តទៅនេះ ជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សាធារណរដ្ឋប្រជាធិតេយ្យប្រជាមានិតកូរ៉េ ឬកូរ៉េខាងជើង DPRK កំពុងបន្តការសាកល្បងអាវុធនុយក្លេអ៊ែរក្នុងទ្រង់ទ្រាយធំក្នុងឆ្នាំនេះ។ រហូតមកដល់ថ្ងៃទី១៤ ខែតុលាកន្លងទៅនេះ កូរ៉េខាងជើងបានបាញ់កាំជ្រួចមីស៊ីលបាលីស្ទិកចំនួន៤៤គ្រាប់នៅក្នុងឆ្នាំនេះដែលក្នុងនោះក៏មានមីស៊ីលបាលីស្ទិកអន្តរទ្វីបចំនួន៦គ្រាប់ផងដែរ។
ជាការឆ្លើយតប សហរដ្ឋអាមេរិកបានដាក់ទណ្ឌកម្មទៅលើបុគ្គល២រូបនិងស្ថាប័នចំនួន៣ដែលពាក់ព័ន្ធទៅនឹងការដឹកជញ្ជូនប្រេងទៅឱ្យកូរ៉េខាងជើងដែលជាការផ្តល់ការគាំទ្រដោយផ្ទាល់ទៅលើការអភិវឌ្ឃកម្មវិធីអាវុធ និងកងទ័ពរបស់កូរ៉េខាងជើង។
ការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុសហរដ្ឋអាមេរិក ឬ OFAC បានដាក់ក្រុមហ៊ុន New Eastern Shipping Co Ltd និងបុគ្គលឈ្មោះ Kwek Kee Seng និងបុគ្គល Chen Shih Huan ថាបានចូលរួមក្នុងការផ្ទេរ ឬដឹកជញ្ជូនផលិតផលប្រេងចម្រាញ់ទៅឱ្យកូរ៉េខាងជើង។ ការិយាល័យ OFAC របស់អាមេរិក ក៏បានដាក់បញ្ជូលអង្គភាព២ដែលមានបុគ្គលទាំងពីររូបនេះធ្វើជាម្ចាស់ឬជាអ្នកគ្រប់គ្រងផងដែរ។
ដោយសារចំណាត់ការទាំងនេះ ទ្រព្យសម្បតិ្ត ឬផលប្រយោជន៍ទាំងអស់របស់បុគ្គលនិងស្ថាប័នទាំងនោះដែលស្ថិតនៅក្នុងសហរដ្ឋអាមេរិក ឬក៏ត្រូវបានកាន់កាប់ដោយបុគ្គលផ្សេងក្នុងសហរដ្ឋអាមេរិកនឹងត្រូវរាំងខ្ទប់ហើយនឹងរាយការណ៍ទៅការិយាល័យ OFAC។ បទបញ្ញត្តិរបស់ការិយាល័យ OFAC ជាទូទៅ បានហាមប្រាមរាល់ការធ្វើទំនាក់ទំនងដោយជនជាតិអាមេរិក ឬបុគ្គលនៅក្នុងសហរដ្ឋអាមេរិកដែលពាក់ព័ន្ធនឹងទ្រព្យសម្បត្តិ ឬផលប្រយោជន៍នៃទ្រព្យសម្បត្តិនៃបុគ្គលដែលត្រូវបានរេរាំងទាំងនេះ។
សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិបានហាមប្រាមដល់ការផ្ទេរចេញ ឬផ្ទេរចូលពីនាវាដែលមានទង់ជាតិកូរ៉េខាងជើងនិងបានដាក់កម្រិតដល់ការនាំចូលរបស់កូរ៉េខាងជើងនូវផលិតផលប្រេងចំនួន៥សែនបារ៉ែលក្នុងមួយឆ្នាំ ចាប់តាំងពីឆ្នាំ ២០១៨ មក ដែលជាការហាមប្រាមមួយ ដែលកូរ៉េខាងជើងបានរំលោភបំពានជារៀងរាល់ឆ្នាំ ចាប់តាំងពីខ្លួនត្រូវបានដាក់ទណ្ឌកម្មមក។ ការនាំចូលនូវប្រេងចម្រាញ់ណាមួយទៅកាន់ប្រទេសកូរ៉េខាងជើង ក្រោមចំណាត់ការហាមប្រាមនោះជាការខុសច្បាប់ ប្រសិនបើមិនបានរាយការណ៍ប្រាប់ទៅគណៈកម្មាធិការ ១៧១៨ របស់អង្គការសហប្រជាជាតិនោះទេ។
លោក Brian Nelson អនុរដ្ឋមន្ត្រីទទួលបន្ទុកកិច្ចការប្រឆាំងភេរវកម្ម និងផ្នែកស៊ើបអង្កេតហិរញ្ញវត្ថុនៃក្រសួងការបរទេសសហរដ្ឋអាមេរិកបានឱ្យដឹងថា «ការបាញ់មីស៊ីលបាលីស្ទិករយៈចម្ងាយឆ្ងាយរបស់កូរ៉េខាងជើង ដែលក្នុងនោះក៏មានការបាញ់រំលងពីលើប្រទេសជប៉ុនផងដែរ ជាការបង្ហាញនូវការបន្តមិនគោរពនូវសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ។ សហរដ្ឋអាមេរិកនឹងបន្តពង្រឹងការ អនុវត្តដាក់ទណ្ឌកម្មចម្រុះ និងតាមដាននូវការព្យាយាមគេចពីការដាក់ទណ្ឌកម្មរបស់កូរ៉េខាងជើងនៅជុំវិញពិភពលោកដែលក្នុងនោះក៏រួមមានទាំងការដាក់បញ្ជូលនូវជនទាំងឡាយណាដែលជួយជ្រោមជ្រែងគាំទ្រនូវសកម្មភាពបំពានរបស់កូរ៉េខាងជើងផងដែរ៕
បទវិចារណកថា៖ កូរ៉េខាងជើងត្រូវបានដាក់ក្នុងបញ្ជីដែលបំពាននឹងបម្រាមទណ្ឌកម្មអង្គការសហប្រជាជាតិ
