តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក ស្វាគមន៍កិច្ចព្រមព្រៀងរបស់រដ្ឋសភាវ៉េណេស៊ុយអេឡាដែលជាប់ឆ្នោតតាមលទ្ធិប្រជាធិបតេយ្យកាលពីឆ្នាំ២០១៥ ដើម្បីបន្តអាណត្តិរបស់ខ្លួនមួយឆ្នាំទៀតដោយមានលោក Juan Guaido ជាប្រធានបណ្តោះអាសន្ន។ សហរដ្ឋអាមេរិក នៅតែបន្តទទួលស្គាល់អំណាចរបស់រដ្ឋសភាឆ្នាំ២០១៥ ជាស្ថាប័នប្រជាធិបតេយ្យនៅសេសសល់ចុងក្រោយនៃប្រទេសវ៉េណេស៊ុយអេឡា។
លំនាំនៃការសង្កត់សង្កិនខាងនយោបាយ ការរំលោភធ្ងន់ធ្ងរលើសិទ្ធិមនុស្ស និងការរឹតត្បិតធ្ងន់ធ្ងរលើពួកតួអង្គនយោបាយ និងសង្គមស៊ីវិលព្រមទាំងលើសេរីភាពខាងការនិយាយស្តីបញ្ចេញមតិ បានលួចប្លន់សេចក្តីសម្រេចបែបប្រជាធិបតេយ្យដោយខ្លួនឯងរបស់ប្រជារាស្ត្រវ៉េណេស៊ុយអេឡា។ លោក Ned Price អ្នកនាំពាក្យក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា «យើងគាំទ្រកិច្ចខិតខំប្រឹងប្រែង...បង្កើតសណ្តាប់ធ្នាប់ប្រជាធិបតេយ្យ និងនីតិរដ្ឋក្នុងប្រទេសវ៉េណេស៊ុយអេឡា»។.
លោក Price បានបន្ថែមថា «យើងអំពាវនាវដល់លោក Nicolas Maduro ឱ្យធ្វើការចរចាជាថ្មីក្នុងប្រទេសម៉ិកស៊ិក ដោយសុឆន្ទៈសម្រាប់ផលប្រយោជន៍នៃប្រជារាស្ត្រវ៉េណេស៊ុយអេឡា។ យើងនឹងបន្តធ្វើការជាមួយដៃគូវ៉េណេស៊ុយអេឡា និងអន្តរជាតិដោយប្រើវីធីខាងការទូត និងខាងសេដ្ឋកិច្ចសមរម្យទាំងអស់ ដើម្បីជំរុញឱ្យមានការដោះលែងជនទាំងអស់ដែលត្រូវបានចាប់ឃុំឃាំងដោយអយុត្តិធម៌ដោយសារហេតុផលនយោបាយ ឱ្យមានឯករាជ្យភាពនៃគណបក្សនយោបាយ ឱ្យមានការគោរពសេរីភាពខាងការនិយាយស្តីបញ្ចេញមតិ និងសិទ្ធិមនុស្សជាសាកលឯទៀតៗនិងឱ្យមានការបញ្ឈប់ការរំលោភលើសិទ្ធិមនុស្ស»។ បន្ថែមលើនេះ សហរដ្ឋអាមេរិក នឹងបន្តធ្វើការជាមួយសមាជិកសហគមន៍អន្តជាតិដើម្បីជំរុញឱ្យមានស្ថានភាពដែលនាំឱ្យមានការបោះឆ្នោតដោយសេរីនិងយុត្តិធម៌នៅក្នុងប្រទេសវ៉េណេស៊ុយអេឡា។
សហរដ្ឋអាមេរិក ក៏គាំទ្រការប្រឹងប្រែងដើម្បីសម្រាលទុក្ខវេទនារបស់ប្រជារាស្ត្រវ៉េណេស៊ុយអេឡា និងបញ្ចប់វិបត្តិមនុស្សធម៌នៅប្រទេសនេះផងដែរ។ ចាប់ពីឆ្នាំ២០១៧ មក សហរដ្ឋអាមេរិក បានផ្តល់ជំនួយខាងមនុស្សធម៌ ខាងសេដ្ឋកិច្ច ខាងការអភិវឌ្ឍ និងខាងសុខាភិបាល ដើម្បីជួយប្រជារាស្ត្រវ៉េណេស៊ុយអេឡានៅខាងក្នុងប្រទេស និងក្រុមជនដែលត្រូវបានបង្ខំឱ្យរត់គេចខ្លួនទៅកាន់កន្លែងនានាក្នុងតំបន់នោះផងដែរ។
សហរដ្ឋអាមេរិក នឹងនៅតែជាអ្នកគាំទ្រខ្លាំងមួយដល់ប្រជារាស្ត្រវ៉េណេស៊ុយអេឡា នៅពេលដែលពួកគេធ្វើការដើម្បីធ្វើឱ្យមានលទ្ធិប្រជាធិបតេយ្យឡើងវិញតាមរយៈការបោះឆ្នោតដោយសេរី និងយុត្តិធម៌៕
