តទៅនេះ គឺជាបទវិចារណកថាដែលឆ្លុះបញ្ចាំងឱ្យឃើញនូវទស្សនៈរបស់រដ្ឋាភិបាលសហរដ្ឋអាមេរិក
នៅថ្ងៃស្បថចូលកាន់តំណែងជាប្រធានាធិបតីអាមេរិក លោកប្រធានាធិបតី Donald Trump បានចុះហត្ថលេខាលើបទបញ្ជាប្រធានាធិបតីមួយដែលចាត់ទុកក្រុមកាតែល (Cartel) និងអង្គការមួយចំនួនផ្សេងទៀតជាអង្គការភេរវកម្មបរទេស និងជាភេរវករសាកលលោក។
លោកប្រធានាធិបតី Trump បានមានប្រសាសន៍ថា៖ «ក្រុមកាតែល (Cartel) បានប្រឡូកក្នុងយុទ្ធនាការហិង្សានិងភេរវកម្មនៅទូទាំងតំបន់អឌ្ឍគោលខាងលិច ដែលមិនត្រឹមតែធ្វើឱ្យមានអស្ថិរភាពដល់ប្រទេសមួយចំនួនដែលមានប្រយោជន៍ខ្លាំងសម្រាប់ផលប្រយោជន៍ជាតិរបស់យើងប៉ុណ្ណោះទេ ប៉ុន្តែថែមទាំងធ្វើឱ្យមានការហូរចូលមកក្នុងសហរដ្ឋអាមេរិកយ៉ាងច្រើននូវគ្រឿងញៀនដ៏ប្រល័យ ឧក្រិដ្ឋជន និងក្រុមជនអន្ធពាលផងដែរ។
ក្រុមកាតែល (Cartel) ត្រួតត្រាតាមរយៈយុទ្ធនាការលួចធ្វើឃាត ការបំភិតបំភ័យ ការចាប់រំលោភ និងការបង្ខិតបង្ខំព្រៃផ្សៃលើចរាចរណ៍ខុសច្បាប់ស្ទើរតែទាំងអស់នៅទូទាំងព្រំដែនភាគខាងត្បូងសហរដ្ឋអាមេរិក។ ក្នុងផ្នែកខ្លះនៃប្រទេសម៉ិកស៊ិក ពួកគេដំណើរការដូចជាជាអង្គភាពរដ្ឋាភិបាលដែលត្រួតត្រាស្ទើរតែទាំងអស់នៃផ្នែករបស់សង្គមដូច្នេះដែរ។
លោកប្រធានាធិបតី Trump បានមានប្រសាសន៍ថា សកម្មភាពរបស់ក្រុមកាតែល (Cartel) គំរាមកំហែងដល់សុវត្ថិភាពរបស់ពលរដ្ឋអាមេរិកាំង សន្តិសុខសហរដ្ឋអាមេរិក និងស្ថិរភាពនៃរបៀបរៀបរយអន្តរជាតិនៅក្នុងតំបន់អឌ្ឍគោលខាងលិច។ សកម្មភាពនិងការទន្ទ្រានរបស់ពួកគេចូលក្នុងទឹកដីរបស់សហរដ្ឋអាមេរិកបង្កឱ្យមានហានិភ័យសន្តិសុខជាតិដែលមិនអាចទទួលយកបានចំពោះសហរដ្ឋអាមេរិក។
លោកប្រធានាធិបតី Trump បានលើកឡើងថា៖ «តាមរយៈការប្រើច្បាប់ Alien Enemies ឆ្នាំ ១៧៩៨ ខ្ញុំនឹងបញ្ជារដ្ឋាភិបាលរបស់យើងឲ្យប្រើអំណាចដ៏ពេញលេញនិងធំមហិមានៃការអនុវត្តច្បាប់សហព័ន្ធនិងរដ្ឋដើម្បីលុបបំបាត់វត្តមានជនអន្ធពាលបរទេសនិងបណ្តាញឧក្រិដ្ឋកម្មទាំងអស់ដែលនាំឧក្រិដ្ឋកម្មដ៏បំផ្លិចបំផ្លាញមកកាន់ទឹកដីសហរដ្ឋអាមេរិក រួមទាំងទីក្រុងនានារបស់យើង»។
លោកប្រធានាធិបតី Trump បានកត់សម្គាល់ថា ក្រុមជនអន្ធពាលនានាដូចជាក្រុម Tren de Aragua និងក្រុម La Mara Salvatrucha ដែលគេស្គាល់ថា MS-13 ជាដើមនៅបន្តគំរាមកំហែងដល់សហរដ្ឋអាមេរិក។
លោកប្រធានាធិបតី Trump បាននិយាយថា៖ «យុទ្ធនាការនៃអំពើហិង្សានិងការបំភិតបំភ័យរបស់ពួកគេនៅក្នុងសហរដ្ឋអាមេរិកនិងនៅអន្តរជាតិគឺមានភាពហិង្សាហួសហេតុ សាហាវ និងគំរាមកំហែងស្រដៀងគ្នានេះដល់ស្ថិរភាពនៃរបៀបរៀបរយអន្តរជាតិនៅក្នុងតំបន់អឌ្ឍគោលខាងលិច»។
លោកប្រធានាធិបតី Trump បានសន្យា «ការពារពលរដ្ឋអាមេរិកាំងនិងបូរណភាពទឹកដីរបស់សហរដ្ឋអាមេរិក ដោយធានាថានឹងលុបបំបាត់ទាំងស្រុងនូវវត្តមានរបស់អង្គការទាំងនេះនៅក្នុងសហរដ្ឋអាមេរិកនិងសមត្ថភាពរបស់ពួកគេក្នុងការគំរាមកំហែងទឹកដី សុវត្ថិភាព និងសន្តិសុខរបស់សហរដ្ឋអាមេរិកតាមរយៈរចនាសម្ព័ន្ធបញ្ជានិងត្រួតត្រាក្រៅទឹកដីរបស់ពួកគេ»។
លោកប្រធានាធិបតី Trump បានបន្ថែមថា៖ «ក្នុងឋានៈជាអគ្គមេបញ្ជាការ ខ្ញុំមិនមានការទទួលខុសត្រូវអ្វីជាងការការពារប្រទេសរបស់យើងពីការគំរាមកំហែងនិងការឈ្លានពាននោះទេ ហើយនេះប្រាកដជាអ្វីដែលខ្ញុំនឹងធ្វើ»៕
