តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ក្រោយពីការសម្លាប់រង្គាលជនជាតិអ៊ីស្រាអែលដោយពួកហាម៉ាស់ រដ្ឋមន្ត្រីការបរទេសសហរដ្ឋអាមេរិក លោក Antony Blinken បានធ្វើដំណើរទៅតំបន់មជ្ឈឹមបូព៌ា។ លោកបានចាប់ផ្តើមដំណើរទស្សនកិច្ចរបស់លោកក្នុងប្រទេសអ៊ីស្រាអែល ហើយបន្ទាប់មកលោកបានធ្វើដំណើរទៅប្រទេសហ្ស៊កដានី បារ៉េន កាតា អេមីរ៉ាតអារ៉ាប់រួម អារ៉ាប៊ីសាអ៊ូឌីតនិងប្រទេសអេហ្ស៊ីប។ លោកបាននិយាយថា «យើងមកទីនេះជាមួយគោលដៅបួន»។
លោកបានមានប្រសាសន៍ថា «ដើម្បីធ្វើឱ្យប្រាកដថា សហរដ្ឋអាមេរិកឈរជាមួយប្រទេសអ៊ីស្រាអែល ដើម្បីបញ្ចៀសកុំឱ្យជម្លោះនេះរាលដាលទៅកាន់កន្លែងឯទៀតៗ ដើម្បីធ្វើការឱ្យមានការដោះលែងក្រុមចំណាប់ខ្មាំង មានរួមទាំងពលរដ្ឋអាមេរិកាំងផង និងដើម្បីដោះស្រាយវិបត្តិមនុស្សធម៌ដែលមាននៅតំបន់ Gaza»។
លោករដ្ឋមន្ត្រី Blinken បាននិយាយថា «មានទស្សនៈវិស័យពីរខុសគ្នាខ្លាំងណាស់អំពីអនាគតនិងអ្វីដែលតំបន់មជ្ឈឹមបូព៌ាអាចជានិងគួរជា»។ លោកបានថ្លែងថា «មានទស្សនៈវិស័យមួយដែលយើងប្រកាន់យកខ្លាំងណាស់គឺថា ប្រទេសនានាក្នុងតំបន់នោះធ្វើឱ្យមានទំនាក់ទំនងគ្នាជាធម្មតាប្រក្រតី ធ្វើការជាមួយគ្នាក្នុងគោលបំណងតែមួយដូចគ្នា និងការពារសិទ្ធិនិងសេចក្តីប៉ងប្រាថ្នារបស់ពលរដ្ឋប៉ាឡេស្ទីន»។
លោករដ្ឋមន្ត្រី Blinken បានថ្លែងថា «មានទស្សនៈវិស័យមួយទៀតដែលពួកហាម៉ាស់បានបង្ហាញក្នុងវិធីដ៍សែនរន្ធត់បំផុត និងគឺជាទស្សនៈវិស័យមួយនៃការស្លាប់
នៃការបំផ្លិចបំផ្លាញ នៃការបដិវត្តនៃភេរវកម្ម»។
លោក Blinken បានមានប្រសាសន៍ថា «នេះជាទស្សនៈវិស័យមួយដែលមិនបានធ្វើអ្វីដើម្បីជំរុញការប៉ងប្រាថ្នារបស់ជនជាតិប៉ាឡេស្ទីនទេ ដែលមិនធ្វើអ្វីដើម្បីធ្វើឱ្យមានអនាគតល្អប្រសើរជាងមុនសម្រាប់ប្រជារាស្ត្រក្នុងតំបន់ ហើយធ្វើអ្វីៗទាំងអស់ដើម្បីនាំភាពខ្មៅងងឹតទាំងស្រុងសម្រាប់ជនទាំងអស់ដែលវាអាចមានផលប៉ះពាល់បាន...ហើយខ្ញុំគ្មានការសង្ស័យទេអំពីមាគារណាដែលមនុស្សច្រើនលើសលប់ក្នុងតំបន់នឹងជ្រើសរើសយកនិងប្រកាន់យកប្រសិនពួកគេមានឱកាសផ្តល់ឱ្យ»។
លោករដ្ឋមន្ត្រី Blinken បានមានប្រសាសន៍ថា «ជនស៊ីវីលមិនគួរត្រូវរងគ្រោះដោយសារអំពើឃោរឃៅរបស់ពួកហាម៉ាស់ទេ។ នៅពេលនេះ យើងទាក់ទងយ៉ាងសកម្មជាមួយបណ្តាប្រទេសក្នុងតំបន់ ជាមួយអ.ស.ប. ជាមួយប្រទេសអ៊ីស្រាអែលដើម្បីធ្វើឱ្យប្រាកដប្រជាតាមសមត្ថភាពរបស់យើង ដើម្បីមិនឱ្យប្រជារាស្ត្ររងទុក្ខវេទនា ហើយធ្វើឱ្យជំនួយដែលពួកគេត្រូវការ គឺស្បៀងអាហារ ទឹក ឱសថអាចដឹកជញ្ជូនចូលក្នុងតំបន់នោះបាន»។ លោករដ្ឋមន្ត្រី Blinken បានមានប្រសាសន៍ថាដើម្បីធ្វើការនេះបាន ក្រុង Rafah ដែលជាចំណុចខាងត្បូងបំផុតសម្រាប់ចេញពីតំបន់ Gaza ចូលក្នុងឧបទ្វីប Sinai នៃប្រទេសអេហ្ស៊ីប«នឹងត្រួវបើកជាថ្មី»។
លោករដ្ឋមន្ត្រី Blinken បាននិយាយថា «នេះជាពេលពិបាកនិងមានឧបសគ្គ តែមានការប្តេជ្ញាមួយ...ដើម្បីពុះពារពេលវេលាពិបាក និងមានឧបសគ្គនេះនិងធ្វើការជាមួយគ្នា»៕