តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
លោករដ្ឋមន្ត្រីការបរទេសសហរដ្ឋអាមេរិក Antony Blinken បានប្រកាសនៅក្នុងអំឡុងពេលធ្វើសន្និសីទសារព័ត៌មានក្រោយសន្និសីទថា្នក់រដ្ឋមន្ត្រីអាស៊ាននៅប្រទេសឡាវកាលពីពេលថ្មីៗនេះថា «ក្នុងរយៈពេលប៉ុន្មានឆ្នាំថ្មីៗនេះ សហរដ្ឋអាមេរិកនិងសមាគមប្រជាជាតិអាស៊ីអាគ្នេយ៍ ឬអាស៊ាន បានចាប់ផ្ដើមពង្រឹង និងពង្រីកទំនាក់ទំនងរបស់យើងឱ្យកាន់តែស៊ីជម្រៅគួរឱ្យកត់សម្គាល់»។
លោករដ្ឋមន្ត្រីការបរទេស Antony Blinken បានថ្លែងថា៖ «យើងបានធ្វើឱ្យទំនាក់ទំនងរបស់យើងក្លាយទៅជាភាពជាដៃគូយុទ្ធសាស្ត្រដ៏ទូលំទូលាយ ហើយយើងបានលើកកម្ពស់ការងាររួមគ្នាលើបញ្ហាឌីជីថល សន្តិសុខតាមអ៊ីនធឺណិត សុខភាព បរិស្ថាននិងអាកាសធាតុ ថាមពល ការដឹកជញ្ជូន ការពង្រឹងសិទ្ធិអំណាចរបស់ស្ត្រី – គឺកិច្ចការទាំងអស់នេះ ខណៈពេលជាមួយគ្នានេះពង្រឹងកិច្ចខិតខំប្រឹងប្រែងដែលមានរយៈពេលជាយូរមកហើយនៅក្នុងកិច្ចការបរទេស កិច្ចការសេដ្ឋកិច្ច និងវិស័យការពារជាតិ»។
លោក Blinken បានលើកឡើងថា៖ «ភាពជាដៃគូអាស៊ានត្រូវបានបង្កើតឡើងនៅលើតម្លៃរួម និងចក្ខុវិស័យរួមនៃតំបន់ឥណ្ឌូប៉ាស៊ីហ្វិកបើកចំហដែលមានសេរីភាព វិបុលភាព សុវត្ថិភាព ការភ្ជាប់ទំនាក់ទំនង និងមានភាពធន់»។ លោក Blinken បានសង្កត់ធ្ងន់ទៀតថា៖ «យើងប្តេជ្ញាចិត្តយ៉ាងខ្លាំងចំពោះភាពនៅជាកណ្តាលរបស់អាស៊ាន»។
លោក Blinken បានថ្លែងថា៖ «នេះមានន័យថា យើងនឹងបន្តធ្វើការជាមួយ និងតាមរយៈអាស៊ាន ដើម្បីដោះស្រាយបញ្ហាប្រឈមដ៏ធំបំផុត ខណៈពេលដែលចាប់យកនូវអ្វីដែលយើងមើលឃើញថាជាឱកាសស្ទើរតែគ្មានដែនកំណត់។ ទំនាក់ទំនងពាណិជ្ជកម្ម និងសេដ្ឋកិច្ចរបស់យើងមានភាពរឹងមាំយ៉ាងខ្លាំង ដោយមានពាណិជ្ជកម្ម និងការវិនិយោគទៅវិញទៅមកដែលគាំទ្រដល់ការងារនៅក្នុងតំបន់អាស៊ីអាគ្នេយ៍នេះ និងនៅសហរដ្ឋអាមេរិក បង្កើនអនាគតសេដ្ឋកិច្ចសម្រាប់អាជីវកម្ម និងអ្នកធ្វើការនៅអាមេរិកនិងអាស៊ាន។ សហរដ្ឋអាមេរិកមានមោទនភាពយ៉ាងខ្លាំងដែលខ្លួនជាប្រភពទីមួយនៃការវិនិយោគផ្ទាល់ពីបរទេសនៅទូទាំងតំបន់អាស៊ាន»។
លោក Blinken បានថ្លែងថា អាស៊ានក៏ត្រូវធ្វើការរួមគ្នាដើម្បីដោះស្រាយបញ្ហាប្រឈមចំពោះចក្ខុវិស័យរួមនេះផងដែរ។
លោក Blinken បានថ្លែងបន្តថា៖ «មិនថាវាជាការឈ្លានពានខុសច្បាប់របស់រុស្ស៊ីទៅលើអ៊ុយក្រែន កម្មវិធីអាវុធនុយក្លេអ៊ែរនិងកាំជ្រួចមីស៊ីលរបស់កូរ៉េខាងជើង វិបត្តិនិងភាពសោកសៅដែលកំពុងបន្តកើតមាននៅក្នុងប្រទេសភូមា ឬសកម្មភាពខុសច្បាប់និងកំពុងកើនឡើងរបស់សាធារណរដ្ឋប្រជាមានិតចិន (PRC) ដែលធ្វើឡើងប្រឆាំងនឹងហ្វីលីពីននៅសមុទ្រចិនខាងត្បូងក្នុងរយៈពេលប៉ុន្មានខែចុងក្រោយនេះ។ ចំពោះរឿងនោះ យើងមានសេចក្តីសោមនស្សរីករាយក្នុងការកត់សម្គាល់អំពីការផ្គត់ផ្គង់ឡើងវិញដោយជោគជ័យនៅថ្ងៃនេះដល់ប្រជុំកោះ Second Thomas Shoal ដែលជាលទ្ធផលចេញពីកិច្ចព្រមព្រៀងដែលសម្រេចបានរវាងហ្វីលីពីន និងចិន។ យើងសាទរចំពោះរឿងនេះ ហើយសង្ឃឹមថានឹងឃើញវាបន្តទៅមុខទៀត»។
លោករដ្ឋមន្ត្រី Blinken បាននិយាយថា សហរដ្ឋអាមេរិកទន្ទឹងរង់ចាំក្នុងការធ្វើឱ្យភាពជាដៃគូជាមួយអាស៊ានកាន់តែរឹងមាំ និង«ដោះស្រាយបញ្ហាបន្ទាន់បំផុតដែលកំពុងកើតមានក្នុងពេលសព្វថ្ងៃនេះ ជាពិសេសបញ្ហាដែលជះឥទ្ធិពលផ្ទាល់ដល់ជីវិតរបស់ប្រជាពលរដ្ឋទាំងអស់របស់យើង។ លោកថ្លែងបន្តទៀតថា «យើងជាអ្នកទទួលខុសត្រូវចំពោះពួកគេ ហើយគោលបំណងនៃភាពជាដៃគូនេះគឺធ្វើកិច្ចការទាំងនោះឱ្យបានត្រឹមត្រូវ»៕
