តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ប្រទេសនីហ្សារីយ៉ានិងសហរដ្ឋអាមេរិក បានធ្វើជាដៃគូនឹងគ្នាជាច្រើនឆ្នាំមកហើយ ដើម្បីកែលម្អប្រព័ន្ធថែទាំសុខភាព។ លោករដ្ឋមន្ត្រីការបរទេសសហរដ្ឋអាមេរិក Antony Blinken បានមានប្រសាសន៍កាលពីខែមេសាថា៖ «ការធ្វើការរួមគ្នារបស់យើងបានផ្តល់ប្រយោជន៍ដល់ប្រជារាស្ត្រនីហ្សេរីយ៉ាជាង៦០លាននាក់ តាមរយៈកម្មវិធីនានា ដូចជាកម្មវិធីបណ្តុះបណ្តាលក្រុមបុគ្គលិកសុខភាពសាធារណៈ វិនិយោគនៅតាមមណ្ឌលសុខភាព និងធ្វើឲ្យប្រសើរជាងមុននូវការទទួលបានថ្នាំពេទ្យ វ៉ាក់សាំង និងផ្នែកសុខភាពបន្តពូជ»។
ថ្លែងនៅក្នុងពិធីភាពជាដៃគូខាងសុខភាពរវាងសហរដ្ឋអាមេរិនិងប្រទេសនីហ្សេរីយ៉ាដែលបានធ្វើឡើងតាមអនឡាញ លោករដ្ឋមន្ត្រី Blinken បានកត់សម្គាល់ថា៖ «មនុស្សជាង១លាន ៣សែននាក់ ដែលមានផ្ទុកវីរុស HIV កំពុងទទួលការព្យាបាលស្រោចស្រង់ជីវិតតាមរយៈកម្មវិធី PEPFAR ដែលឧបត្ថម្ភដោយសហរដ្ឋអាមេរិក ជាកម្មវិធីប្រយុទ្ធប្រឆាំងនឹងជំងឺអេដស៍នៅទូទាំងពិភពលោក»។
លោក Blinken បានថ្លែងក្នុងសម្តីដើមថា៖ «នេះជាសមិទ្ធិផលដ៏ធំមួយ ដែលកម្មវិធីនេះឈានទៅជិតគ្រប់គ្រងការឆ្លងជំងឺនេះបានយ៉ាងលឿនក្នុងរយៈពេលពីរឆ្នាំខាងមុខនេះ។ គម្រោងផ្តួចផ្តើមរបស់ប្រធានាធិបតីសហរដ្ឋអាមេរិកប្រយុទ្ធប្រឆាំងនឹងជំងឺគ្រុនចាញ់ បានផ្តល់ថវិកាដើម្បីទិញមុងជ្រលក់ថ្នាំ ចំនួន៦០លានមុង និងផ្តល់ការព្យាបាលស្រោចស្រង់ជីវិតមនុស្ស១៣០លាននាក់ ដែលការណ៍នេះ បានជួយកាត់បន្ថយការស្លាប់ដោយជំងឺគ្រុនចាញ់ជាងពាក់កណ្តាល កាលពីទសវត្សរ៍មុននេះ។ នេះជាសមិទ្ធិផលដ៏អស្ចារ្យមួយ។ កាលពីឆ្នាំទៅមិញ អង្គការសុខភាពពិភពលោក WHO បានប្រកាសជាផ្លូវការថា ប្រទេសនីហ្សេរីយ៉ាគ្មានជំងឺគ្រុនស្វិតដៃជើងទៀតទេ។ នេះជាសមិទ្ធិផលល្អបំផុតសម្រេចឡើងដោយក្រុមអ្នកធ្វើការជួរមុខ ដែលធ្វើការមិនគិតពីការនឿយហត់ ជាអ្នកដែលសហរដ្ឋអាមេរិកមានមោទនភាពបំផុតក្នុងការគាំទ្រតាមរយៈគម្រោងផ្តួចផ្តើមសាកលលុបបំបាត់ជំងឺគុ្រនស្វិតដៃជើង»។
