តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
កាលពីខែមីនា សន្និសីទកំពូលទីពីរអំពីលទ្ធិប្រជាធិបតេយ្យបើកប្រជុំតាមវីដេអូនិងដោយមានការចូលរួមដោយផ្ទាល់ក្នុងរដ្ឋធានីវ៉ាស៊ីនតោននិងក្រុងឯទៀតៗ ដោយមានមេដឹកនាំនិងក្រុមអ្នកតំណាងនៃប្រទេសជាង១០០ ព្រមទាំងអ្នកតំណាងពីដៃគូមកពីសង្គមស៊ីវិលនិងវិស័យឯកជន។
នៅក្នុងសុន្ទរកថាបិទសន្និសីទកំពូលនេះ រដ្ឋមន្ត្រីការបរទេសស.រ.អ. លោក Antony Blinken បានកត់សម្គាល់ថា ពិភពលោកបានឋិតនៅត្រង់ចំណុចមួយទាក់ទិននឹងអនាគតនៃលទ្ធិប្រជាធិបតេយ្យ ដែលអាស្រ័យថា «តើយើងចង់ធ្វើអ្វីៗគ្រប់យ៉ាងដើម្បីធ្វើឱ្យប្រាកដថា ប្រជារាស្ត្រត្រូវតែបន្តទទួលបានលទ្ធិប្រជាធិបតេយ្យ ឬយ៉ាងណា»។
លោកបានថ្លែងថា ក្នុងការធ្វើសកម្មភាពពេញមួយឆ្នាំមុននេះតាំងពីមានការប្រជុំសន្និសីទកំពូលទីមួយអំពីលទ្ធិប្រជាធិបតេយ្យ «ក្រុមនេះបានឆ្លើយនឹងសំណួរនេះយ៉ាងច្បាស់លាស់ថា បាទ... យើងបានធ្វើ -ហើយយើងបានធ្វើការប្តេជ្ញាជាង៧០០ដែលជួយយើងការពារនិងពង្រឹងគុណតម្លៃប្រជាធិបតេយ្យ និងស្ថាប័នប្រជាធិបតេយ្យ»។
ជាឧទាហរណ៍ លោករដ្ឋមន្ត្រី Blinken បានចង្អុលបង្ហាញពីច្បាប់និងការផ្តើមគំនិតថ្មីៗដើម្បីប្រយុទ្ធប្រឆាំងនឹងអំពើពុករលួយនៅប្រទេសអេក្វាទ័រ សាធារណរដ្ឋដូមីនីក និងប្រទេសអូស្ត្រាលី រហូតដល់វិធានការគាំទ្រកាសែតសេរី និងឯករាជ្យនៅប្រទេសបារាំង ប្រទេសស្លូវ៉ាគី នូវែលសេឡង់ និងស.រ.អ.តាមរយៈការផ្តើមគំនិតដែលជួយឱ្យបណ្តាញព័ត៌មានឯករាជ្យមានស្ថិរភាពហិរញ្ញវត្ថុជាងមុន ហើយក៏មានការលុបចោលច្បាប់ ដូចនៅប្រទេសសំប៊ីដែលអាចត្រូវប្រើសម្រាប់បំបិទមាត់ពួកអ្នករិះគន់រដ្ឋាភិបាល និងរហូតដល់សកម្មភាពសម្រាប់ការពារសិទ្ធិពលរដ្ឋនិងសិទ្ធិមនុស្ស មានរួមសិទ្ធិរបស់ក្រុមជនជាតិដើមនិងពួកជនក្នុងក្រុមសហគមន៍ LGBTQI+ គឺក្រុមអ្នកស្រឡាញ់ភេទដូចគ្នា និងកែភេទ។
លោករដ្ឋមន្ត្រី Blinken បានមានប្រសាសន៍ថា «នៅពេលយើងប្រុងប្រៀបសម្រាប់សន្និសីទកំពូលក្នុងពេលខាងមុខទៀត យើងនឹងបន្តជួយគ្នាទៅវិញទៅមក ធ្វើឱ្យមានភាពធន់ សម្របសម្រួល និងបន្តកិច្ចប្រឹងប្រែងរួមគ្នារបស់យើង»។
លោករដ្ឋមន្ត្រី Blinken បានប្រកាសថា «ព្រោះហេតុនេះហើយបានជាយើងរៀបចំឱ្យមានការជួបជុំទូលំទូលាយនៃក្រុមអ្នកចូលរួមក្នុងសន្និសីទកំពូលនេះដើម្បីធ្វើឱ្យមានការជឿនលឿននៃអាទិភាព រួមមានតាំងពីការឧបត្ថម្ភផ្ចុងផ្តើមឱ្យមានការចូលរួមរបស់យុវជនក្នុងនយោបាយ គាំទ្រដល់សារព័ត៌មានឯករាជ្យ ធ្វើឱ្យប្រាកដថាមានការបោះឆ្នោតដោយសេរី និងដោយយុត្តិធម៌ និង...រៀបចំឱ្យមានបទដ្ឋានខាងអ៊ីនធឺណិតនិងបច្ចេកវិទ្យាទំនើបៗ»។
លោករដ្ឋមន្ត្រី Blinken បាននិយាយថា «យើងមិនជឿថា យើងមានដំណោះស្រាយទាំងអស់ទេ គឺនៅវែងឆ្ងាយទៀត។ តែយើងដឹងថា នៅពេលណាយើងរួបរួមជាមួយប្រទេសគោរពលទ្ធិប្រជាធិបតេយ្យដូចយើងដែរនោះ យើងជួយគ្នាទៅវិញទៅមកឱ្យកាន់តែខ្លាំង កាន់តែរឹងមាំ ឆ្លើយតបប្រសើរឡើងចំពោះតម្រូវការពលរដ្ឋ ហើយយើងអាចធ្វើបានល្អប្រសើរជាងមុននូវអ្វីដែលយើងមកទីនេះដើម្បីធ្វើ គឺផ្តល់អត្ថប្រយោជន៍ប្រជាធិបតេយ្យដល់ប្រជាពលរដ្ឋរបស់យើង- ហើយខ្ញុំសង្ឃឹមថា ដល់ពិភពលោកទាំងមូលផងដែរ»៕
