តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ថ្ងៃទី៤ ខែមេសា កំណត់ថ្ងៃចេញផ្សាយរបាយការណ៍ទី២២របស់ក្រសួងការបរទេសសហរដ្ឋអាមេរិកដែលមានចំណងជើងថា «ដើរលើផែនដីដោយសុវត្ថិភាព» (To Walk the Earth In Safety) ចេញផ្សាយដោយការិយាល័យនៃការដកអាវុធនិងការបន្ថយអាវុធនៃការិយាល័យកិច្ចការនយោបាយនិងកិច្ចការយោធា។ គោលដៅនៃសេចក្តីរាយការណ៍នេះ គឺគូសបញ្ជាក់សមិទ្ធិរបស់អាមេរិកក្នុងការបំផ្លាញអាវុធដែលមិនមែនជាអាវុធនុយក្លេអ៊ែរ។
នេះជាការងារសំខាន់មួយ ពីព្រោះទោះជានៅពេលច្រើនទសវត្សរ៍ក្រោយសង្គ្រាមមួយបានចប់ហើយក៏ដោយ ក៏គ្រឿងផ្ទុះនៅសេសសល់ពីសង្គ្រាមដាក់ឱ្យមានគ្រោះថ្នាក់ដល់ជីវិតមនុស្សនៅពេលធ្វើសកម្មភាពប្រចាំថ្ងៃ។ នៅពេលជាមួយគ្នានេះដែរ អាវុធតូចៗ អាវុធស្រាលៗ និងគ្រាប់រំសេវដែលមិនបានត្រូវថែរក្សាដោយត្រឹមត្រូវអាចធ្លាក់ដោយងាយក្នុងកណ្តាប់ដៃពួកជនមិនគោរពច្បាប់នាំឱ្យមានឧក្រិដ្ឋកម្មដែលអាចធ្វើឱ្យតំបន់ទាំងមូលមានអស្ថិរភាព និងបង្អាក់ការរើបឡើងវិញ។
លោកស្រី Karen Chandler ជាឧបការីរងស្តីទីសម្រាប់កម្មវិធីនិងកិច្ចប្រតិបត្តិការនៅការិយាល័យកិច្ចការនយោបាយនិងកិច្ចការយោធានៃក្រសួងការបរទេសអាមេរិក។ លោកស្រីបាននិយាយថា ជាឧទាហរណ៍ «យើងបញ្ចៀសមិនឱ្យមានការបំផ្ទុះគ្រាប់រំសេវនៅឃ្លាំងគ្រាប់ទេ ដែលនៅទីនោះវត្ថុអាចទុកដាក់មិនបានត្រឹមត្រូវ ហើយអាចផ្ទុះបាន»។
លោកស្រី Chandler បាននិយាយថា៖ «ស្តីពីការដោះគ្រាប់មីននិងយោធភណ្ឌផ្ទុះ នេះជាអាទិភាពកំពូលមួយ ពីព្រោះយើងជួយស្រោចស្រង់ជីវិតមនុស្សស្លូតត្រង់។ ចំនួនជនរងគ្រោះនៅពេលយើងចាប់ផ្តើមកម្មវិធីនេះក្នុងទសវត្សរ៍ឆ្នាំ១៩៩០ មានប្រមាណ២ម៉ឺននាក់ក្នុងមួយឆ្នាំ។ តួលេខនេះបានចុះថយមកនៅត្រឹម៥ពាន់នាក់ក្នុងមួយឆ្នាំ... ហើយជាទីបញ្ចប់នៅក្នុងតំបន់ដែលសង្គ្រាមទើបតែចប់ កម្មវិធីនេះអនុញ្ញាតឱ្យប្រជារាស្ត្រវិលត្រឡប់ទៅផ្ទះសម្បែងគេវិញបាន»។
លោកស្រី Chandler បានថ្លែងថា៖ «យើងបានបោសសម្អាតគ្រាប់មីនលើផ្ទៃដីជាង២៤៣លានម៉ែត្រក្រឡា»។ លោកស្រីបានពោលថា នៅឆ្នាំនេះ កម្មវិធីធំបំផុតគឺនៅក្នុងប្រទេសអ៊ុយក្រែន។
លោកស្រីបានថ្លែងថា៖ «យើងអាចផ្តល់ប្រាក់ដល់កិច្ចប្រតិបត្តិការបោសសម្អាតមីននៅអ៊ុយក្រែន ប្រមាណ៩០លានដុល្លារក្នុងឆ្នាំនេះ...យើងក៏មានកម្មវិធីផ្តល់ទឹកប្រាក់៤៥លានដុល្លារក្នុងមួយឆ្នាំនៅប្រទេសឡាវដែរ។ ហើយយើងបានចំណាយប្រមាណ៤០លានដុល្លារនៅក្នុងប្រទេសអ៊ីរ៉ាក់។ ហើយទឹកប្រាក់ច្រើនបន្ទាប់មកគឺ២៤លានដុល្លារដែលយើងចំណាយក្នុងប្រទេសកូឡុំប៊ី...ហើយជាទីបញ្ចប់ នៅក្នុងប្រទេសវៀតណាម យើងចំណាយប្រមាណ២០លានដុល្លារក្នុងមួយឆ្នាំដែរ»។
លោកស្រី Chandler បានពោលថា៖ «យើងបានពង្រីកការងារយើងនៅទូទាំងពិភពលោកហើយបានធ្វើកម្មវិធីនេះក្នុងតំបន់មានបញ្ហាធ្ងន់ធ្ងរបំផុតដែលយើងត្រូវការបោសសម្អាតមីន។ នេះជាកម្មវិធីមួយដែលយើងយល់ថា ផ្តល់អត្ថប្រយោជន៍ជាក់ស្តែងដល់ការបញ្ចៀសកុំឱ្យកុមារនិងមនុស្សស្លូតត្រង់ត្រូវស្លាប់ តែក៏បង្កើនសុខុមាលភាពនិងឱកាសសេដ្ឋកិច្ចដល់តំបន់ដែលយើង...បានធ្វើប្រតិបត្តិការបោសសម្អាតមីន។ យើងអាចឃើញក្រុមកសិករវិលទៅធ្វើកសិកម្មលើដីធ្លីពួកគេវិញ។ បើនិយាយពីហេដ្ឋារចនាសម្ព័ន្ធសំខាន់ៗយើងបានជួយឱ្យសេវាទឹកភ្លើង ទូរស័ព្ទមានដំណើរការឡើងវិញ»។
លោកស្រី Chandler បានមានប្រសាសន៍ថា៖ «កម្មវិធីនេះពិតជាការការពារប្រជាជនស៊ីវិលពីការរងគ្រោះ»៕
បទវិចារណកថា៖ សហរដ្ឋអាមេរិកលើកតម្កើងសន្តិភាពនិងសន្តិសុខតាមរយៈការបំផ្លាញអាវុធមិនមែននុយក្លេអ៊ែរ
រូបឯកសារ៖ ផ្សែងហុយទ្រលោមឡើង បន្ទាប់ពីការបំផ្ទុះគ្រាប់មីន និងគ្រាប់រំសេវផ្សេងទៀតនៅក្នុងប្រទេសអាហ្វហ្គានីស្ថាន។