នៅពេលនេះ ទាំងសហរដ្ឋអាមេរិកនិងប្រទេសនីហ្សេរីយ៉ា ក៏ដូចជាពិភពលោកទាំងមូលកំពុងប្រឈមនឹងការរាតត្បាតនៃជំងឺកូវីដ១៩។ លោករដ្ឋមន្ត្រី Blinken បានប្រកាសថា៖ «សហរដ្ឋអាមេរិក ប្តេជ្ញាជួយបញ្ចប់ការរាតត្បាតនេះក្នុងប្រទេស នីហ្សេរីយ៉ា និងនៅគ្រប់កន្លែងផ្សេងទៀត»។ លោកបានប្រកាសយ៉ាងដូច្នេះថា៖
«យើងបានផ្តល់វិភាគទាន២ពាន់លានដុល្លារដល់កម្មវិធី COVAX ដែលជាកម្មវិធីផ្តួចផ្តើមចែកចាយវ៉ាក់សាំងកូវីដនៅទូទាំងសាកលលោក។ យើងបានសន្យាថា នឹងផ្តល់ប្រាក់២ពាន់លានដុល្លារថែមទៀតនៅរវាងពេលនេះ និងឆ្នាំ២០២២ នៅពេលណាដែលប្រទេសឯទៀតៗ បង្កើនការធ្វើវិភាគទានរបស់ពួកគេ។ ខ្ញុំពេញចិត្តណាស់ដែលដឹងថា វ៉ាក់សាំងកូវីដ១៩ដែលផ្តល់ដោយកម្មវិធី COVAX បានដឹកជញ្ជូនទៅដល់ប្រទេសនីហេ្សរីយ៉ាហើយ»។
សហរដ្ឋអាមេរិកនិងប្រទេសនីហ្សេរីយ៉ា បានធ្វើកិច្ចសហប្រតិបត្តិការជាមួយគ្នាប្រយុទ្ធប្រឆាំងរោគរាតត្បាត ចាត់វិធានការឆ្លើយតបនឹងការផ្ទុះរាលដាលជំងឺ ប្រតិបត្តិការក្នុងមន្ទីរពិសោធន៍ និងការបញ្ជូនវ៉ាក់សាំង។ លោករដ្ឋមន្ត្រី Blinken បានមានប្រសាសន៍ថា នេះជាការបន្តការបណ្តាក់ទុនរបស់យើងចំនួន៥ពាន់លានដុល្លារក្នុងភាពជាដៃគូជាច្រើនទសវត្សរ៍របស់យើងក្នុងវិស័យសុខភាពសាធារណៈ ហើយវាក៏ជាសក្ខីភាពនៃទំនាក់ទំនងរឹងមាំ និងមានការគោរពដែលយើងបានកសាងជាច្រើនឆ្នាំរវាងប្រទេសយើងទាំងពីរ និងរវាងប្រជារាស្ត្រនីហ្សេរីយ៉ា និងពលរដ្ឋអាមេរិកាំង»។
លោករដ្ឋមន្ត្រី Blinken បានប្រកាសថា៖ «ក្នុងពេលច្រើនខែនិងច្រើនឆ្នាំខាងមុខ លទ្ធភាពរបស់យើងក្នុងការសហការគ្នាដើម្បីកែលម្អប្រព័ន្ធសុខភាពសម្រាប់ពលរដ្ឋនីហ្សេរីយ៉ាទាំងអស់ នឹងមានសារៈសំខាន់ខ្លាំងណាស់។ ខ្ញុំសូមសម្តែងការដឹងគុណដល់លោកអ្នកទាំងអស់គ្នានិងមានមោទនភាពបំផុតសម្រាប់សហរដ្ឋអាមេរិក ចំពោះភាពជាដៃគូខាងសុខភាពជាមួយប្រទេសនីហ្សេរីយ៉ា»៕