តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
មេដឹកនាំនៃប្រទេសប្រជាធិបតេយ្យធំជាងគេពីរក្នុងពិភពលោក គឺសហរដ្ឋអាមេរិកនិងប្រទេសឥណ្ឌា បានជួបប្រជុំគ្នាកាលពីពេលថ្មីៗនេះនៅក្នុងរដ្ឋធានីវ៉ាស៊ីនតោន សហរដ្ឋអាមេរិក។ ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីឥណ្ឌាលោក Narendra Modi បានជួបប្រជុំគ្នាតាមប្រព័ន្ធ online កាលពីថ្ងៃទី១១ មេសា កន្លងទៅ នៅមុនការប្រជុំថ្នាក់រដ្ឋមន្ត្រី ២+២ រវាងស.រ.អ. និងប្រទេសឥណ្ឌា ដែលត្រូវបានធ្វើនៅថ្ងៃជាមួយគ្នារវាងប្រមុខការទូត និងមន្ត្រីខាងការពារជាតិនៃប្រទេសទាំងពីរ។
ខ្លឹមសារសង្ខេបដែលផ្សព្វផ្សាយដោយសេតវិមាន ស្តីពីកិច្ចសន្ទនាគ្នាតាមទូរស័ព្ទរបស់មេដឹកនាំប្រទេសទាំងពីរ បានឲ្យដឹងថា ពួកគេ«បានប្តេជ្ញាពង្រឹងទំនាក់ទំនងរវាងអាមេរិកនិងឥណ្ឌាតាមរយៈកិច្ចសហប្រតិបត្តិការក្នុងវិស័យថាមពលស្អាត បច្ចេកវិទ្យានិងកិច្ចសហការយោធា ក៏ដូចជាការពង្រីកចំណងទាក់ទងគ្នាខាងសេដ្ឋកិច្ច និងការទាក់ទងគ្នារវាងប្រជាជននិងប្រជាជនផងដែរ។ ឥស្សរជនទាំងពីរនាក់នេះក៏បានសន្យាផងដែរថា នឹងបន្តកិច្ចសហការទ្វេភាគីនិងពហុភាគីក្នុងការបញ្ឈប់ការរាតត្បាតនៃជំងឺកូវីដ១៩ ពង្រឹងសន្តិសុខសុខភាពសាកល ជំរុញសន្តិសុខស្បៀងសាកល និងធានាពីតំបន់ឥណ្ឌូ-ប៉ាស៊ីហ្វិកមួយដែលមានលក្ខណៈសេរីនិងបើកចំហ។ មេដឹកនាំទាំងពីរនាក់នេះ ក៏គូសបញ្ជាក់ពីការប្តេជ្ញាចិត្តរួមគ្នារបស់ពួកគេ ក្នុងឋានៈជាមេដឹកនាំនៃប្រទេសប្រជាធិបតេយ្យធំជាងគេពីរក្នុងពិភពលោក ក្នុងការគោរពអធិបតេយ្យភាពនិងបូរណភាពដែនដីនៃប្រទេសជាតិទាំងអស់ក្នុងតំបន់ឥណ្ឌូ-ប៉ាស៊ីហ្វិកនិងលើសពីនោះទៅទៀត»។
នៅក្នុងជំនួបប្រជុំថ្នាក់រដ្ឋមន្ត្រី ២+២ រដ្ឋមន្ត្រីការបរទេសស.រ.អ.