តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ចាប់តាំងពីដើមខែធ្នូមក គឺតិចជាងមួយខែក្រោយការវាយប្រហារដោយក្រុមភេរវជនហាម៉ាស់លើជនស៊ិវីលអ៊ីស្រាអែល ពួកជនសកម្មប្រយុទ្ធ Houthi គាំទ្រដោយអ៊ីរ៉ង់បានចាប់ផ្តើមធ្វើការវាយប្រហារសឹងតែរាល់ថ្ងៃប្រឆាំងនឹងនាវាជំនួញបើកតាមច្រកសមុទ្រ Hab-el-Mandeb និងច្រកសមុទ្រ Hormuz។ បើតាមក្រសួងការពារជាតិសហរដ្ឋអាមេ រិកថាពួក Houthi បានធ្វើការវាយប្រហារដោយដ្រូននិងមីស៊ីលជាងមួយរយដងលើកប៉ាល់ជំនួញរបស់ប្រទេសជាង៣៥។
ច្រកសមុទ្រ Hab-el-Mandeb ភ្ជាប់សមុទ្រក្រហមជាមួយឈូងសមុទ្រ Adenហើយច្រកសមុទ្រHormuz ជាកន្លែងតភ្ជាប់រវាងឈូងសមុទ្រ Aden និងសមុទ្រអារ៉ាប់។ ច្រកសមុទ្រនេះជាផ្លូវសមុទ្រសំខាន់មួយ។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយថា«ការបង្កើនការវាយប្រហារកាលពីពេលថ្មីៗនេះដោយពួក Houthi ពីប្រទេសយេម៉េនគំរាមកំហែងលំហូរពាណិជ្ជកម្មដោយសេរី ធ្វើឱ្យគ្រោះថ្នាក់ដល់ពួកអ្នកដើរកប៉ាល់និងរំលោភលើច្បាប់អន្តរជាតិ»។
លោក Austinបានថ្លែងថា«ការវាយប្រហារទាំងនេះជាការមិនប្រយ័ត្នប្រយែង នាំឱ្យគ្រោះថ្នាក់និងជាការរំលោភលើច្បាប់អន្តរជាតិ។ ដូច្នេះ យើងចាត់វិធានការបង្កើតក្រុមចម្រុះអន្តរជាតិមួយដើម្បីដោះស្រាយការគំរាមកំហែងនេះ...ការណ៍នេះមិនមែនគ្រាន់ តែជាបញ្ហាមួយរបស់សហរដ្ឋអាមេរិកទេ វាជាបញ្ហាអន្តរជាតិមួយហើយស័ក្តិសមមានការឆ្លើយតបអន្តរជាតិ»។
កាលពីថ្ងៃទី១៨ធ្នូ លោករដ្ឋមន្ត្រី Austin បានប្រកាសអំពី«ការបង្កើតកិច្ចប្រតិបត្តិការ Prosperity Guardian ដែលជាការផ្តើមគំនិតថ្មីសំខាន់មួយខាងសន្តិសុខពហុជាតិនៅក្រោមការមើលការខុសត្រូវរបស់កងកម្លាំងសមុទ្រចម្រុះនិងកងកម្លាំងចំពោះលេខ១៥៣របស់កងកម្លាំងនេះ ដែលផ្តោតលើសន្តិសុខក្នុងសមុទ្រក្រហម។
នៅក្នុងជំនួបមួយតាមបណ្តាញវីដេអូកាលពីថ្ងៃទី១៨ធ្នូជាមួយពួកមេដឹកនាំកំពូលខាងការពារប្រទេសនៃប្រទេស៤៣និងពួកអ្នកតំណាងមកពីសហភាពអឹរ៉ុបនិងអង្គការអូ តង់ លោករដ្ឋមន្ត្រីAustin បានថ្កោលទោសការវាយប្រហារលើការដឹកជញ្ជូនអន្តរជាតិតាមកប៉ាល់និងពាណិជ្ជកម្មសាកលថាជាការមិនមានពីពេលមុនៗ ហើយលោកបានសុំឱ្យប្រទេសច្រើនជាងមុនចូលរួមក្នុងការប្រឹងប្រែងទប់ទល់នឹងការវាយប្រហារទាំងនេះ។
លោករដ្ឋមន្ត្រី Austin បានមានប្រសាសន៍ថា«កិច្ចប្រតិបត្តិការ Prosperity Guardian ប្រមូលផ្តុំប្រទេសជាច្រើនឱ្យ...ដោះស្រាយរួមគ្នានូវឧបសគ្គខាងសន្តិសុខក្នុងផ្នែកខាងត្បូងសមុទ្រក្រហមនិងឈូងសមុទ្រ Aden ដោយមានគោលដៅធ្វើឱ្យប្រាកដប្រជាអំពីនាវាចរណ៍ដោយសេរីសម្រាប់ប្រទេសទាំងអស់និងដើម្បីបង្កើនសន្តិសុខនិងភាពសំបូររុងរឿងក្នុងតំបន់»។
លោកបានថ្លែងបន្ថែមទៀតថា«សមុទ្រក្រហមជាផ្លូវទឹកដ៏សំខាន់មួយដែលចាំបាច់សម្រាប់សេរីភាពនាវាចរណ៍និងជាច្រករបៀងសមុទ្រសំខាន់មួយដែលសម្រួលពាណិជ្ជកម្មអន្តរជាតិ។ ពួកប្រទេសដែលប្រព្រឹត្តតាមគោលការណ៍ជាមូលដ្ឋាននៃសេរីភាពនាវាចរណ៍ត្រូវតែរួបរួមគ្នាដោះស្រាយបញ្ហាជាឧបសគ្គនេះដាក់ឱ្យមានដោយតួអង្គមិនមែនជារដ្ឋនេះដែលបានបាញ់មីស៊ីលនិងបង្ហោះដ្រូនវាយប្រហារកប៉ាល់ជំនួញរបស់ប្រទេសជាច្រើនដែលបានបើកបរត្រឹមត្រូវតាមច្បាប់កាត់ផ្លូវទឹកទាំងនេះ»៕
