តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកពេញចិត្តនៅក្នុងការគាំទ្រសេចក្ដីថ្លែងការណ៍រួមនៃការមូលមតិគ្នារបស់សម្ព័ន្ធភាពសេរីភាពអនឡាញ (Freedom Online Coalition (FOC)) អំពីការបិទអ៊ីនធឺណិតនៅក្នុងប្រទេសអ៊ីរ៉ង់។
សមាជិកនៃសម្ព័ន្ធភាពសេរីភាពអនឡាញនេះគឺជាប្រទេសដែលតាំងចិត្តនៅក្នុងការការពារនិងលើកកម្ពស់សេរីភាពតាមអនឡាញទាំងនៅក្នុងប្រទេសនិងក្រៅប្រទេស។ ចាប់តាំងពីពេលដែលសម្ព័ន្ធភាពនេះបានបង្កើតឡើងមក សមាជិកនៃក្រុមនេះបានកើនពី ១៥ ប្រទេសនៅក្នុងឆ្នាំ ២០១១ ទៅ ៣៤ ប្រទេសនៅពេលបច្ចុប្បន្ននេះ។
នៅក្នុងសេចក្ដីថ្លែងការណ៍របស់ខ្លួន ប្រទេសជាសមាជិកនៃសម្ព័ន្ធភាពសេរីភាពអនឡាញនេះ «ថ្កោលទោសខ្លាំងក្លាលើវិធានការនានាដែលរដ្ឋាភិបាលអ៊ីរ៉ង់បានធ្វើឡើងដើម្បីដាក់កំហិតលើលទ្ធភាពប្រើប្រាស់អ៊ីនធឺណិត បន្ទាប់ពីមានការតវ៉ានៅទូទាំងប្រទេសទាក់ទិននឹងការស្លាប់ដ៏គួរឱ្យខ្លោចផ្សារបស់នាង Mahsa Amini»។
ដោយបន្តនូវលំនាំនៃការត្រួតត្រាជាយូរមកហើយរបស់ខ្លួនលើសេរីភាពនៃការបញ្ចេញមតិ រដ្ឋាភិបាលអ៊ីរ៉ង់បានបិទអ៊ីនធឺណិតមួយផ្នែកធំម្ដងទៀតសម្រាប់ពលរដ្ឋភាគច្រើននៅទូទាំងប្រទេសក្នុងចំណោមពលរដ្ឋជាង ៨០ លាននាក់របស់ខ្លួន តាមរយៈការកាត់ផ្ដាច់ទិន្នន័យចល័ត ការបង្អាក់វេទិកាប្រព័ន្ធផ្សព្វផ្សាយសង្គមអនឡាញដែលមានប្រជាប្រិយភាពនានា ការបិទសេវាអ៊ីនធឺណិត និងការរារាំងការផ្ញើសារនិងសេវាផ្សេងៗទៀត។
ប្រជាពលរដ្ឋអ៊ីរ៉ង់រាប់លាននាក់ពឹងផ្អែកលើមធ្យោបាយទាំងនេះនិងមធ្យោបាយផ្សេងៗទៀតដើម្បីទាក់ទងគ្នានិងទាក់ទងទៅកាន់ពិភពលោក។ តាមរយៈការរារាំង ការរឹតត្បិត ឬក៏ការបិទសេវាទាំងនេះ រដ្ឋាភិបាលអ៊ីរ៉ង់កំពុងគាបសង្កត់សិទ្ធិនៃការជួបជុំដោយសន្តិវិធីនិងសេរីភាពនៃការប្រមូលផ្ដុំគ្នានិងការបញ្ចេញមតិ។
