តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
លោក កឹម សុខា គឺជាមេដឹកនាំនយោបាយកម្ពុជាដែលមានការគោរពស្រឡាញ់ ត្រូវបានកាត់ទោសនាពេលថ្មីៗនេះឱ្យជាប់ឃុំក្នុងផ្ទះរយ:ពេល២៧ឆ្នាំ។ អតីតមេដឹកនាំគណបក្សសង្គ្រោះជាតិរូបនេះ ត្រូវបានផ្តន្ទាទោសពីបទសន្ទិដ្ឋិភាព ឬការឃុបឃិតជាមួយសហរដ្ឋអាមេរិក ដើម្បីផ្តួលរំលំលោកនាយករដ្ឋមន្ត្រី ហ៊ុន សែន។ លោក កឹម សុខា ដែលបានបដិសេធការចោទប្រកាន់ទាំងនោះ ត្រូវបានហាមប្រាមមិនឱ្យឈរឈ្មោះ ឬបោះឆ្នោតឡើយ។
អ្នកនាំពាក្យក្រសួងការបរទេសអាមេរិកលោក Ned Price និយាយថា សហរដ្ឋអាមេរិកមានការរំខានចិត្តជាខ្លាំង ដោយសារការកាត់ក្តីសំណុំរឿងលោក កឹម សុខា។ លោក Price ថ្លែងថា៖
«ការបំបិទសំឡេងលោក កឹម សុខា អស់ពេលជាច្រើនឆ្នាំកន្លងទៅ ដោយផ្អែកលើការចោទប្រកាន់ដែលមានហេតុផលនយោបាយ គឺជារឿងមិនត្រឹមត្រូវ និងធ្វើឱ្យខូចគោលជំហររបស់ព្រះរាជាណាចក្រកម្ពុជានៅក្នុងសហគមន៍អន្តរជាតិយ៉ាងធ្ងន់ធ្ងរ។ សហរដ្ឋអាមេរិក សូមអំពាវនាវដោយទទូចដល់រដ្ឋាភិបាលកម្ពុជា ឱ្យគោរពសិទ្ធិមនុស្សនិងសេរីភាពជាមូលដ្ឋានរបស់លោក កឹម សុខា ក៏ដូចពលរដ្ឋកម្ពុជាទាំងអស់»។
លោក Price បន្តទៀតថា៖ «ការកាត់ទោសលោក កឹម សុខា គឺជាផ្នែកមួយនៃគំរូដ៏ធំនៃការគំរាមកំហែង ការធ្វើទុក្ខបុម្នេញ និងសកម្មភាពមិនអាចទទួលយកបានដទៃទៀតដែលប្រព្រឹត្តិឡើងដោយក្រុមអាជ្ញាធរកម្ពុជា ដែលតម្រង់ឆ្ពោះទៅលើមេដឹកនាំនយោបាយបក្សប្រឆាំង សារព័ត៌មាន និងសង្គមស៊ីវិល»។
ក្នុងឆ្នាំ២០១៧ គណបក្សសង្គ្រោះជាតិត្រូវបានតុលាការកំពូលកម្ពុជារំលាយ ក្រោយការចាប់ខ្លួនលោក កឹម សុខា រយ:ពេល២ខែ។ គណបក្យប្រជាជនកម្ពុជាដែលដឹកនាំដោយលោក នាយករដ្ឋមន្ត្រី ហ៊ុន សែន បានឈ្នះអាសនៈសភាទាំង១២៥ និងបានធ្វើឱ្យកម្ពុជាក្លាយជារដ្ឋឯកបក្ស។ បន្ថែមលើនេះទៀត មានអ្នកនយោបាយយ៉ាងហោចណាស់ក៏៣៩នាក់ដែរ កំពុងជាប់ពន្ធនាគារក្នុងប្រទេសកម្ពុជា។ នេះបើយោងលើអង្គការសិទ្ធិមនុស្ស Amnesty International ឬហៅជាភាសាខ្មែរថា អង្គការលើកលែងទោសអន្តរជាតិ។
ការចោទប្រកាន់និងកាត់ទោសបុគ្គលនានាក្នុងប្រទេសកម្ពុជា ដូចជាលោក កឹម សុខា និងអ្នកនយោបាយផ្សេងៗទៀតដោយការអនុវត្តសេរីភាពនៃការបញ្ចេញមតិនិងសិទ្ធិប្រមូលផ្តុំរបស់គេ បានធ្វើឱ្យប៉ះពាល់ដល់រដ្ឋធម្មនុញកម្ពុជា ប៉ះពាល់ដល់កាតព្វកិច្ចអន្តរជាតិ និងការរីកចម្រើនក្នុងពេលកន្លងទៅ ដើម្បីអភិវឌ្ឍ ឲ្យកម្ពុជាក្លាយជាសង្គមដែលមានសន្តិភាព សេរីពហុបក្ស និងប្រកបដោយបរិយាប័ន្ន។
លោក Price អ្នកនាំពាក្យក្រសួងការបរទេសបាន «ទទូចដល់អាជ្ញាធរកម្ពុជាឱ្យធានាដល់ពលរដ្ឋរបស់ខ្លួន ក្នុងការអនុវត្តសិទ្ធិមនុស្ស ដែលរួមមានសេរីភាពនៃការបញ្ចេញមតិនិងការជួបជុំដោយសន្តិវិធី និងលើទឹកចិត្តដល់ពលរដ្ឋកម្ពុជា ដើម្បីអាចចូលរួមក្នុងការកសាងប្រព័ន្ធប្រជាធិបតេយ្យមួយដ៏ពិតប្រាកដ»៕