តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
កាលពីពេលថ្មីៗនេះ លោកស្រីអនុប្រធានាធិបតី Kamala Harris បានធ្វើដំណើរទៅកាន់ប្រទេសក្វាតេម៉ាឡាដែលជាផ្នែកមួយនៃទស្សនកិច្ចនៅក្រៅប្រទេសទីមួយរបស់លោកស្រីក្នុងឋានៈជាអនុប្រធានាធិបតីដើម្បីពិភាក្សាអំពីឬសគល់នៃមូលហេតុដែលនាំឱ្យមានការធ្វើចំណាកស្រុកមិនប្រក្រតីពីតំបន់កណ្តាលទ្វីបអាមេរិកមកកាន់សហរដ្ឋអាមេរិក និងដើម្បីដោះស្រាយកត្តាធ្ងន់ធ្ងរដែលបណ្តាលឱ្យមនុស្សចាកចេញពីប្រទេសពួកគេដោយមានរួមបញ្ចូលមហន្តរាយធម្មជាតិ អសន្តិសុខស្បៀងអាហារ ការស្រេកឃ្លាន និងវិបត្តិអាកាសធាតុ។
លោកស្រីអនុប្រធានាធិបតី Harris សង្កត់ធ្ងន់លើសេចក្តីត្រូវការឱ្យមនុស្សមានសេចក្តីសង្ឃឹម។ លោកស្រីបានមានប្រសាសន៍ថា «រដ្ឋាភិបាលយើងនីមួយៗ ត្រូវផ្តល់សេចក្តីសង្ឃឹមដល់មនុស្សថា នឹងមានជំនួយដើម្បីឱ្យពួកគេដឹងថា គេបានដឹងឮសំឡេងពួកគេ ថាយើងឃើញសមត្ថភាពពួកគេ ហើយថា យើងថែមទាំងយល់អំពីឧបសគ្គ និងសេចក្តីត្រូវការរបស់ពួកគេក្នុងឱ្យមានការគាំទ្រនិងប្រភពធនធានដែលមនុស្សគ្រប់គ្នាត្រូវការដើម្បីឱ្យរស់»។
លោកស្រីអនុប្រធានាធិបតី Harris និងលោកប្រធានាធិបតីក្វាតេម៉ាឡា Alejandro Giammettei បានពិភាក្សាគ្នាអំពីវិធីដែលសហរដ្ឋអាមេរិក និងក្វាតេម៉ាឡា ត្រូវធ្វើដើម្បីពង្រឹងកិច្ចសហប្រតិបត្តិការដើម្បីទប់ទល់ការជួញដូរគ្រឿងញៀន និងការជួញដូរមនុស្សឆ្លងកាត់ព្រំដែន។ លោកស្រីអនុប្រធានាធិបតី Harris បានប្រកាសថា «ប្រទេសជាតិយើង បានធ្វើការសហការជាមួយគ្នាក្នុងបញ្ហាទាំងនេះ ហើយយើងនឹងបង្កើតក្រុមការងារពិសេសខាងការជូញដូរមនុស្សដែលនឹងធ្វើការជាមួយពួកអ្នកពង្រឹងច្បាប់ក្នុងមូលដ្ឋានដើម្បីបញ្ឈប់ឧក្រិដ្ឋកម្មទាំងនេះ»។
មេដឹកនាំទាំងពីរ ក៏បានពិនិត្យមើលឬសគល់នៃមូលហេតុដែលនាំឱ្យមានការធ្វើចំណាកស្រុកមិនប្រក្រតី ជាពិសេសការខ្វះឱកាសសេដ្ឋកិច្ចសម្រាប់មនុស្សជាច្រើននាក់ក្នុងប្រទេសក្វាតេម៉ាឡា ដោយមានរួមបញ្ចូល ទាំងការខ្វះឱកាសសម្រាប់យុវជន ស្រ្តី និងនារីជាអ្នកស្រុកដើម ព្រមទាំងបញ្ហាផ្សេងទៀត។ ជាការឆ្លើយតប សហរដ្ឋអាមេរិក នឹងចាប់ផ្តើមការផ្តើមគំនិតឱ្យអំណាចដល់ក្រុមស្ត្រីវ័យក្មេង និងបង្កើនការសិក្សាអប់រំរបស់ពួកគេផងដែរ។
លោកស្រីអនុប្រធានាធិបតី Harris បានមានប្រសាសន៍ថា «យើងនឹងធ្វើវិនិយោគក្នុងវិស័យជំនួញកសិកម្ម ការធ្វើឱ្យមានផ្ទះសំបែងធូរថ្លៃ និងគាំទ្រពួកសហគ្រិន»។
លោកស្រីអនុប្រធានាធិបតី Harris បានថ្លែងថា សហរដ្ឋអាមេរិកប្តេជ្ញាជាពិសេសដល់កិច្ចប្រឹងប្រែងប្រឆាំងនឹងអំពើពុករលួយ និងឧបត្ថម្ភផ្ចុងផ្តើមឱ្យមានតុលាការឯករាជ្យ។ លោកស្រីបានមានប្រសាសន៍ថា៖
«សហរដ្ឋអាមេរិក នឹងបង្កើតក្រុមការងារប្រឆាំងនឹងអំពើពុករលួយដែលជាក្រុមថ្មីស្រឡាងមួយ។ ក្រសួងយុត្តិធម៌ ក្រសួងហិរញ្ញវត្ថុ និងក្រសួងការបរទេសរបស់យើង នឹងធ្វើការជាមួយគ្នាដើម្បីស៊ើបអង្កេត និងហ្វឹកហ្វឺនពួកអ្នកពង្រឹងច្បាប់ក្នុងមូលដ្ឋានឱ្យធ្វើការស៊ើបអង្កេតរបស់ពួកគេផ្ទាល់»។
លោកស្រីអនុប្រធានាធិបតី Harris បានសង្កត់ធ្ងន់ថា «គោលដៅនៃកិច្ចការរបស់យើង គឺជួយប្រជារាស្ត្រក្វាតេម៉ាឡាឱ្យមានសេចក្តីសង្ឃឹមនៅក្នុងប្រទេសពួកគេ»។
លោកស្រីអនុប្រធានាធិបតី Harris បានប្រកាសថា ជិតមានសេចក្តីសង្ឃឹមហើយ។លោកស្រីបានថ្លែងថា «សកម្មភាពដែលយើងធ្វើជាមួយគ្នា នឹងកែលម្អជីវភាពប្រជារាស្ត្រក្វាតេម៉ាឡា» និងសម្រាលសេចក្តីត្រូវការចាកចេញពីប្រទេសពួកគេ៕