វិធានការទាំងនេះរបស់រដ្ឋាភិបាលអ៊ីរ៉ង់ធ្វើឱ្យសឹករេចរឹលដល់លំហពលរដ្ឋ ធ្វើឱ្យសេដ្ឋកិច្ចកាន់តែមានភាពស្រពិចស្រពិលបន្ថែមទៀត និងបង្អាក់ដល់លទ្ធភាពទទួលបានសេវាសុខាភិបាល សេវាសង្គ្រោះបន្ទាន់ និងសេវាហិរញ្ញវត្ថុ។
កង្វះអ៊ីនធឺណិតក៏បង្អាក់ផងដែរដល់ការបើកប្រាក់បៀវត្សរ៍ ការបង់ថ្លៃទឹកនិងអគ្គិសនី និងការអប់រំ។ កង្វះអ៊ីនធឺណិតធ្វើឱ្យអ្នកសារព័ត៌មាន អ្នកការពារសិទ្ធិមនុស្ស និងអ្នកដទៃទៀតខ្វះលទ្ធភាពនៅក្នុងការរាយការណ៍និងកត់ត្រាការរំលោភសិទ្ធិមនុស្សឬក៏ការរំលោភបំពានផ្សេងៗទៀតដែលកើតឡើងនៅក្នុងអំឡុងពេលមានការបិទអ៊ីនធឺណិត។
សម្ព័ន្ធភាពសេរីភាពអនឡាញ «អំពាវនាវយ៉ាងដាច់អហង្កាឱ្យរដ្ឋាភិបាលនៃប្រទេសអ៊ីរ៉ង់ដកចេញជាបន្ទាន់នូវការដាក់កំហិតដែលមានបំណងបង្អាក់ឬក៏រារាំងពលរដ្ឋអ៊ីរ៉ង់មិនឱ្យមានលទ្ធភាពនៅក្នុងការប្រើប្រាស់និងចែកផ្សាយព័ត៌មានតាមអនឡាញ និងនៅក្នុងការទាក់ទងដោយសុវត្ថិភាពនិងមានសន្តិសុខល្អ។ យើងក៏អំពាវនាវផងដែរឱ្យអាជ្ញាធរអ៊ីរ៉ង់កុំបិទអ៊ីនធឺណិតទោះបីមួយផ្នែកឬក៏ទាំងស្រុងក៏ដោយ កុំរារាំងឬក៏រឹតត្បិតសេវាអ៊ីនធឺណិត និងត្រូវគោរពកាតព្វកិច្ចរបស់ខ្លួនទាក់ទិននឹងសិទ្ធិមនុស្សអន្តរជាតិ»។
នៅក្នុងកិច្ចប្រឹងប្រែងដើម្បីលើកកម្ពស់សេរីភាពអ៊ីនធឺណិតនៅក្នុងប្រទេសអ៊ីរ៉ង់ ការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុសហរដ្ឋអាមេរិកបានចេញនូវអាជ្ញាបណ្ណទូទៅ D-2 ដែលជាលិខិតអនុញ្ញាតទូលំទូលាយជាងមុនមួយដែលនឹងអនុញ្ញាតឱ្យក្រុមហ៊ុនបច្ចេកវិទ្យានានាផ្ដល់សេវាកម្មអ៊ីនធឺណិតបន្ថែមដល់ប្រជាពលរដ្ឋនៅក្នុងប្រទេសអ៊ីរ៉ង់តាំងពីលទ្ធភាពនៅក្នុងការប្រើប្រាស់សេវាប្រព័ន្ធ cloud តាមអ៊ីនធឺណិតរហូតដល់ឧបករណ៍មានប្រសិទ្ធភាពជាងមុនផ្សេងៗដើម្បីពង្រឹងសន្តិសុខតាមអនឡាញនិងឯកជនភាពរបស់ពួកគេ។
សហរដ្ឋអាមេរិករួមជាមួយនឹងប្រទេសជាសមាជិកដទៃទៀតនៃសម្ព័ន្ធភាពសេរីភាពអនឡាញគាំទ្រការទាមទាររបស់ប្រជាពលរដ្ឋអ៊ីរ៉ង់ដែលចង់អនុវត្តសិទ្ធិរបស់ខ្លួននៅក្នុងការបញ្ចេញមតិទាំងតាមអនឡាញនិងមិនតាមអនឡាញ៕
