងអង្គការអន្តរជាតិដើម្បីដោះស្រាយស្ថានភាពក្នុងតំបន់ដែលបានបណ្តាលឱ្យមានមនុស្សច្រើននាក់ ចាកចេញពីផ្ទះសំបែងពួកគេមកកាន់សហរដ្ឋអាមេរិក។
នៅក្នុងជំនួបទ្វេភាគីមួយតាមអនឡាញ កាលពីថ្ងៃទី២៦ ខែមេសា ជាមួយប្រធានាធិបតីប្រទេសក្វាតេម៉ាឡា លោក Alejandro Giammattei លោកស្រីអនុប្រធានាធិបតី Harris បានមានប្រសាសន៍ថា បញ្ហាមួយចំនួនមិនទាន់ត្រូវបានដោះស្រាយរួច ត្រូវបាននិយាយយោងជាញឹកញយថា ជាបុព្វហេតុដែលជាឫសគល់នៃចំណាកស្រុកមិនធម្មតា។ លោកស្រី Harris បានមានប្រសាសន៍ថា៖ «យើងពិនិត្យមើលបញ្ហានៃភាពក្រីក្រនិងការខ្វះខាតឱកាសសេដ្ឋកិច្ច បញ្ហាអាកាសធាតុអាក្រក់ខ្លាំង និងការខ្វះការសម្របសម្រួលខាងធាតុអាកាស បញ្ហាពុករលួយ និងការគ្មានអភិបាលកិច្ចល្អនិងអំពើហិង្សាប្រឆាំងនឹងស្ត្រី ក្រុមជនជាតិដើម មនុស្សក្នុងក្រុមមនុស្សស្រឡាញ់ភេទដូចគ្នា ឬ LGBTQ និងក្រុមអ្នកតពូជពង្សពីពួកជនជាតិអាហ្វ្រិក»។
លោកស្រីអនុប្រធានាធិបតី Harris បានមានប្រសាសន៍ទៀតថា «សហរដ្ឋអាមេរិកគ្រោងនឹងបង្កើនការជួយសង្គ្រោះដល់តំបន់ ពង្រឹងកិច្ចសហប្រតិបត្តិការរបស់យើងដើម្បីចាត់ចែងចំណាកស្រុកឱ្យមានប្រសិទ្ធភាព សន្តិសុខ និងមនុស្សធម៌»។
លោកស្រីបាននិយាយថា៖ «បន្ថែមលើការងារទ្វេភាគីរបស់យើង និងកិច្ចខិតខំប្រឹងប្រែងពហុភាគីរបស់យើង សហរដ្ឋអាមេរិក កំពុងកសាងយុទ្ធសាស្ត្រទូលំទូលាយមួយជាមួយស្ថាប័នអន្តរជាតិ សម្ព័ន្ធមិត្តនៅទូទាំងពិភពលោកដោយមានគ្រឹះនៅក្នុងសហរដ្ឋអាមេរិក និងវិស័យឯកជន និងអង្គការសហគមន៍ផងដែរ»។
លោកស្រីអនុប្រធានាធិបតី Harris បានប្រកាសនៅក្រោយជំនួបតាមអនឡាញនោះថា សហរដ្ឋអាមេរិកផ្តល់ជំនួយសង្គ្រោះខាងមនុស្សធម៌ និងខាងម្ហូបអាហារ៣១០លានដុល្លារថែមទៀត ដើម្បីបំពេញសេចក្តីត្រូវការជាបន្ទាន់។
នេះមានរួមបញ្ចូលជំនួយមនុស្សធម៌សម្រាប់ប្រជារាស្ត្រក្នុងប្រទេសអែលសាវ៉ាឌ័រ ក្វាតេម៉ាឡា ហុងឌូរ៉ាស និងតំបន់នោះ។ ជំនួយមនុស្សធម៌នេះ ផ្តល់ជំនួយម្ហូបអាហារគ្រាមានអាសន្ន ទីជម្រក ការថែទាំសុខភាព ការពិនិត្យរកមើលការខ្វះអាហារូបត្ថម្ភ ការលាងដៃ និងការផ្គត់ផ្គង់ឧបករណ៍អនាម័យ ការការពារ កម្មវិធីធ្វើឱ្យសេដ្ឋកិច្ចរើបឡើងវិញ និងការហ្វឹកហ្វឺនសម្រាប់មិនឱ្យមានភាពទ្រុឌទ្រោមនៅពេលមានមហន្តរាយ និងអាកាសធាតុអាក្រក់ក្នុងពេលអនាគត។
លោកស្រីអនុប្រធានាធិបតី Harris បានមានប្រសាសន៍ថា៖ «ផ្នែកមួយនៃស្មារតីនៅពីក្រោយការងារយើងគឺថា អឌ្ឍគោលខាងលិចជាកន្លែងរស់នៅរួមគ្នារបស់យើង ហើយយើងមានការទទួលខុសត្រូវក្នុងការទាក់ទងជាមួយប្រទេសជិតខាងយើងទាំងនេះ»។
លោកស្រីអនុប្រធានាធិបតី Harris បានមានប្រសាសន៍ថា៖ «ខ្ញុំមានជំនឿថា ដើម្បីឱ្យការងារនេះមានជោគជ័យ នឹងតម្រូវឱ្យមានការចូលរូមពីមនុស្សគ្រប់គ្នា។ ហើយខ្ញុំក៏មានជំនឿដែរថា វានឹងតម្រូវឱ្យមានឆន្ទៈនយោបាយ និងការធ្វើការច្រើនដើម្បីឱ្យបានសម្រេចគោលដៅរបស់យើង។ តែខ្ញុំមានទំនុកចិត្តថា យើងអាចធ្វើឱ្យមានការជឿនលឿន និងបង្កើតសេចក្តីសង្ឃឹមសម្រាប់ពេលអនាគត»៕