Accessibility links

Breaking News

បទវិចារណកថា៖ ការលើក​កម្ពស់​សិទ្ធិ​របស់​កុមារី


រូបឯកសារ៖ ស្ត្រី​អាហ្វហ្គានីស្ថាន​កាន់​បដា​អំឡុង​ពេល​នៃ​ការតវ៉ា​នៅ​មុខ​សកលវិទ្យាល័យ​កាប៊ុល ក្នុង​ក្រុង​កាប៊ុល កាល​ពី​ថ្ងៃ​ទី១៨ ខែ​តុលា ឆ្នាំ​២០២២។

តទៅនេះ​ គឺ​ជា​បទ​វិចារណកថា​ដែល​ឆ្លុះ​បញ្ចាំង​អំពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

ឯកអគ្គរដ្ឋទូត​សហរដ្ឋ​អាមេរិក​ប្រចាំ​អង្គការ​សហប្រជាជាតិ​អ្នកស្រី Linda Thomas Greenfield បាន​និយាយ​ថា៖ «កុមារី​គ្រប់​រូប​សក្តិសម​នឹង​រស់នៅ​ក្នុង​ពិភពលោក​មួយ​ដែល​គ្មាន​អំពើ​ហិង្សា​យេនឌ័រ​និង​ការ​រើសអើង ដែល​ពួកគេ​អាច​មាន​លទ្ធភាព​ទទួល​បាន​ការ​អប់រំ​ដែល​មាន​គុណភាព សេវា​សុខាភិបាល និង​ឱកាស​ការងារ​នៅ​ពេល​អនាគត»។

ជា​ការពិត ទាំង​នេះ​គឺ​ជា​សិទ្ធិ​របស់​កុមារី​គ្រប់​រូប។ ការ​ធានា​ថា​ សិទ្ធិ​ទាំង​នេះ​ត្រូវ​បាន​ការពារ​គឺ​ពិតជា​សំខាន់​ដើម្បី​បញ្ចប់​ភាព​ក្រីក្រ​តោកយ៉ាក​ និង​បង្កើន​ភាព​រុងរឿង​រួម​នៃ​សង្គម ​ឬ​ក៏​ប្រទេស​ណា​មួយ។

ការ​វិនិយោគ​លើ​ការ​អប់រំ​របស់​កុមារី​គឺ​ផ្ដល់​ផល​ប្រយោជន៍​មិន​ត្រឹមតែ​ដល់​កុមារី​ខ្លួន​ឯង​ផ្ទាល់​ប៉ុណ្ណោះ​ទេ ប៉ុន្តែ​ថែម​ទាំង​ដល់​សហគមន៍​របស់​ពួកគេ​ទៀត​ផង។

បើ​យោង​តាម​ធានាគារ​ពិភពលោក កុមារី​ដែល​ទទួល​បាន​ការ​អប់រំ​កម្រិត​ធម្យម​សិក្សា​នឹង​ធំធាត់​ក្លាយ​ទៅ​ជា​ស្ត្រី​ដែល​មាន​ការ​យល់​ដឹង​ប្រសើរ​អំពី​អាហារូបត្ថម្ភ​និង​ការ​ថែ​រក្សា​សុខភាព។ ពួកគេ​នឹង​មិន​ទំនង​ជា​រៀបការ​នៅ​មុន​អាយុ ១៨ ឆ្នាំ​នោះ​ទេ ហើយ​ពួកគេ​នឹង​មាន​កូន​តិច។ ពួកគេ​ក៏​នឹង​ទំនង​ជា​ធ្វើការ​នៅ​ខាង​ក្រៅ​នឹង​រក​ចំណូល​បាន​ខ្ពស់​ផង​ដែរ។ ជា​លទ្ធផល ពួកគេ​នឹង​មាន​កូន​ដែល​មាន​សុខភាព​ល្អ​និង​ការ​អប់រំ​ល្អ ដែល​កូនៗ​ទាំង​នោះ​នឹង​មាន​កូន​បន្ត​ដែល​មាន​ការ​អប់រំ​និង​សុខភាព​ល្អ​ផង​ដែរ។

ទោះជា​យ៉ាង​ណា​ក៏ដោយ នៅ​ក្នុង​ប្រទេស​ជា​ច្រើន កុមារី​ប្រឈម​នឹង​ឧបសគ្គ​នៅ​ក្នុង​ការ​បញ្ចប់​ការ​សិក្សា​របស់​ពួកគេ។ ធនាគារ​ពិភពលោក​បាន​ព្រមាន​ថា សង្គម​ណា​ដែល​រារាំង​កុមារី​មិន​ឱ្យ​បញ្ចប់​ការ​សិក្សា​មូលដ្ឋាន​រយៈពេល ១២ ឆ្នាំ នឹង​បាត់បង់​ផលិតភាព​និង​ប្រាក់​ចំណូល​ពេញ​មួយ​ជីវិត​ចន្លោះ​ពី ១៥ លាន​លាន​ដុល្លារ​ទៅ ៣០ លាន​លាន​ដុល្លារ។

