Accessibility links

Breaking News

បទវិចារណកថា៖ ទិវា​ពលកម្ម​ឆ្នាំ​២០២២


«មួក​ការពារ​សម្រាប់​អ្នកធ្វើការ​ផ្នែក​សំណង់​សម្រាប់​ដាក់​ជួល»​របស់​ក្រុមហ៊ុន​ផលិត​សម្លៀក​បំពាក់ Carhartt ត្រូវបានរៀបតាំងជាផែនទីសហរដ្ឋអាមេរិក​នៅ​ទិវា​ពលកម្ម។
«មួក​ការពារ​សម្រាប់​អ្នកធ្វើការ​ផ្នែក​សំណង់​សម្រាប់​ដាក់​ជួល»​របស់​ក្រុមហ៊ុន​ផលិត​សម្លៀក​បំពាក់ Carhartt ត្រូវបានរៀបតាំងជាផែនទីសហរដ្ឋអាមេរិក​នៅ​ទិវា​ពលកម្ម។

តទៅ​នេះ ​គឺ​ជា​បទ​វិចារណកថា​ដែល​ឆ្លុះ​បញ្ចាំង​អំពី​ឧត្តមគតិ​ និង​ស្ថាប័ន​សហរដ្ឋ​អាមេរិក

នៅ​ថ្ងៃចន្ទ​ដំបូង​នៃ​ខែកញ្ញា ជា​រៀង​រាល់ឆ្នាំ​ ប្រជារាស្ត្រ​អាមេរិកាំងប្រារព្ធ​ទិវា​ពលកម្ម​ គឺ​ជា​ថ្ងៃ​មួយសម្រាប់ផ្តល់កិត្តិយស​ដល់​ពួក​កម្មករ​ និង​ការរួម​ចំណែក​របស់​ពួក​គេ​ដល់ភាពសំបូរ​រុង​រឿង​របស់​សហរដ្ឋ​អាមេរិក។​

ទិវា​ពលកម្ម​ជា​ការបញ្ចប់​ជា​ផ្លូវការនៃរដូវ​ក្តៅ។ ហើយ​ទោះជាសម្រាប់​ជនជាតិ​អាមេរិកាំងច្រើន​នាក់​ ទិវា​ពលកម្មត្រូវ​បានប្រារព្ធ​ជា​ថ្ងៃ​ឈប់​សម្រាក​ពី​ការងារ​និងជា​ឱកាសចុង​ក្រោយ​ក្នុងរដូវ​ក្តៅ​សម្រាប់​ការ​ធ្វើម្ហូប​នៅ​ក្រៅ​ផ្ទះ​ឬការហែល​ទឹកជា​មួយ​ពួក​មិត្ត​ភ័ក្តិ​និង​គ្រួសារ ​ក៏​ព្រឹត្តិការណ៍ដែល​នាំទៅកាន់​ការបង្កើតថ្ងៃ​បុណ្យ​នេះ​មានពាក់ព័ន្ធ​នឹង​ការ​លោភ​លន់ ចលាចល​ស៊ីវិលនិង​បង្ហូរ​ឈាម។

រយៈពេលច្រើនទសវត្សរ៍ក្រោយពីសង្គ្រាម​ស៊ីវិលក្នុង​សតវត្សរ៍​ទី១៩​ត្រូវ​បានកំណត់​ដោយការ​ងើបឡើង​នៃ​អ្វី​ដែលហៅ​ថា​ពួកកាពីតែន​នៃ​ឧស្សាហកម្ម​ គឺពួក​អ្នក​ជំនួញ​មានធនធានច្រើននិង​មានអំណាច​ខ្លាំង​និងក្រុមឧស្សាហករ ដូចជា​លោក Cornelius Vanderbilt លោក Andrew Carnegie លោក J. P. Morgan និងលោក John D. Rockefeller ជាដើម​ដែល​បាន​ក្តាប់យក​ឱកាសកើតមានឡើងដោយសារ​ការ​ប្រសព្វគ្នា​នៃការ​រីកលូតលាស់សេដ្ឋកិច្ច​យ៉ាង​លឿន វិធី​បញ្ចូល​របៀប​ថ្មីៗ​ជា​ច្រើន​និងក្រុម​ជន​អន្តោប្រវេសន៍​ជា​ពលករច្រើននាក់ដើម្បី​កសាង​ចក្រភព​ធុរកិច្ច​ធំធេង​ ហើយប្រ​មូល​ធនធានមហាសាល។ ពួក​គេ​បានផ្តល់​ការងារនិង​ឱកាស​ដែលប្រជារាស្ត្រត្រូវការ​ខ្លាំង តែ​ការអនុវត្តធុរកិច្ច​របស់​ពួក​គេ​មានភាពលោភលន់ហួស​ប្រមាណ និងទាញយកអត្ថប្រយោជន៍​ពីក្រុម​កម្មករ​ដែល​ធ្វើការ​យ៉ាង​លំបាក​ក្នុងរោងចក្រ​និងអណ្តូង​រ៉ែ ចំនួន​១២ម៉ោង​ក្នុង​មួយ​ថ្ងៃ ​ប្រាំពីរ​ថ្ងៃក្នុងមួយ​សប្តាហ៍ ហើយ​សឹង​តែ​គ្មាន​ប្រាក់កាសគ្រប់គ្រាន់​ដើម្បីរស់។

