តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកបានបន្ធូរបន្ថយការរឹតត្បិតលើជំនួយមនុស្សធម៌ដល់ប្រទេសស៊ីរីដើម្បីជួយប្រជាពលរដ្ឋស៊ីរីនៅក្នុងដំណាក់កាលអន្តរកាលនយោបាយ។
ស៊ីរីបានក្លាយជាប្រទេសមួយដែលរងការដាក់ទណ្ឌកម្មខ្លាំងបំផុតនៅក្នុងពិភពលោកនៅក្នុងការឆ្លើយតបចំពោះភាពឃោរឃៅរបស់អតីតប្រធានាធិបតីស៊ីរីលោក Bashar Al-Assad ដែលបានបញ្ឆេះឱ្យមានសង្គ្រាមស៊ីវិលដ៏រន្ធត់រយៈពេល ១៣ ឆ្នាំតាមរយៈការបង្ក្រាបដ៏ព្រៃផ្សៃរបស់លោកលើការតវ៉ាប្រឆាំងរដ្ឋាភិបាល។
កាលពីថ្ងៃទី ៨ ខែធ្នូ ឆ្នាំមុន របបដឹកនាំរបស់លោក Assad បានបញ្ចប់នៅពេលដែលក្រុមឧទ្ទាមអ៊ិស្លាមដែលដឹកនាំដោយក្រុម Hayat Tahrir al-Sham (HTS) បានចូលកាន់កាប់រដ្ឋធានីដាម៉ាសដោយបានធ្វើឱ្យលោក Assad និរទេសខ្លួន។ ក្នុងពេលប៉ុន្មានសប្តាហ៍ក្រោយមក ក្រុម HTS ដែលធ្លាប់ចងសម្ពន្ធភាពជាមួយក្រុមអាល់កៃដា (al-Qaida) បានបង្កើតរដ្ឋាភិបាលអន្តរកាលមួយ។
កាលពីថ្ងៃទី ៦ ខែមករា ក្រសួងហិរញ្ញវត្ថុសហរដ្ឋអាមេរិកបានប្រកាសថាខ្លួនបានចេញអាជ្ញាប័ណ្ណទូទៅមួយសម្រាប់សកម្មភាពនិងការទូទាត់មួយចំនួននៅក្នុងប្រទេសស៊ីរី។
ក្រសួងហិរញ្ញវត្ថុអាមេរិកបានបញ្ជាក់នៅក្នុងសេចក្តីថ្លែងការណ៍មួយថា៖ «សកម្មភាពនេះគូសបញ្ជាក់អំពីការតាំងចិត្តរបស់សហរដ្ឋអាមេរិកនៅក្នុងការធ្វើឱ្យប្រាកដថាការដាក់ទណ្ឌកម្មរបស់សហរដ្ឋអាមេរិកមិនបង្អាក់ដល់សកម្មភាពមួយចំនួនដើម្បីបំពេញសេចក្តីត្រូវការជាមូលដ្ឋានរបស់មនុស្សនោះទេ ដែលក្នុងនោះរួមមានទាំងការផ្ដល់នូវសេវាកម្មសាធារណៈឬជំនួយមនុស្សធម៌ផងដែរ។ ការអនុញ្ញាតនេះមានរយៈពេល ៦ ខែ នៅពេលដែលរដ្ឋាភិបាលសហរដ្ឋអាមេរិកនៅបន្តឃ្លាំមើលស្ថានការណ៍វិវត្តជាក់ស្ដែង»។
ការដាក់ទណ្ឌកម្មភាគច្រើនរបស់សហរដ្ឋអាមេរិកប្រឆាំងនឹងស៊ីរីនៅតែស្ថិតនៅជាធរមាន ទោះបីជាសហរដ្ឋអាមេរិកបានទម្លាក់ចោលនូវការផ្ដល់ប្រាក់រង្វាន់សម្រាប់មេដឹកនាំក្រុម HTS លោក Ahmad al-Sharaa ដែលគេស្គាល់ថា Mohammad al-Jawlani ក៏ដោយ។
មន្ត្រីបស្ចិមប្រទេសនានា រួមទាំងមន្ត្រីសហរដ្ឋអាមេរិកផងដែរ បានជួបជាមួយលោក al-Sharaa ហើយបានជំរុញរដ្ឋាភិបាលអន្តរកាលរបស់លោកឱ្យគិតគូរពីសេចក្តីត្រូវការនិងសិទ្ធិរបស់ប្រជាពលរដ្ឋស៊ីរីទាំងអស់។
កាលពីខែធ្នូ ឆ្នាំមុន លោកប្រធានាធិបតី Joe Biden បានព្រមានថា ថ្នាក់ដឹកនាំថ្មីរបស់ស៊ីរីមាន «ប្រវត្តិភេរវកម្មនិងការរំលោភសិទ្ធិមនុស្សផ្ទាល់របស់ខ្លួន»។
ជាងនេះទៀត លោកប្រធានាធិបតី Biden បានប្រកាសថា៖ «ពួកគេកំពុងនិយាយពីរឿងត្រឹមត្រូវនៅពេលឥឡូវនេះ ក៏ប៉ុន្តែនៅពេលដែលពួកគេមានការទទួលខុសត្រូវកាន់តែធំ យើងនឹងវាយតម្លៃមិនត្រឹមតែលើពាក្យសម្តីរបស់ពួកគេប៉ុណ្ណោះទេ ប៉ុន្តែថែមទាំងលើសកម្មភាពរបស់ពួគគេទៀតផង»។
នៅក្នុងការប្រកាសអំពីការបន្ធូរបន្ថយការរឹតត្បិតសម្រាប់ជំនួយមនុស្សធម៌នេះ ក្រសួងហិរញ្ញវត្ថុសហរដ្ឋអាមេរិកបានកត់សម្គាល់នូវ «ស្ថានភាពមិនធម្មតា» នាពេលបច្ចុប្បន្ននេះក្នុងប្រទេសស៊ីរីនិងបំណងប្រាថ្នារបស់សហរដ្ឋអាមេរិកនៅក្នុងការ «គាំទ្រប្រជាពលរដ្ឋស៊ីរីនៅពេលដែលពួកគេកសាងអនាគតមួយដែលមានក្តីសង្ឃឹម សន្តិសុខ និងសន្តិភាពជាងមុន»។
ក្រសួងហិរញ្ញវត្ថុសហរដ្ឋអាមេរិកបានបញ្ជាក់ទៀតថា អាជ្ញាប័ណ្ណទូទៅដែលខ្លួនបានចេញនោះនឹងជួយ «ធ្វើឱ្យប្រាកដថាទណ្ឌកម្មទាំងនោះមិនបង្អាក់ដល់សេវាសំខាន់ៗនិងការបន្តទៅមុខនូវដំណើការអភិបាលកិច្ចនៅទូទាំងប្រទេសស៊ីរីនោះទេ ដែលក្នុងនោះរួមមានទាំងការផ្ដល់នូវអគ្គិសនី ថាមពល ទឹក និងអនាម័យផងដែរ»។
អនុរដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកលោក Wally Adeyemo បានប្រកាសថា៖ «ក្នុងអំឡុងដំណាក់កាលអន្តរកាលនេះ ក្រសួងហិរញ្ញវត្ថុ [សហរដ្ឋអាមេរិក] នឹងបន្តគាំទ្រផ្នែកជំនួយមនុស្សធម៌និងអភិបាលកិច្ចដែលមានការទទួលខុសត្រូវនៅក្នុងប្រទេសស៊ីរី»៕