វា​ជា​រឿង​សំខាន់​ដែល​ត្រូវ​កត់​សម្គាល់​ថា ឧបសគ្គ​ដែល​កុមារី​ប្រឈម​នឹង​ជះ​ផល​ប៉ះពាល់​ដោយ​ផ្ទាល់​លើ​លទ្ធភាព​របស់​ពួកគេ​នៅ​ក្នុង​ការ​សិក្សា​និង​បញ្ចេញ​សមត្ថភាព​ឱ្យ​បាន​ពេញលេញ។

ដំបូង កុមារី​ជា​រឿយៗ​មាន​អារម្មណ៍​ថា​មិន​មាន​សុវត្ថិភាព​នៅ​ពេល​សិក្សា​នៅ​ក្នុង​សាលារៀន​និង​នៅ​ពេល​ធ្វើ​ដំណើរ​ទៅ​និង​មក​ពី​សាលារៀន។ អំពើ​ហិង្សា​យេនឌ័រ​គឺ​ជា​មូលហេតុ​មួយ​ដែល​ប្រហែល​ជា​ធ្វើ​ឱ្យ​ពួកគេ​មិន​អាច​បញ្ចប់​ការ​សិក្សា​របស់​ពួកគេ​បាន។

ភាព​លំអៀង​ខាង​យេនឌ័រ​នៅ​ក្នុង​ថ្នាក់​រៀន​ក៏​ជា​បញ្ហា​ប្រឈម​មួយ​ទៀត​ផង​ដែរ។ ទស្សនៈ​សន្មត​ទុក​នានា​ពាក់ព័ន្ធ​នឹង​យេនឌ័រ​មាន​ផល​ប៉ះពាល់​អវិជ្ជមាន​រយៈពេល​វែង​លើ​ការ​ឱ្យ​តម្លៃ​លើ​ខ្លួន​ឯង​និង​ការ​សិក្សា​របស់​កុមារី ក៏​ដូចជា​លើ​ជម្រើស​របស់​ពួកគេ​នៅ​ក្នុង​ការ​ជ្រើសរើស​មុខវិជ្ជា​សិក្សា​ផង​ដែរ។

កុមារី​ត្រូវតែ​ទទួល​បាន​ឱកាស​នៅ​ក្នុង​ការ​បញ្ចប់​ការ​សិក្សា​គ្រប់​កម្រិត​ទាំងអស់ និង​នៅ​ក្នុង​ការ​សិក្សា​ជំនាញ​នានា​ដែល​ចាំបាច់​ដើម្បី​ប្រជែង​នៅ​ក្នុង​ទីផ្សារ​ការងារ។ ពួកគេ​ត្រូវតែ​មាន​សិទ្ធិ​នៅ​ក្នុង​ការ​សម្រេច​លើ​ជីវិត​ផ្ទាល់​ខ្លួន​របស់​ពួកគេ និង​នៅ​ក្នុង​ការ​រួម​ចំណែក​ដល់​សហគមន៍​និង​ប្រទេស​របស់​ពួកគេ។

អ្នកស្រី​ឯកអគ្គរដ្ឋទូត Thomas Greenfield បាន​និយាយ​ថា៖ «សហរដ្ឋ​អាមេរិក​នៅតែ​តាំងចិត្ត​លើក​កម្ពស់​និង​ការពារ​សិទ្ធិ​របស់​កុមារី​និង​ស្ត្រី​វ័យ​ក្មេង​គ្រប់​រូប។ យើង​អំពាវនាវ​ឱ្យ​ពិភពលោក​សហការ​ជាមួយ​យើង​ដើម្បី​ធានា​ថា​ កុមារី​មាន​លទ្ធភាព​ទទួល​បាន​ម្ហូប​អាហារ​និង​ទឹក​បរិភោគ​ដែល​មាន​សុវត្ថិភាព ការ​អប់រំ សេវា​សុខាភិបាល​និង​វ៉ាក់សាំង និង​អនាគត​មួយ​ដែល​គ្មាន​អំពើ​ហិង្សា​ដែល​សិទ្ធិ​របស់​ពួកគេ​ត្រូវ​បាន​គេ​គោរព»។

អ្នកស្រី​បាន​បន្ថែម​ថា៖ «យើង​ដឹង​ថា នៅ​ពេល​ដែល​កុមារី​មាន​លទ្ធភាព​នៅ​ក្នុង​ការ​ចូលរួម​ដោយ​សេរី​និង​ពេញលេញ​នៅ​ក្នុង​ការ​ពិភាក្សា​ណា​មួយ​នៅ​កម្រិត​សាកលលោក យើង​ទាំងអស់​គ្នា​នឹង​មាន​ភាព​ប្រសើរ​ជាង​មុន»៕

XS
SM
MD
LG