តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
បើតាមអ.ស.ប.ឱ្យដឹងថា ការជឿនលឿនខាងនយោបាយនៅក្នុងប្រទេសហៃទីត្រូវរអាក់រអួលដោយសារតែសន្តិសុខអន់ថយ និងវិបត្តិមនុស្សធម៌។
កាលពីថ្ងែទី២១ ខែធ្នូ នាយករដ្ឋមន្ត្រីហៃទីលោក អាន់រៀល ហេនរី (Ariel Henry) និងពួកអ្នកតំណាងផ្នែកជាច្រើននៃសង្គមហៃទីបានចុះហត្ថលេខាលើកិច្ចព្រមព្រៀងនយោបាយថ្មីមួយគឺកិច្ចព្រមព្រៀង«ការមូលមតិជាតិសម្រាប់អន្តរកាលរួមបញ្ចូលគ្នា និងការបោះឆ្នោតដោយតម្លាភាព» ដែលត្រូវធ្វើផែនការសម្រាប់ការបោះឆ្នោត និងការបង្កើត«រដ្ឋាភិបាលក្រោយកំណែទម្រង់ទីមួយ»នៃប្រទេសហៃទី។
លោក Robert Wood អ្នកតំណាងបម្រុងរបស់ស.រ.អ.ខាងកិច្ចការនយោបាយពិសេសបាននិយាយថា៖ «យើងបានទទួលការលើកទឹកចិត្តថា វិសាលគមនៃពួកអ្នកនយោបាយ វិស័យឯកជន ក្រុមសង្គមស៊ីវិល ក្រុមសាសនា សមាគមពាណិជ្ជកម្ម និងក្រុមឯទៀតៗអាចរួបរួមគ្នាយល់ព្រមដល់វិធានការចាំបាច់សម្រាប់ប្រទេសហៃទីឱ្យធ្វើចលនាទៅកាន់ការបោះឆ្នោតដោយសេរី និងប្រកបដោយយុត្តិធម៌»។
លោក Wood បាននិយាយថា៖ «ការអនុម័តកិច្ចព្រមព្រៀងនេះកាលពីថ្ងៃទី២១ ខែធ្នូជាឱកាសមួយសម្រាប់ឱ្យប្រជារាស្ត្រហៃទីវិលទៅរកការស្តាប្រទេសរបស់ពួកគេឲ្យមានស្ថិរភាពឡើងវិញ និងកែលម្អអភិបាលកិច្ច។ ជាការមានសារៈសំខាន់ដែលកិច្ចព្រមព្រៀងនយោបាយនេះ និងការអនុវត្តកិច្ចព្រមព្រៀងនេះនៅតែត្រូវដាក់បញ្ចូលតទៅទៀត ហើយយើងឱ្យតម្លៃទៅលើមុខនាទីរបស់សង្គមស៊ីវិលនិងវិស័យឯកជនដែលបានបំពេញក្នុងការជួយនាំយកភាគីខ្វែងគំនិតគ្នានានាឱ្យមកជួបជុំគ្នា»។
តែយ៉ាងណាក៏ដោយ ដើម្បីធ្វើឱ្យមានការជឿនលឿន ប្រទេសហៃទីត្រូវដោះស្រាយបញ្ហាធ្ងន់ធ្ងរមួយចំនួន ជាពិសេសគឺវិបត្តិមនុស្សធម៌របស់ប្រទេសនិងការរាតត្បាតនៃជំងឺអាសន្នរោគ ព្រមទាំងកម្រិតអំពើហិង្សានៃក្រុមជនអន្ធពាលដ៏គួរឱ្យភ័យខ្លាច។
លោក Wood បានថ្លែងទៀតថា៖ «អំពើហិង្សាទាក់ទិននឹងបក្ខពួកក្រុមជនអន្ធពាលបានកើនឡើងដល់កម្រិតមួយមិនធ្លាប់មានពីពេលមុនៗ ដែលថែមទាំងបានបង្កើនវិបត្តិមនុស្សធម៌ឲ្យបន្តកើតឡើងនិងរារាំងលទ្ធភាពនៃការដោះស្រាយការរាតត្បាតជំងឺអាសន្នរោគ ដែលមានផលប៉ះពាល់ខ្លាំងដល់កុមារនិងយុវជនផ្សេងៗពីគ្នា»។
រដ្ឋាភិបាលស.រ.អ.បានផ្តល់ជំនួយរាប់រយលានដុល្លារដើម្បីគាំទ្រការប្រឹងប្រែងរបស់រដ្ឋាភិបាលហៃទីនិងអង្គការក្រៅរដ្ឋាភិបាលដើម្បីពុះពារឧបសគ្គទាំងនេះ។ ដើម្បីជួយដោះស្រាយកំណើនកម្រិតអំពើហិង្សាដោយបក្ខពួកក្រុមជនអន្ធពាល ក្រសួងការបរទេសស.រ.អ.បានបង្កើនជំនួយរបស់ខ្លួនដល់ទៅចំនួនបីដងដល់ប៉ូលិសជាតិហៃទីគឺមានទឹកប្រាក់សរុបចំនួន៩០លានដុល្លារ ចាប់តាំងពីឆ្នាំ២០២១មក។ បន្ថែមលើនេះ ទីភ្នាក់ងារស.រ.អ.ខាងការអភិវឌ្ឍន៍អន្តរជាតិ USAID បានផ្តល់ប្រាក់៥៦លាន ៥សែន ដុល្លារទៀតសម្រាប់ជំនួយមនុស្សធម៌។
ជំនួយបរទេសរបស់ស.រ.អ.គ្រាន់តែជាផ្នែកមួយនៃរឿងទាំងនេះតែប៉ុណ្ណោះ។ ការដាក់ទណ្ឌកម្មក៏មានមុខនាទីគាំទ្រសំខាន់មួយដែរ។ លោកឯកអគ្គរដ្ឋទូត Wood បានមានប្រសាសន៍ថា៖ «យើងទទួលបានការលើកទឹកចិត្តដោយសារក្រុមប្រឹក្សាសន្តិសុខអ.ស.ប.បង្កើតប្រព័ន្ធដាក់ទណ្ឌកម្មរបបនេះ ហើយបានធ្វើឱ្យពួកជនដែលប្រព្រឹត្តអំពើហិង្សានិងក្រុមជនដែលផ្តល់ប្រាក់កាសសម្រាប់បញ្ឆេះអំពើហិង្សានាំឱ្យហៃទីមានអស្ថិរភាព មានការញញើតដែរ»។
ប្រទេសហៃទីជាដៃគូអាទិភាពមួយក្នុងការអនុវត្តយុទ្ធសាស្ត្រស.រ.អ។ ដើម្បីបញ្ចៀសជម្លោះនិងផ្ចុងផ្តើមឱ្យមានស្ថិរភាព លោក Wood បានពោលថា៖«ស.រ.អ.បន្តធ្វើការដើម្បីដោះស្រាយវិបត្តិមនុស្សធម៌នៅហៃទីក៏ដូចជាបញ្ហាអសន្តិសុខ និងគាំទ្រកិច្ចប្រឹងប្រែងដឹកនាំដោយហៃទីក្នុងការសម្រួលស្ថានភាពនយោបាយដែលអាចធ្វើឲ្យការបោះឆ្នោតប្រព្រឹត្តទៅដោយសេរី និងយុត្តិធម៌»៕
