តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
អស់រយៈពេល ៧ ឆ្នាំមកហើយដែលលោក Boris Nemtsov បានបូជាជីវិតសម្រាប់ការបម្រើប្រទេសជាតិរបស់លោក។
កាលពីថ្ងៃទី ២៧ ខែកុម្ភៈ ឆ្នាំ ២០១៥ លោក Nemtsov ដែលជាមេដឹកនាំគណបក្សប្រឆាំងនៅរុស្ស៊ីនិងជាអ្នករិះគន់ប្រធានាធិបតីរុស្ស៊ីលោក Vladimir Putin ត្រូវបានគេបាញ់ជាច្រើនគ្រាប់ពីក្រោយខ្នង នៅពេលដែលលោកដើរកម្សាន្តនៅលើស្ពាន Bolshoy Moskvoretsky ជាមួយមិត្តស្រីជនជាតិអ៊ុយក្រែនរបស់លោក។
ការស៊ើបអង្កេតលើអំពើឃាតកម្មនេះ បានឈានទៅដល់ការផ្តន្ទាទោសបុរសជាតិសាសន៍ Chechen ៥ នាក់ ដែលបានស៊ីឈ្នួលធ្វើឃាត ប៉ុន្តែមិនបានរកឃើញអត្តសញ្ញាណរបស់អ្នកដែលបញ្ជាឱ្យធ្វើឃាតនោះទេ ដែលគេនៅតែមិនដឹងរហូតមកដល់ពេលសព្វថ្ងៃនេះ។
អង្គការសន្តិសុខនិងកិច្ចសហប្រតិបត្តិការអឺរ៉ុប (OSCE) និងអង្គការក្រុមប្រឹក្សាអឺរ៉ុប (Council of Europe) បានស្នើឱ្យអាជ្ញាធររុស្ស៊ីធ្វើការស៊ើបអង្កេតថ្មីប្រកបដោយតម្លាភាព ប៉ុន្តែអាជ្ញាធររុស្ស៊ី បានច្រានចោលសំណើនោះ។
លោក Nemtsov គឺជាអ្នកកំណែទម្រង់ និងជាសកម្មជនប្រឆាំងនឹងអំពើពុករលួយ ដែលបម្រើប្រទេសរុស្ស៊ីក្នុងតួនាទីជាច្រើនដូចជានៅក្នុងរដ្ឋាភិបាលជាតិ នៅក្នុងសភា នៅក្នុងនាមជាអភិបាលនៃតំបន់ Nizhny Novgorod Oblast និងនៅក្នុងនាមជាមេដឹកនាំនយោបាយជាដើម។ លោកមានគោលបំណងជួយប្រជាពលរដ្ឋរុស្ស៊ីឱ្យមានសំឡេងប្រសើរជាងមុននៅក្នុងការដឹកនាំប្រទេសរបស់ពួកគេ។
លោក គឺជាអ្នករិះគន់មិនសំចៃមាត់លើការប៉ុនប៉ងរបស់រុស្ស៊ីនៅក្នុងការកាន់កាប់តំបន់ Crimea របស់ប្រទេសអ៊ុយក្រែនកាលពីឆ្នាំ ២០១៤។
ជាងនេះទៀត លោក គឺជាអ្នកគាំទ្រនាំមុខម្នាក់លើការតវ៉ាប្រឆាំងនឹងគោលនយោបាយរបស់រុស្ស៊ីលើអ៊ុយក្រែន ដែលការតវ៉ានោះ ត្រូវបានគ្រោងធ្វើឡើងនៅក្នុងរដ្ឋធានីមូស្គូនៅថ្ងៃទី ១ ខែមីនាឆ្នាំ ២០១៥ គឺក្នុងពេលពីរថ្ងៃក្រោយមក បន្ទាប់ពីលោក ត្រូវបានគេលួចធ្វើឃាត។
នៅក្នុងសេចក្ដីថ្លែងការណ៍មួយអំពីខួបនៃការស្លាប់របស់លោក អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានកត់សម្គាល់ថា៖ «ក្នុងចំណោមគម្រោងចុងក្រោយរបស់លោក Nemtsov មុនពេលលោកត្រូវបានគេធ្វើឃាតនៅក្នុងឆ្នាំ ២០១៥ របាយការណ៍មួយ [របស់លោក] បានបង្ហាញឱ្យឃើញអំពីការធ្វើអន្តរាគមន៍របស់យោធារុស្ស៊ីនៅក្នុងប្រទេសអ៊ុយក្រែន ដែលនេះជាអ្វីដែលប្រធានាធិបតីរុស្ស៊ីលោក Vladimir Putin បានច្រានចោល»។
លោក Price បានប្រកាសថា កេរដំណែលនិងដួងព្រលឹងរបស់លោក Nemtsov គឺបានបង្ហាញយ៉ាងច្បាស់ «នៅក្នុងទឹកចិត្តរបស់ប្រជាពលរដ្ឋរុស្ស៊ីដ៏អង់អាចក្លាហាន ដែលបានថ្កោលទោសជាសាធារណៈលើការឈ្លានពានជាបន្តរបស់រដ្ឋាភិបាលរុស្ស៊ីលើប្រទេសអ៊ុយក្រែន ដែលក្នុងនោះរួមមានទាំងញ្ញត្តិថ្កោលទោសការឈ្លានពាននេះដែលចុះហត្ថលេខាដោយអ្នកសារព័ត៌មាននិងអភិបាលក្រុងរាប់រយនាក់ និងអ្នកតវ៉ាដោយសន្តិវិធីប្រឆាំងនឹងសង្គ្រាមនេះរាប់ពាន់នាក់ដែលអាជ្ញាធររុស្ស៊ីបានឃុំខ្លួននៅក្នុងរយៈពេលកន្លងមកផងដែរ»។
លោក Price បានបន្ថែមថា ស្របពេលដែលរដ្ឋាភិបាលរុស្ស៊ីប៉ុនប៉ងផ្សព្វផ្សាយព័ត៌មានប្រឌិតនិងបង្ក្រាបលើអ្នកប្រឆាំង «យើងមានការគោរពយ៉ាងជ្រាលជ្រៅចំពោះពលរដ្ឋនៅក្នុងប្រទេសរុស្ស៊ី ដែលដើរតាមគំរូរបស់លោក Boris Nemtsov និងហ៊ាននិយាយដោយក្លាហានសម្រាប់អ្វីដែលត្រឹមត្រូវ»៕
