តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
កាលពីថ្ងៃទី១៥ ខែកក្កដា របបស៊ីរីបានរៀបចំការបោះឆ្នោតសភា។ ដូចការបោះឆ្នោតបីលើកមុនៗដែរដែលត្រូវបានរៀបចំដោយរដ្ឋាភិបាលលោក Assad ចាប់តាំងពីការចាប់ផ្តើមនៃសង្រ្គាមស៊ីវិលនៅស៊ីរីក្នុងឆ្នាំ២០១១ លទ្ធផលនៃការបោះឆ្នោតត្រូវបានកំណត់ទុកជាមុនជាស្រេច ការបោះឆ្នោតជាការអនុវត្តការិយាធិបតេយ្យដែលមានន័យថាជាការបំភាន់ភាពស្របច្បាប់ និងការត្រួតត្រាលើប្រទេសដែលហែកហួរដោយសង្រ្គាម ហើយការបោះឆ្នោតនេះមិនបានប្រព្រឹត្តិទៅប្រកបដោយសណ្តាប់ធ្នាប់ដើម្បីឆ្ពោះទៅរកអភិបាលកិច្ចដែលអាចជឿទុកចិត្តបាន មានលក្ខណៈរួមបញ្ចូល និងមិនប្រកាន់បក្សពួកតាមសេចក្តីសម្រេចលេខ ២២៥៤ របស់ក្រុមប្រឹក្សាសន្តិសុខអង្គការសហប្រជាជាតិនោះទេ។
អ្នកតំណាងបម្រុងរបស់សហរដ្ឋអាមេរិកសម្រាប់កិច្ចការនយោបាយពិសេសប្រចាំនៅអង្គការសហប្រជាជាតិលោក Robert Wood បានថ្លែងថា៖ «យើងមិនទទួលស្គាល់ការបោះឆ្នោតសភានៅថ្ងៃទី១៥ ខែកក្កដា ដែលរៀបចំឡើងដោយរបបគ្រប់គ្រងនៅស៊ីរីនោះទេ»។
លោក Robert Wood បានថ្លែងទៀតថា៖ «អ្វីដែលរបបគ្រប់គ្រងនៅស៊ីរីហៅថាការបោះឆ្នោតទាំងនោះ មានភាពខ្វះចន្លោះសូម្បីតែការក្លែងបន្លំនៃសេរីភាព ឬយុត្តិធម៌ ការបោះឆ្នោតទាំងនោះគឺគ្រាន់តែដូចជាត្រាកៅស៊ូដែលត្រូវបានបោះដើម្បីជាការបន្តកាន់អំណាចផ្តាច់ការរបស់លោក Bashar al-Assad ប៉ុណ្ណោះ។ គ្មានប្រទេសណាត្រូវបានបោកបញ្ឆោតដោយសកម្មភាពដ៏គួរឱ្យអាម៉ាស់ដូចនេះទេ។ ប្រជាពលរដ្ឋស៊ីរីរឹតតែមិនត្រូវបានបោកបញ្ឆោតទេ»។
លោក Wood បានថ្លែងបន្តទៀតថា៖ «យើងសូមនិយាយឱ្យច្បាស់ថា៖ សហរដ្ឋអាមេរិកនឹងមិនធ្វើឱ្យមានទំនាក់ទំនងធម្មតាជាមួយរបបគ្រប់គ្រងនៅស៊ីរី ឬដកទណ្ឌកម្មឡើយ បើសិនជាគ្មានដំណោះស្រាយនយោបាយពិតប្រាកដ និងយូរអង្វែងទេនោះ»។
លោក Wood បានថ្លែងទៀតថា៖ «ការដាក់ទណ្ឌកម្មរបស់សហរដ្ឋអាមេរិក គឺជាមធ្យោបាយដ៏សំខាន់មួយដើម្បីជំរុញឱ្យរបបលោក Assad ទទួលខុសត្រូវ ជាពិសេសទាក់ទងនឹងកំណត់ត្រាដ៏គួរឱ្យរន្ធត់របស់ខ្លួនស្តីពីការរំលោភសិទ្ធិមនុស្ស និងការរំលោភបំពានទៅលើប្រជាពលរដ្ឋស៊ីរី»។
លោក Wood បានថ្លែងទៀតថា៖ «ការប្តេជ្ញារបស់យើងក្នុងការលើកកម្ពស់ឱ្យអ្នកទាំងឡាយណាដែលទទួលខុសត្រូវចំពោះអំពើឃោរឃៅនៅក្នុងប្រទេសស៊ីរី និងយុត្តិធម៌សម្រាប់ជនរងគ្រោះ មកទទួលខុសត្រូវចំពោះមុខច្បាប់ គឺមិនមានការផ្លាស់ប្តូរទេ។ បើគ្មានការទទួលខុសត្រូវទេ ប្រជាពលរដ្ឋស៊ីរីនឹងមិនទទួលបានសន្តិភាព ស្ថិរភាព យុត្តិធម៌ និងភាពស្ថិតស្ថេរឡើយ»។
លោក Wood បានថ្លែងបន្តថា៖ «ការដាក់ទណ្ឌកម្មរបស់សហរដ្ឋអាមេរិកទៅលើរបបគ្រប់គ្រងស៊ីរីគឺមិន – ហើយខ្ញុំសូមបញ្ជាក់ម្តងទៀតថា គឺមិនផ្តោតទៅលើការផ្តល់សម្ភារៈមនុស្សធម៌ ដែលរួមទាំងថ្នាំពេទ្យ ការផ្គត់ផ្គង់ផ្នែកវេជ្ជសាស្រ្ត និងម្ហូបអាហារដល់ប្រទេសស៊ីរីឡើយ។ កម្មវិធីដាក់ទណ្ឌកម្មទៅលើប្រទេសស៊ីរីរបស់យើងគឺមានផ្តល់នូវការអនុញ្ញាត ការលើកលែង និងអាជ្ញាប័ណ្ណទូទៅសម្រាប់ជំនួយមនុស្សធម៌»។
លោក Wood បាននិយាយទៀតថា៖ «វាមានរយៈពេល១៣ ឆ្នាំហើយចាប់តាំងពីបដិវត្តន៍នៅស៊ីរីបានចាប់ផ្តើម ហើយរបបនេះនៅតែបន្តប្រើអំពើហិង្សាដើម្បីបង្ក្រាបទៅការទាមទារដោយសន្តិភាព ស្របច្បាប់ និងមានប្រជាប្រិយភាពសម្រាប់សេរីភាព និងលទ្ធិប្រជាធិបតេយ្យ»។
លោក Wood បាននិយាយបន្ថែមទៀតថា៖ «ការបោះឆ្នោតនៅក្នុងប្រទេសស៊ីរីត្រូវតែមានលក្ខណៈសេរី យុត្តិធម៌ តម្លាភាព និងមានលក្ខណៈរួមបញ្ចូល ដូចដែលបានអំពាវនាវនៅក្នុងសេចក្តីសម្រេចលេខ ២២៥៤។ យើងនឹងមិនធ្វើឱ្យមានភាពស្របច្បាប់ចំពោះការបោះឆ្នោតដែលត្រូវបានរៀបចំឡើងដែលមានភាពស្របច្បាប់ និងភាពប្រក្រតីតែសម្បកក្រៅនោះទេ»៕