ដើម្បី​ស្វះស្វែងកែលម្អជីវភាពពួក​គេ ដោយ​ចាប់ផ្តើមពី​ចុង​ទសវត្សរ៍ឆ្នាំ១៨៨០​មក ក្រុម​កម្ម​ករ​បានចាប់ផ្តើមចូល​រួមក្នុង​សហជីព ​ដែល​ខ្លះ​ត្រូ​វ​បាន​បង្កើតកាលពី​សតវត្សរ៍​ទី១៨។ ពួក​កម្មករ​បានទាមទារឱ្យ​មានប្រាក់បៀវត្សច្រើន​ជាងមុន ​និង​ឱ្យ​មាន​ការប្រព្រឹត្ត​លើ​ពួក​គេ​ឱ្យ​បានល្អ​ជាង​មុន ឱ្យ​មានស្ថានភាពការងារមាន​សុវត្ថិភាព​ជាងមុននិង​ឱ្យ​មានការ​ទទួល​ស្គាល់​ដល់ការ​រួម​ចំណែក​របស់ពួក​គេ​ដល់​សេដ្ឋកិច្ចចម្រើន​លូតលាស់​ខ្លាំងរបស់​ប្រទេស​អាមេរិក​ផង​ដែរ។ នៅ​ពេល​ការទាមទារ​របស់ពួក​គេមិន​បាន​សម្រេច ក្រុម​កម្មករបាន​ចាត់ចែង​ឱ្យមាន​បាតុកម្ម។ ​តែ​នេះ​ជា​ការ​ខំប្រឹងខ្នះ​ខ្នែង​ដ៏​ពិបាកនិង​មានគ្រោះ​ថ្នាក់។ ជាញឹកញយក្រុម​កម្មករដែល​ធ្វើកូដកម្ម​បានជួប​ប្រទះ​ប្រឈមនឹងពួក​អ្នក​បំបែក​កូដកម្ម ក្រុម​ជន​ប្រព្រឹត្ត​បទ​ឧក្រិដ្ឋ​ជា​មុខ​របរ​ប្រដាប់អាវុធ​ដែលត្រូវ​បានជួលដោយ​ពួកមេដឹកនាំ​ក្រុម​ហ៊ុនសម្រាប់​ធ្វើបាបក្រុម​កម្មករនិង​ធ្វើឱ្យ​ប្រាកដ​ថា​ ក្រុម​កម្មក​រ​វិល​ត្រឡប់​ទៅ​ធ្វើការ​វិញ។ ការធ្វើឱ្យ​កម្មករ​រង​របួសក៏​ត្រូវ​បាន​លើក​ទឹក​ចិត្ត​ថែម​ទៀត​ផង។

ឧប្បត្តិហេតុ​មួយ​ក្នុងបណ្តា​ឧប្បត្តិហេតុ​គួរ​កត់សម្គាល់​គឺ​កូដកម្ម Pullman ក្នុង​ក្រុង Chicago ដែល​នៅ​ទី​នោះ​ក្រុមទាហាន​សហព័ន្ធ​បាន​កម្ទេច​កូដកម្ម​មួយដោយក្រុម​កម្មករ​ផ្លូវដែក​និងពួក​កម្មករ​ផលិតទូរទេះភ្លើង​មានគ្រែឱ្យ​អ្នក​ដំណើរ​ទទួល​ទាន​ដំណេក​ ដែលតវ៉ា​ប្រឆាំង​នឹងក្រុម​ហ៊ុនដែល​បានកាត់បន្ថយប្រាក់បៀវត្សនិង​ការបញ្ឈប់កម្ម​ករលែង​ឱ្យធ្វើការ។ ​មានមនុស្ស​ប្រមាណ​៣០នាក់​ត្រូវ​បាន​សម្លាប់​នៅថ្ងៃ​នោះ។ នៅ​ថ្ងៃមាន​បាតុកម្ម​នោះ លោក​ប្រធានាធិបតី Grover Cleveland បាន​ចុះ​ហត្ថលេខាលើសេចក្តី​ព្រាង​ច្បាប់​បង្កើត​ទិវា​ពលកម្មជាតិឱ្យ​ទៅ​ជា​ច្បាប់។

លោកប្រធានាធិបតី Joe Biden បាន​មាន​ប្រសាសន៍​ថា៖ «ប្រជារាស្ត្រ​អាមេរិកាំងដែល​ឧស្សាហ៍ធ្វើការងារ​ជាកម្លាំង​ស្នូលរបស់ប្រទេសយើង...ប្រជារាស្ត្រថ្នាក់កណ្តាល​បានកសាង​ប្រទេស​អាមេរិក ហើយសហជីពកសាងក្រុ​មមនុស្សថ្នាក់​កណ្តាល។ អ្វីៗ​ដែល​គាំទ្រ​ជីវភាព​ប្រជារាស្ត្រថ្នាក់កណ្តាល ​អាច​ធ្វើបានដោយសារ​សហជីព ហើយ​នៅ​ទិវា​ពលកម្មយើងផ្តល់កិត្តិយស​ជូន​កម្មករ​ទាំង​នោះ ​និងចលនាឋិតថេររបស់​ពួកគេ​ដែល​ធ្វើឱ្យ​សេដ្ឋកិច្ចយើងលូតលាស់ និងធ្វើឱ្យ​ប្រទេសជាតិ​យើង​ខ្លាំង»៕

XS
SM
MD
LG