តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅថ្ងៃទី២៥ ខែសីហា ឆ្នាំ១៩៩១ ប្រទេសអ៊ុយក្រែនបានប្រកាសឯករាជ្យខ្លួនពីសហភាពសូវៀត។ អ្នកតំណាងសហរដ្ឋអាមេរិកនៅអ.ស.ប. លោកស្រី Linda Thomas-Greenfield បាននិយាយថា «នៅក្នុងសប្តាហ៍នោះដែរ អ៊ុយក្រែនបានប្រាប់អ.ស.ប.ថា ឯករាជ្យរបស់ខ្លួន ផ្អែកលើសិទ្ធិរបស់ប្រជាជាតិមួយក្នុងការធ្វើសេចក្តីសម្រេចចិត្តដោយខ្លួនឯងតាមធម្មនុញ្ញអ.ស.ប.»។
៣២ឆ្នាំបន្ទាប់មក អ៊ុយក្រែនប្រយុទ្ធនឹងសហព័ន្ធរុស្ស៊ីដែលកាន់អំណាចតពីសហភាពសូវៀត ដើម្បីរក្សាឯករាជ្យនិងកេរ្តិ៍មរតកវប្បធម៌របស់ផងខ្លួន។ លោកស្រីឯកអគ្គរដ្ឋទូត Thomas-Greenfield បានថ្លែងថា «សព្វថ្ងៃនេះ ការរស់រានឋិតថេររបស់អ៊ុយក្រែនឋិតនៅក្រោមការវាយប្រហារ»។
លោកស្រី Thomas-Greenfield បានមានប្រសាសន៍ថា «ជនជាតិអ៊ុយក្រែនបានប្រយុទ្ធដោយក្លាហានដើម្បីការពារអធិបតេយ្យភាពរបស់ប្រទេសពួកគេ។ ដើម្បីការពារសេរីភាពពួកគេ។ ដើម្បីការពារលទ្ធិប្រជាធិបតេយ្យនិងវប្បធម៌របស់ពួកគេ។ ហើយជនជាតិអ៊ុយក្រែនប្រយុទ្ធយ៉ាងក្លាហានដើម្បីការពារនិងធ្វើឱ្យមានការវិលត្រឡប់មកវិញនូវក្រុមកុមារអ៊ុយក្រែនដែលត្រូវបានផ្ទេរដោយបង្ខំឬត្រូវបានបញ្ជូនទៅកាន់ប្រទេសរុស្ស៊ី ប្រទេសបេឡារុស និងដែនដីកាន់កាប់ដោយរុស្ស៊ី»។
កុមារជាអនាគតរបស់ប្រទេស ហើយប្រទេសមួយដែលបាត់បង់កុមាររបស់ពួកគេគ្មានអនាគតទេ។ តាំងពីការលុកលុយនោះមក និងតាំងពីឆ្នាំ២០១៤ រដ្ឋាភិបាលអ៊ុយក្រែនស្ទង់ប្រមាណថា អាជ្ញាធររុស្ស៊ីបានបញ្ជូនដោយបង្ខិតបង្ខំពីផ្ទះសំបែងពួកគេនូវកុមារជាង១ម៉ឺន ៩ពាន់ ៥រយនាក់ «មានរួមទារកអាយុត្រឹមតែ៤ខែផងដែរ» នេះបើតាមប្រសាសន៍របស់លោកស្រីឯកអគ្គរដ្ឋទូត Thomas-Greenfield។
