តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ស.រ.អ.ជាប្រទេសដំបូងគេដែលបានទទួលស្គាល់ឯករាជ្យនៃប្រទេសកាហ្សាក់ស្ថាន។ តាំងពីពេលនោះមក ស.រ.អ. បានប្តេជ្ញាមាំទាំដល់អធិបតេយ្យភាព បូរណភាពដែនដី និងឯករាជ្យនៃប្រទេសកាហ្សាក់ស្ថាន និងប្រទេសនៅទូទាំងតំបន់នោះ។ នៅក្នុងដំណើរទស្សនកិច្ចកាលពីពេលថ្មីៗនេះរបស់លោកដើម្បីចូលរួមក្នុងការប្រជុំរដ្ឋមន្ត្រីនៃក្រុមប្រទេស C5+1 ក្នុងក្រុងអាស្តាណា រដ្ឋមន្ត្រីការបរទេសស.រ.អ.លោក Antony Blinken បានបញ្ជាក់ជាថ្មីអំពីការគាំទ្រគ្មានងាករេរបស់ស.រ.អ.ដល់ប្រទេសកាហ្សាក់ស្ថានក្នុងការសម្រេចចិត្តដោយសេរីអំពីអនាគតរបស់ផងខ្លួន។
លោករដ្ឋមន្ត្រី Blinken បានបញ្ជាក់ជាថ្មីអំពីការគាំទ្ររបស់លោកដល់ការអនុវត្តពេញលេញចំពោះរបៀបវារៈកែទម្រង់របស់ប្រធានាធិបតីកាហ្សាក់ស្ថានលោក Kassym-Jomart Tokayev ដែលត្រូវបានប្រកាសពីខែមីនា ឆ្នាំមុន។
លោក Blinken បាននិយាយថា៖ «យើងរង់ចាំមើលវិធានការជាជំហ៊ានបន្ថែមទៀតដែលប្រទេសកាហ្សាក់ស្ថាននឹងទទួលស្គាល់របៀបវារៈនេះគឺការពង្រីកការចូលរួមជាសាធារណៈក្នុងដំណើរការនយោបាយ បង្កើនការទទួលខុសត្រូវខ្ពស់របស់រដ្ឋាភិបាល បង្ក្រាបអំពើពុករលួយ និងដាក់ឱ្យមានការកម្រិតអាណត្តិប្រធានាធិបតីនិងការពារសិទ្ធិមនុស្ស។ កំណែទម្រង់ទាំងនោះជាហេតុផលសំខាន់មួយនាំឱ្យពួកអ្នកបណ្តាក់ទុនបរទេស មានរួមទាំងពួកអ្នកវិនិយោគមកពីស.រ.អ.ផងដែរ ងាកទៅប្រកបអាជីវកម្មច្រើនជាងមុននៅកាហ្សាក់ស្ថាន។ ក្រុមពាណិជ្ជករអាមេរិកាំងស្ថិតក្នុងចំណោមអ្នកធុរកិច្ចដំបូងៗដែលបណ្តាក់ទុននៅទីនេះ ដោយបានដាក់ទុនជាង ៥០ ពាន់លានដុល្លារក្នុងសេដ្ឋកិច្ចកាហ្សាក់ស្ថានតាំងពីឆ្នាំ ១៩៩១ មក»។
ប្រទេសកាហ្សាក់ស្ថាននៅតែជាដៃគូមានតម្លៃមួយក្នុងការកាត់បន្ថយការរីកសាយអាវុធនុយក្លេអ៊ែរដោយបានកម្ចាត់មីស៊ីលសម័យសហភាពសូវៀត និងបានចូលរួមក្នុងកិច្ចប្រតិបត្តិការថែរក្សាសន្តិភាពពីប្រទេសលីបង់រហូតដល់ប្រទេសម៉ាលី ហើយបានរុករកកញ្ចុំផ្កាយតាមរយៈកិច្ចសហការក្នុងដែនអវកាសនិងបានស្តារនីតិសម្បទាក្រុមយុទ្ធជនភេរវករបរទេសនិងគ្រួសារពួកគេជាង៦រយនាក់។
ស.រ.អ.បានបង្ហាញការប្តេជ្ញារបស់ខ្លួនដល់ការលូតលាស់សេដ្ឋកិច្ចនិងការអភិវឌ្ឍក្នុងតំបន់អាស៊ីកណ្តាល។ តាំងពីខែមិថុនាឆ្នាំ២០២២មក ស.រ.អ.បានសន្យាផ្តល់ប្រាក់ ១៦,៥ លានដុល្លារដល់សន្តិសុខស្បៀងក្នុងតំបន់នេះ។ ស.រ.អ.ក៏បានបង្កើតកម្មវិធីផ្តើមគំនិតខាងភាពធន់សេដ្ឋកិច្ចសម្រាប់អាស៊ីកណ្តាល ដោយបានផ្តល់ប្រាក់ ២៥ លានដុល្លារដើម្បីពង្រីកផ្លូវពាណិជ្ជកម្មក្នុងតំបន់ បង្កើតទីផ្សារនាំចេញថ្មីៗ ទាក់ទាញការបណ្តាក់ទុនឯកជនច្រើនជាងមុន និងផ្តល់ជូនពលរដ្ឋនូវមុខជំនាញជាក់ស្តែងនានាសម្រាប់ទីផ្សារការងារទំនើប។
នៅក្នុងទស្សនកិច្ចដដែលលោករដ្ឋមន្ត្រី Blinken បានប្រកាសអំពីជំនួយថែមទៀតសម្រាប់តំបន់នោះ។ លោកបាននិយាយថា៖
«ខ្ញុំសូមប្រកាសអំពីការផ្តល់ប្រាក់បន្ថែមចំនួន ២៥ លានដុល្លារទៀតដល់ការផ្តើមគំនិតនេះគឺមានទាំងអស់ ៥០ លានដុល្លារដើម្បីកសាងសេដ្ឋកិច្ចក្នុងតំបន់ និងជាពិសេស ដើម្បីធ្វើឱ្យប្រាកដថា ប្រជារាស្ត្រមានមុខជំនាញដែលពួកគេត្រូវការសម្រាប់ធ្វើឱ្យមានជោគជ័យក្នុងសេដ្ឋកិច្ចសាកលនេះ។ ដើម្បីផ្តល់អំណាចថែមទៀតនិងភ្ជាប់ទំនាក់ទំនងជាមួយប្រជារាស្ត្រក្នុងតំបន់អាស៊ីកណ្តាល យើងចាប់ផ្តើមការប្រឹងប្រែងមួយដើម្បីបង្កើនការប៉ិនប្រសប់ខាងភាសាអង់គ្លេសសម្រាប់ពួកអ្នកមានអាជីពវ័យក្មេងជាង១ពាន់នាក់ក្នុងរដ្ឋាភិបាល និងសង្គមស៊ីវិលទាំងអស់»។
ស.រ.អ. ប្រទេសកាហ្សាក់ស្ថាន សាធារណរដ្ឋកៀហ្សីស៊ីស្ថាន ប្រទេសតាហ្សីគីស្ថាន តួកម៉េនីស្ថាន និងប្រទេសអ៊ូបេគីស្ថានប្តេជ្ញាជំរុញឱ្យបានសម្រេចគោលដៅរីកចម្រើនដូចគ្នាខាងសេដ្ឋកិច្ច ថាមពល បរិដ្ឋាន និងខាងសន្តិសុខ៕