តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
គោលការណ៍នៃនីតិរដ្ឋតម្រូវឱ្យមនុស្សទាំងអស់ ស្ថាប័ននិងអង្គភាពទាំងអស់ ទាំងអង្គភាពសាធារណៈនិងឯកជន មានរួមទាំងអង្គភាពរដ្ឋផងដែរ មានការទទួលខុសត្រូវខ្ពស់នៅចំពោះមុខច្បាប់។ នីតិរដ្ឋការពារក្រុមជនងាយរងគ្រោះ។ នីតិរដ្ឋបញ្ចៀសមិនឱ្យមានការរើសអើង ការយាយីនិងការរំលោភឯទៀតៗ ពង្រឹងការជឿទុកចិត្តលើស្ថាប័ននិងគាំទ្រដល់សង្គមដ៏រឹងមាំ មានយុត្តិធម៌និងមានបរិយាបន្ន ឬការរួមបញ្ចូល។ នីតិរដ្ឋក៏ជាមូលដ្ឋាននៃកិច្ចសហប្រតិបត្តិការអន្តរជាតិនិងពហុជាតិនិយម។ ឯកអគ្គរដ្ឋទូតស.រ.អ.ប្រចាំអ.ស.ប. លោកស្រី Linda Thomas-Greenfield បានមានប្រសាសន៍ថា៖ «គ្មាននរណាម្នាក់ គ្មាននាយករដ្ឋមន្ត្រីណាម្នាក់ ឬមិនមានប្រធានាធិបតីណាម្នាក់ស្ថិតតនៅលើច្បាប់ទេ»។
លោកស្រីបាននិយាយថា៖ «នេះជាការប្តេជ្ញារឹងដូចដែកសម្រាប់ស.រ.អ.ចំពោះគោលការណ៍ជាមូលដ្ឋានគ្រឹះមួយរបស់អ.ស.ប.។ យើងប្តេជ្ញាប្រព្រឹត្តតាមនិងធ្វើតាមដាច់ខាតជាមួយធម្មនុញ្ញអ.ស.ប.ដែលផ្តល់ការការពារខាងផ្លូវច្បាប់ ដែលផ្តល់អត្ថប្រយោជន៍ដល់រដ្ឋទាំងអស់»។
ធម្មនុញ្ញអ.ស.ប.លើកកម្ពស់ការគោរពសិទ្ធិមនុស្សនិងសេរីភាពជាមូលដ្ឋានផ្សេងៗទៀត ទោះជាធម្មនុញ្ញនេះ ហាមប្រាមការគំរាមកំហែងប្រើកម្លាំងក្តី។
តែយ៉ាងនេះក៏ដោយ ក៏ពិភពលោកកំពុងមានហានិភ័យយ៉ាងខ្លាំងនៃការមិនគោរពច្បាប់ទម្លាប់។ លោកស្រីឯកអគ្គរដ្ឋទូត Thomas-Greenfield បាននិយាយថា៖ «នៅពេលសព្វថ្ងៃនេះ រដ្ឋខ្លះមិនបានធ្វើតាមការសន្យារបស់ពួកគេដល់គោលការណ៍នៃធម្មនុញ្ញអ.ស.ប.ទេ ឬថែមទាំងបានអនុញ្ញាតដល់ក្រុមអ្នកមិនគោរពតាមបទប្បញ្ញត្តិបន្តសកម្មភាពដោយគ្មានការទទួលខុសត្រូវទៀត»។
លោកស្រីបានថ្លែងថា៖ «នៅក្នុងប្រទេសរុស្ស៊ី សាធារណរដ្ឋប្រជាធិបតេយ្យប្រជាមានិតកូរ៉េ នៅអ៊ីរ៉ង់ នៅនីការ៉ាហ្គា និងក្នុងប្រទេសស៊ិរី មានរបាយការណ៍គួរឱ្យភ័យខ្លាចលាតត្រដាងយ៉ាងលម្អិតអំពីវិធីដែលរដ្ឋាភិបាលបានចាប់ឃុំឃាំង ធ្វើទារុណកម្ម ឬសម្លាប់ក្រុមអ្នកប្រឆាំងខាងនយោបាយ សកម្មជន ក្រុមអ្នកការពារសិទ្ធិមនុស្ស ឬអ្នកកាសែតយ៉ាងអយុត្តិធម៌។ ហើយនៅក្នុងប្រទេសភូមា បេឡារុស គុយបា អ៊ីរ៉ង់ និងប្រទេសស៊ូដង់ យើងបានឃើញក្រុមបាតុករដោយសន្តិវិធី គឺក្រុមមនុស្សដែលទាមទារសិទ្ធិមនុស្សជាមូលដ្ឋានរបស់ពួកគេ ត្រូវបានវាយប្រហារ និងរំលោភបំពាន»។
ហើយបន្ទាប់មក មានការលុកលុយពេញទំហឹងរបស់ប្រទេសរុស្ស៊ីក្នុងប្រទេសអ៊ុយក្រែន។ លោកស្រីឯកអគ្គរដ្ឋទូត Thomas-Greenfield បានមានប្រសាសន៍ថា៖ «គ្មានមូលដ្ឋានខាងផ្លូវច្បាប់អន្តរជាតិណាមួយឱ្យរុស្ស៊ីចូលលុកលុយអ៊ុយក្រែនទេ»។
លោកស្រីបាននិយាយថា៖ «យើងត្រូវតែឱ្យរុស្ស៊ីទទួលខុសត្រូវខ្ពស់ ដូចដែលយើងឱ្យក្រុមជនដែលមិនគោរពអធិបតេយ្យភាព បូរណភាពដែនដី សិទ្ធិមនុស្ស និងសេរីភាពជាមូលដ្ឋាន មានការទទួលខុសត្រូវអ៊ីចឹងដែរ»។
លោកស្រីឯកអគ្គរដ្ឋទូត Thomas-Greenfield បានមានប្រសាសន៍ថា៖ «ស.រ.អ.នឹងបន្តជំរុញនីតិរដ្ឋទាំងលើឆាកអន្តរជាតិ និងទាំងក្នុងប្រទេស។ ហើយយើងចង់ធ្វើការជាមួយជនទាំងឡាយណាដែលចង់ធ្វើដូច្នេះដែរ។ យើងបន្តធ្វើអ្វីៗគ្រប់យ៉ាងទាំងអស់ក្នុងអំណាចរបស់យើងក្នុងការដាក់ការគោរពសិទ្ធិមនុស្ស និងការគោរពច្បាប់នៅគ្រប់កម្រិតស្ថាប័ន។ ច្បាប់អន្តរជាតិអាចជួយយើងឱ្យផុតពីឋាននរក។ ហើយច្បាប់អន្តរជាតិនឹងនាំយើងទៅកាន់សន្តិភាព»៕
