តទៅនេះជាបទវិចារណកថាដែលឆ្លុះបញ្ចាំងឱ្យឃើញនូវទស្សនៈរបស់រដ្ឋាភិបាលសហរដ្ឋអាមេរិក
ក្នុងដំណើរទស្សនកិច្ចកាលពីពេលថ្មីៗនេះទៅកាន់ទីក្រុងឡុងដ៍ ចក្រភពអង់គ្លេស រដ្ឋមន្ត្រីការបរទេសសហរដ្ឋអាមេរិក លោក Antony Blinken បានជួបជាមួយរដ្ឋមន្ត្រីការបរទេសចក្រភពអង់គ្លេស លោក David Lammy ដើម្បីពិភាក្សាគោល នយោបាយការបរទេសដែលជាអាទិភាពរបស់ប្រទេសទាំង២។
លោករដ្ឋមន្ត្រីការបរទេសBlinken បាននិយាយថា អាទិភាពសំខាន់បំផុតក្នុងចំណោមអាទិភាពទាំងនោះ គឺការបន្តការគាំទ្រដល់អ៊ុយក្រែន។ រដ្ឋមន្ត្រីការបរទេសអាមេរិកលោក Blinken បានថ្លែងថា៖
«យើងកំពុងធ្វើការដើម្បីឱ្យប្រាកដថា អ៊ុយក្រែនអាចការពារទឹកដីរបស់ខ្លួនដើម្បីប្រឆាំងនឹងការឈ្លានពានដែលកំពុងបន្តកើតមានឡើង ដែលអ៊ុយក្រែនអាចការពារដោយខ្លួនឯងខាងផ្នែកសេដ្ឋកិច្ច យោធា សេដ្ឋកិច្ច ប្រជាធិបតេយ្យ ហើយដែលអាចឱ្យខ្លួននឹងស្ថិតនៅលើមាគ៌ាដែលប្រជាពលរដ្ឋអ៊ុយក្រែនចង់ឱ្យមានការបញ្ចូលកាន់តែឆាប់ឡើងជាមួយអឺរ៉ុប ជាមួយស្ថាប័នត្រើយម្ខាងទៀតនៃមហាសមុទ្រអាត្លង់ទិក»។
លោករដ្ឋមន្ត្រីការបរទេស Blinken និងរដ្ឋមន្ត្រីការបរទេស Lammy ក៏បានពិភាក្សាកិច្ចប្រឹងប្រែងរួមគ្នា ដើម្បីធ្វើឱ្យមានសន្តិភាពនិងស្ថិរភាពនៅច្រកសមុទ្រតៃវ៉ាន់ និងសេរីភាពនៃការធ្វើនាវាចរណ៍ និងការហោះហើរពីលើសមុទ្រចិនខាងត្បូង។ លោក Blinken បានថ្លែងទៀតថា៖
«សម្រាប់យើងទាំង២ ការថែរក្សាសន្តិភាពនិងស្ថិរភាព ការរក្សាស្ថានភាពឱ្យនៅដដែលជាការសំខាន់។ ហើយ វាក៏ជាការសំខាន់មិនត្រឹមតែសម្រាប់យើងប៉ុណ្នោះទេ វាក៏ជាការសំខាន់ដល់ប្រទេសនានានៅជុំវិញពិភពលោកផងដែរ»។
ដើម្បីធ្វើសង្គ្រាមនៅអ៊ុយក្រែន លោក Putin កំពុងទទួលបានអាវុធមកពីអ៊ីរ៉ង់និងសាធារណរដ្ឋប្រជាមានិតប្រជាធិបតេយ្យកូរ៉េឬDPRKដែលជាការរំលោភយ៉ាងច្បាស់ក្រឡែតលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ លោករដ្ឋមន្ត្រី Blinken បានថ្លែងបន្តទៀតថា៖
«រដ្ឋាភិបាលក្រុងតេហេរ៉ង់បានផ្គត់ផ្គង់ដ្រូនជាយូយារមកហើយ។ គេបានស្ថាបនារោងចក្រដ្រូននៅក្នុងប្រទេសរុស្ស៊ី។ គេបានហ្វឹកហាត់បុគ្គលិករុស្ស៊ីពីរបៀបប្រតិបត្តិការដ្រូនទាំងនោះ។ ពេលខ្លះ សហរដ្ឋអាមេរិកបានព្រមាននៃការគំរាមកំហែងបន្ថែមថា៖ ការផ្តល់កាំជ្រួចមីស៊ីលបាល្លីស្ទិករបស់អ៊ីរ៉ង់ដល់រុស្ស៊ីដើម្បីប្រើនៅក្នុងប្រទេសអ៊ុយក្រែន រុស្ស៊ីឥឡូវនេះបានទទួលការដឹកជញ្ជូនកាំជ្រួចមីស៊ីលបាល្លីស្ទិកទាំងអស់នោះ ហើយនឹងទំនងប្រើប្រាស់កាំជ្រួចមីស៊ីលទាំងនោះក្នុងប៉ុន្មានសប្តាហ៍នៅក្នុងប្រទេសអ៊ុយក្រែនដើម្បីប្រឆាំងនឹងពលរដ្ឋអ៊ុយក្រែន»។
រុស្ស៊ីកំពុងចែករំលែកបច្ចេកវិទ្យាដែលអ៊ីរ៉ង់ស្វះស្វែងរក រួមមានបញ្ហានុយក្លែអ៊េរ និងព័ត៌មានអវកាសខ្លះ។ លោករដ្ឋមន្ត្រីការបរទេស Blinken បានព្រមានថា ការណ៍នេះអាចនាំឱ្យមាន«ផលវិបាកសេដ្ឋកិច្ចធ្ងន់ធ្ងរចំពោះសកម្មភាពរបស់រដ្ឋាភិបាលក្រុងតេហេរ៉ង់»។
ស្តីពីអ៊ីស្រាអែលនិងតំបន់ហ្កាហ្សាវិញ មេដឹកនាំទាំង២ បានពិភាក្សាពីការខំប្រឹងប្រែងដើម្បីរារាំងវិបត្តិនៅក្នុងតំបន់មជ្ឈឹមបូព៌ាកុំឱ្យរីកកាន់តែធំឡើង។ លោករដ្ឋមន្ត្រីការបរ ទេស Blinken បានមានប្រសាសន៍ទៀតថា«ប្រទេសរបស់យើងបានជួយអ៊ីស្រា អែលការពារខ្លួនប្រឆាំងនឹងការវាយប្រហារដែលមិនធ្លាប់មានកាលពីពេលមុនមកពីអ៊ីរ៉ង់កាលពីបីបួនខែកន្លងមក។ យើងបានប្រុងប្រៀបចាត់វិធានការរួមគ្នាដើម្បីជួយអ៊ីស្រាអែលការពារខ្លួនឯងនៅថ្ងៃអនាគត។ យើងបានធ្វើការសម្រេចដូចគ្នាដើម្បីបញ្ចប់ជម្លោះនៅក្នុងតំបន់ហ្កាហ្សាឱ្យបានឆាប់រហ័សទៅតាមលទ្ធភាពដែលអាចធ្វើបាន»។
សហរដ្ឋអាមេរិកថ្លែងអំណរគុណចំពោះការមានភាពជាដៃគូដ៏ខ្លាំងជាមួយចក្រភពអង់គ្លេសដើម្បីចាត់វិធានការលើបញ្ហាបន្ទាន់ៗ ដែលសហគមន៍ត្រើយម្ខាងទៀតនៃមហាសមុទ្រអាត្លង់ទិកកំពុងប្រឈម៕