តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកបានប្រារព្ធទិវាសិទ្ធិមនុស្សកាលពីខែធ្នូនិងខួបឆ្នាំទី៧៥នៃសេចក្តីប្រកាសសាកលនៃសិទ្ធិមនុស្សដោយបានរឹតត្បិតទិដ្ឋាការនិងដាក់ទណ្ឌកម្មលើបុគ្គល៣៧នាក់នៅក្នុងប្រទេស១៣។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយនៅក្នុងសេចក្តីថ្លែងការណ៍មួយថា ជាមួយសកម្មភាពទាំងនេះ«សហរដ្ឋអាមេរិកដោះស្រាយការរំលោភសិទ្ធិមនុស្សដែលជាឧបសគ្គនិងនាំឱ្យមានទុក្ខទោសធំបំផុតខ្លះៗនៅក្នុងពិភពលោក មានរួមក្រុមជនទាក់ទិននឹងអំពើហិង្សាផ្លូវភេទ ការបង្ខំឱ្យធ្វើការជាទម្ងន់និងការបង្ក្រាបឆ្លងព្រំដែន»។
ការចុចឈ្មោះជាច្រើនក្នុងបណ្តាការចុចឈ្មោះថ្មីៗទាំងនេះយកជាទីដៅនូវក្រុមបុគ្គលទទួលខុសត្រូវដល់អំពើហិង្សាផ្អែកលើយេនឌ័រនិងការបង្ក្រាបស្ត្រីនិងនារីជាសាកល មានរួមពួកសមាជិកគណៈកម្មការស្រុកនិងអភិបាលខេត្តមា្នក់នៅប្រទេសស៊ូដង់ខាងត្បូងដែលកងកម្លាំងនិងពួកជីវពលរបស់ពួកគេជាអ្នកទទួលខុសត្រូវដល់ការរំលោភសេពសន្ធវៈនិងពួកមេដឹកនាំតាលីបង់មានទាក់ទិននឹងការរឹតត្បិតមិនឱ្យនារីទៅរៀននៅមធ្យមសិក្សា។
លោករដ្ឋមន្ត្រី Blinken ថ្លែងថា «របបគ្រប់គ្រងអ៊ីរ៉ង់នៅតែជាអ្នករំលោភសិទ្ធិមនុស្សអាក្រក់បំផុតមួយនៅក្នុងប្រទេសនិងក្រៅប្រទេស។ ការរំលោភរបស់អាជ្ញាធរអ៊ីរ៉ង់មានរួមការបង្ក្រាបក្រុមប្រឆាំងនិងក្រុមបាតុករដោយសន្តិវិធីតាមរយៈការប្រើកម្លាំងនាំឱ្យមានមនុស្សស្លាប់ ការចាប់ឃុំឃាំងតាមអំពើចិត្ត ការធ្វើទារុណកម្មនិងការយកក្រុមប្រឆាំងនៅក្រៅប្រទេសជាទីដៅតាមរយៈការតាមឃ្លាំមើល ការបំភិតបំភ័យនិងការលបធ្វើឃាត»។ ជាការឆ្លើយតប សហរដ្ឋអាមេរិកបានចុចឈ្មោះមន្ត្រីខាងស៊ើបការសម្ងាត់អ៊ីរ៉ង់ពីរនាក់មានទាក់ទិននឹងការជ្រើសរើសពួកបុគ្គលឱ្យធ្វើអំពើអាក្រក់ប្រឆាំងនឹងក្រុមប្រឆាំងនឹងរបបគ្រប់គ្រងអ៊ីរ៉ង់នៅក្នុងប្រទេសអាមេរិក មានរួមពួកមន្ត្រីបច្ចុប្បន្ននិងអតីតមន្ត្រីអាមេរិកព្រមទាំងធ្វើសកម្មភាពឃ្លាំមើលផ្តោតលើកន្លែងសាសនា អាជីវកម្មនិងកន្លែងឯទៀតៗ។
បន្ថែមលើនេះ ក្រសួងការបរទេសអាមេរិកបានចេញរបាយការណ៍អំពីច្បាប់ខាងគោលនយោបាយសិទ្ធិមនុស្ស Uighur ទៅជូនសភា ហើយក្រសួងហិរញ្ញវត្ថុបានដាក់ទណ្ឌកម្មមន្ត្រីរដ្ឋាភិបាលសាធារណប្រជាមានិតចិនពីរនាក់ដោយសារការទាក់ទិនរបស់ពួកគេជាមួយការរំលោភសិទ្ធិមនុស្សធ្ងន់ធ្ងរនៅក្នុងតំបន់ Xinjiang។
ក្រសួងការបរទេសក៏បានសើរើ ពង្រីក និងចេញគោលនយោបាយរឹតត្បិតទិដ្ឋាការសម្រាប់ប្រទេសហ្សីមបាវ៉េ ស៊ីរី និងប្រទេសអ៊ូហ្គង់ដាដើម្បីផ្ចុងផ្តើមការទទួលខុសត្រូវសម្រាប់ពួកមន្ត្រីរដ្ឋាភិបាលនិងជនឯទៀតមានទាក់ទិននឹងការបង្ក្រាប ការរំលោភសិទ្ធិមនុស្ស និងសកម្មភាពមិនអាចទទួលបានឯទៀតៗ។
ជាទីបញ្ចប់ សហរដ្ឋអាមេរិកបានចុចឈ្មោះមេដឹកនាំក្រុមអ្នកលេងជាឧក្រិដ្ឋជនបួននាក់នៅប្រទេសហៃទីទាក់ទិននឹងការរំលោភលើសិទ្ធិមនុស្ស មានរួមអំពើហិង្សាខាងផ្លូវភេទនិងមេដឹកនាំប្រាំនាក់នៃក្រុមជនប្រដាប់អាវុធក្នុងសាធារណរដ្ឋប្រជាធិបតេយ្យកុងហ្គោ។ ការចុចឈ្មោះជនទាំងនេះមានបន្ថែមលើការប្រឹងប្រែងកាលពីពេលមុនៗដោយសហរដ្ឋអាមេរិកដើម្បីបង្អាក់សកម្មភាពឧក្រិដ្ឋនៅហៃទី មានរួមទាំងកម្មវិធីផ្តល់រង្វាន់របស់ក្រសួងការបរទេសប្រឆាំងនឹងឧក្រិដ្ឋកម្មមានការរៀបចំឆ្លងកាត់ព្រំដែនដែលផ្តល់រង្វាន់រហូតដល់១លានដុល្លារ និង២លានដុល្លារសម្រាប់ជនទាំងឡាយណាដែលផ្តល់ព័ត៌មាននាំឱ្យមានការចាប់ខ្លួន និងការកាត់ទោសឈ្មោះ Joseph Wilson និង ឈ្មោះ Vitel’s homme Innocent។
សហរដ្ឋអាមេរិកនឹងបន្តប្រើវិធីទាំងអស់ដែលមានសម្រាប់ផ្ចុងផ្តើមការទទួលខុសត្រូវនិងផ្តល់សញ្ញាអំពីការគាំទ្រខ្លាំងរបស់ខ្លួនដល់សិទ្ធិមនុស្សនិងសេរីភាពជាមូលដ្ឋាន៕