លោកស្រីបានមានប្រសាសន៍ថា «យុទ្ធនាការឃោរឃៅរបស់រុស្ស៊ីមានតទៅទៀតរហូតដល់ថ្ងៃនេះ។ រុស្ស៊ីនិងក្រុមអាយ៉ងរបស់ខ្លួនបានឃាត់ខ្លួនកុមារដែលរត់គេចខ្លួនពីអំពើហិង្សា។ ពួកគេបានបង្ខំកុមារឱ្យចេញពីសាលារៀននិងកន្លែងក្មេងកំព្រា។ ហើយក្រុមអាយ៉ងរុស្ស៊ីក្នុងមូលដ្ឋានបានបោកបញ្ឆោត ឬបង្ខិតបង្ខំឳពុកម្តាយឱ្យបញ្ជូនកូនពួកគេទៅកាន់អ្វីដែលហៅថា «ជំរំរដូវក្តៅ» ហើយបានកាត់ផ្តាច់គមនាគមន៍ ហើយប្រកែកមិនឱ្យកុមារទាំងនោះត្រឡប់មកផ្ទះពួកគេវិញទេ»។
លោកស្រីឯកអគ្គរដ្ឋទូត Thomas-Greenfield បាននិយាយថា ក្រុមកុមារដែលត្រូវចាប់ពង្រត់ទាំងនេះ«បានទទួលការឃោសនា ការលាងខួរ និងការហ្វឹកហ្វឺនយោធា។ កុមារខ្លះត្រូវបានបង្ខំឱ្យទទួលយកសញ្ជាតិរុស្ស៊ី និងខ្លះទៀតត្រូវបានរាយការណ៍ថា ត្រូវយកធ្វើជាកូនចិញ្ចឹមដោយគ្រួសាររុស្ស៊ីផងដែរ»។
ពួកមន្ត្រីរុស្ស៊ីនិយាយអះអាងថា ពួកគេបានធ្វើ«ការជម្លៀសមនុស្សធម៌»។ លោកស្រី Thomas-Greenfield បានពោលថា «តែនេះជាការកែប្រែបំភ្លៃពីការពិត និងជាការប៉ុនប៉ងដែលអត់ប្រយោជន៍ដើម្បីធ្វើអ្វីដែលមិនត្រឹមត្រូវឱ្យក្លាយទៅជាត្រឹមត្រូវវិញ»។
លោកស្រី Thomas-Greenfield បានមានប្រសាសន៍ថា «ហើយចូរនិយាយឱ្យច្បាស់លាស់ថា អំពើឃោរឃៅទាំងនេះត្រូវបានសម្របសម្រួលដោយរដ្ឋាភិបាលរុស្ស៊ីគ្រប់ជាន់ថ្នាក់ តាំងពីថ្នាក់ក្រោមដល់ថ្នាក់កំពូល។ តុលាការឧក្រិដ្ឋកម្មអន្តរជាតិបានចេញដីកាចាប់ខ្លួនប្រធានាធិបតី Vladimir Putin និងអ្នកស្រី Maria Lvova-Belova ស្នងការប្រធានាធិបតីរុស្ស៊ីខាងសិទ្ធិកុមារដោយសារបានបញ្ជូន និងផ្ទេរក្រុមកុមារពីតំបន់ត្រូវកាន់កាប់នៃប្រទេសអ៊ុយក្រែន»។
លោកស្រីឯកអគ្គរដ្ឋទូត Thomas-Greenfield បាននិយាយថា «យើងត្រូវតែឱ្យរុស្ស៊ីទទួលខុសត្រូវ។ យើងត្រូវតែលើកតម្កើងអង្គការដែលធ្វើការងារបានល្អក្នុងការធ្វើឱ្យកុមារទាំងនេះវិលត្រឡប់ទៅជួបជុំគ្នាជាមួយគ្រួសារពួកគេដែរ។ ហើយយើងត្រូវតែអំពាវនាវដល់រុស្ស៊ីឱ្យបញ្ឈប់សង្គ្រាមឈ្លានពានដ៏ឃោរឃៅរបស់ខ្លួន គោរពតាមកាតព្វកិច្ចខ្លួនតាមរយៈច្បាប់អន្តរជាតិ ហើយបញ្ជូនកុមារអ៊ុយក្រែនទាំងអស់ជាបន្ទាន់ទៅគ្រួសារពួកគេវិញ»៕