តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ក្រសួងការបរទេសស.រ.អ. បានដាក់កំហិតការរឹតត្បិតខាងទិដ្ឋាការលើបុគ្គល៤៣នាក់ថែមទៀត ដែលទទួលខុសត្រូវលើការធ្វើឱ្យអន្តរាយដល់លទ្ធិប្រជាធិបតេយ្យក្នុងប្រទេសបេឡារុស ដោយធ្វើឱ្យពួកគេគ្មានសិទ្ធិចូលស.រ.អ.។ ពួកបុគ្គលទាំងនេះ រួមមានពួកមន្ត្រីជាន់ខ្ពស់ក្នុងវិស័យយុត្តិធម៌ ពួកមន្ត្រីខាងការពង្រឹងច្បាប់ដែលបានឃាត់ខ្លួននិងរំលោភលើក្រុមបាតុករដោយសន្តិវិធី ពួកចៅក្រមនិងពួករដ្ឋអាជ្ញាដែលកាត់ទោសពួកអ្នកតវ៉ាដោយសន្តិវិធី និងពួកអ្នកកាសែតឱ្យជាប់ពន្ធនាគារហើយនឹងពួកអ្នករដ្ឋបាលសាកលវិទ្យាល័យដែលបានគំរាមកំហែងក្រុមនិស្សិតមិនឱ្យចូលរួមក្នុងបាតុកម្មដោយសន្តិវិធី។
រដ្ឋមន្ត្រីការបរទេសស.រ.អ. លោក Anthony Bliken បានមានប្រសាសន៍ថា៖
« ស.រ.អ. នៅតែភ្ញាក់ផ្អើលនឹងរបបគ្រប់គ្រងរបស់លោក Alyaksandr Lukashenka ដែលនៅតែបន្តបង្ក្រាបយ៉ាងឃោរឃៅលើក្រុមបាតុការដោយសន្តិវិធី ពួកសកម្មជនប្រជាធិបតេយ្យ និងក្រុមអ្នកកាសែត»។
សកម្មភាពនាំឱ្យខ្វល់ខ្វាយឯទៀតៗ រួមមានការការឆ្មក់ចូលឆែកកាលពីពេលថ្មីៗនេះនៅអង្គការសិទ្ធិមនុស្ស Vyasna សមាគមអ្នកសារព័ត៌មានបេឡារុស និងសហជីពកម្មករពាណិជ្ជកម្មឯករាជ្យ។ ម្យ៉ាងវិញទៀត កាលពីថ្ងៃទី១៨ ខែកុម្ភៈ ចៅក្រម បេឡារុសម្នាក់ បានសម្រេចថា អ្នកយកព័ត៌មានឈ្មោះ Katsiaryna Andreyeva និង Darya Chultsova មានទោស«ពីបទចាត់ចែងព្រឹត្តិការណ៍សាធារណៈមានគោលដៅបង្អាក់សណ្តាប់ធ្នាប់ស៊ីវិល»។ នៅក្នុងសេចក្តីថ្លែងការណ៍ចុងក្រោយបង្អស់របស់ពួកគេក្នុងសាលតុលាការ អ្នកនាង Andreyeva និងអ្នកនាង Chultsova បានច្រានចោលការចោទប្រកាន់ប្រឆាំងនឹងពួកគេ ដោយហៅការចោទប្រកាន់ទាំងនេះថា មកពីហេតុផលនយោបាយ។
នៅក្នុងការដាក់កំហិតកាលពីមុនចំនួនពីរលើក ស.រ.អ. បានដាក់ឱ្យមានការរឹតត្បិតខាងទិដ្ឋាការលើពួកបុគ្គល៦៦នាក់ ដែលត្រូវបានកំណត់ថា ជាអ្នកទទួលខុសត្រូវធ្វើឱ្យអន្តរាយដល់លទ្ធិប្រជាធិបតេយ្យក្នុងប្រទេសបេឡារុស។ ពួកបុគ្គលទាំងនោះ មានរួមបញ្ចូលពួកមន្ត្រីជាន់ខ្ពស់នៃរបបគ្រប់គ្រងរបស់លោក Lukashenka ព្រមទាំងជនជាតិរុស្ស៊ី និងបេឡារុស ដែលរួមគំនិត ក្នុងការរារាំងការងាររបស់បណ្តាញផ្សាយព័ត៌មានឯករាជ្យ ឬធ្វើឱ្យអន្តរាយដល់អធិបតេយ្យភាពនៃសេរីភាពបណ្តាញផ្សាយព័ត៌មានក្នុងប្រទេសបេឡារុស។ ជាសរុប បុគ្គលទាំងអស់ចំនួន១០៩នាក់ត្រូវបានស.រ.អ.ការរឹតត្បិតខាងទិដ្ឋាការ។
មានប្រជារាស្ត្របេឡារុសរាប់ម៉ឺននាក់ បានធ្វើបាតុកម្មតាមដងផ្លូវជាបន្ទាន់នៅក្រោយការបោះឆ្នោតប្រធានាធិបតីថ្ងៃទី៩ ខែសីហា ដែលមានការគៃបន្លំសន្លឹកឆ្នោត ហើយក្រុមបាតុករដោយសន្តិវិធីបានប្រមូលផ្តុំគ្នារៀងរាល់សប្តាហ៍ចាប់តាំងពីពេលនោះមក។ ក្រុមបាតុករបានទាមទារឱ្យលោក Lukashenka ចុះចេញពីតំណែងហើយឱ្យមានការបោះឆ្នោតជាថ្មី តែរហូតមកដល់ពេលនេះ លោកមិនបានធ្វើតាមការទាមទារទាំងនេះទេ។ ពួកមន្ត្រីសន្តិសុខបានចាប់ខ្លួនមនុស្សរាប់ម៉ឺននាក់ ហើយបានបណ្តេញចេញក្រៅប្រទេស ឃាត់ខ្លួន និងគំរាមកំហែងពួកឥស្សរជនប្រឆាំងជាន់ខ្ពស់ថែមទៀតផង។
បាតុករមួយចំនួន ត្រូវបានសម្លាប់ក្នុងអំពើហិង្សា ហើយបើតាមអង្គការសិទ្ធិមនុស្សនៅទីនោះថា មានភ័ស្តុតាងគួរឱ្យជឿទុកចិត្តបានថា មានការធ្វើទារុណកម្មប្រឆាំងនឹងក្រុមជនជាប់ឃុំឃាំងផងដែរ។
លោករដ្ឋមន្ត្រី Blinken បានប្រកាសថា ស.រ.អ.នៅតែបន្តគាំទ្រដល់កិច្ចខិតខំប្រឹងប្រែងអន្តរជាតិក្នុងការស៊ើបអង្កេតដោយឯករាជ្យអំពីភាពមិនប្រក្រតីនៃការបោះឆ្នោតនៅក្នុងប្រទេសបេឡារុស ការរំលោភលើសិទ្ធិមនុស្សទាក់ទិននឹងការបោះឆ្នោត និងការបង្ក្រាបដែលមានបន្ទាប់មក។ លោករដ្ឋមន្ត្រីការបរទេសស.រ.អ. បានមានប្រសាសន៍ថា៖
«យើងឈរជាមួយប្រជារាស្ត្រដ៏ក្លាហាននៃប្រទេសបេឡារុស ហើយទ្រទ្រង់សិទ្ធិពួកគេក្នុងការបោះឆ្នោតដោយសេរី និងដោយយុត្តិធម៌»៕