លោក Antony Blinken និងរដ្ឋមន្ត្រីការពារជាតិអាមេរិកលោក Lloyd Austin បានជួបជាមួយសមភាគីឥណ្ឌារបស់ពួកគេ គឺរដ្ឋមន្ត្រីកិច្ចការក្រៅប្រទេសឥណ្ឌាលោក Subrahmanyam Jaishankar និងរដ្ឋមន្ត្រីការពារជាតិឥណ្ឌាលោក Rajnath Singh ហើយបានពិភាក្សាគ្នាអំពីបញ្ហាទាំងនេះនិងប្រធានបទដទៃផ្សេងៗទៀត។ ថ្លែងទៅកាន់ពួកអ្នកកាសែតនៅក្រោយជំនួបនោះ លោករដ្ឋមន្ត្រី Blinken បានមានប្រសាសន៍ថា «នៅថ្ងៃនេះ យើងបានបញ្ជាក់ជាថ្មីអំពីការប្តេជ្ញាចិត្តរបស់យើងក្នុងការលើកកម្ពស់ស្ថិរភាពតំបន់ នីតិរដ្ឋ ការដោះស្រាយជម្លោះដោយសន្តិវិធី និងការពង្រីកភាពដៃគូយុទ្ធសាស្ត្ររបស់យើងជាមួយសមាគមប្រជាជាតិអាស៊ីអាគ្នេយ៍ផងដែរ»។
រដ្ឋមន្ត្រីការពារជាតិអាមេរិកលោក Lloyd Austin បានមានប្រសាសន៍ថា ការប្រជុំថ្នាក់រដ្ឋមន្ត្រីនេះបង្ហាញថា ស.រ.អ.និងប្រទេសឥណ្ឌា«ធ្វើការជាមួយគ្នាដើម្បីកសាងភាពជាដៃគូសំខាន់បំផុតក្នុងយុគសម័យយើងនេះ។ ថ្ងៃនេះយើងបានធ្វើការសន្យាសំខាន់ៗ ដែលនឹងជំរុញការបញ្ចូលរបៀបថ្មីៗខាងបច្ចេកវិទ្យានិងកិច្ចសហប្រតិបត្តិការក្នុងវិស័យការពារថ្មីៗ ដែលរួមមានក្នុងលំហរអាកាសនិងតាមប្រព័ន្ធកំព្យូទ័រផងដែរ»។
លោករដ្ឋមន្ត្រី Austin បានសរសើរសេចក្តីសម្រេចចិត្តរបស់កងទ័ពជើងទឹកឥណ្ឌា ក្នុងការចូលរូមក្នុងកងកម្លាំងការពារដែនទឹករួមគ្នា និងការប្តេជ្ញាចិត្តរបស់អាមេរិកនិងឥណ្ឌា ក្នុងការចូលរួមក្នុងសមយុទ្ធយោធាទ្រង់ទ្រាយធំរួមគ្នាបន្ថែមទៀត។ លោកក៏បានស្វាគមន៍ការសន្យារបស់ស.រ.អ.និងប្រទេសឥណ្ឌា ក្នុងការពង្រឹងចំណងទាក់ទងជាមួយបណ្តាប្រទេស ដែលមានចិត្តគំនិតដូចគ្នា ដូចជាប្រទេសជប៉ុន អូស្ត្រាលីនិងសម្ព័ន្ធមិត្តអឺរ៉ុប ជាដើម។
លោករដ្ឋមន្ត្រី Austin ក៏បានបន្ថែមទៀតថា ស.រ.អ.និងប្រទេសឥណ្ឌាមិនគ្រាន់តែមានចំណងទាក់ទងគ្នាដោយផ្អែកលើផលប្រយោជន៍រួមគ្នាតែប៉ុណ្ណោះទេ ក៏ប៉ុន្តែ «យើងក៏មានទំនាក់ទំនងដោយឈរលើគុណតម្លៃ និងការប្តជ្ញាចិត្តរួមគ្នា។ វិនិយោគដែលយើងធ្វើជាមួយគ្នានៅថ្ងៃនេះ នឹងជួយឱ្យប្រាកដថា ទស្សនវិស័យរូមគ្នារបស់យើងស្តីពីតំប់ឥណ្ឌូ-ប៉ាស៊ីហ្វិកមួយ ដែលមានសន្តិសុខ បើកចំហ និងវិបុលភាព នឹងរីកចម្រើនលូតលាស់ ក្នុងពេលជាច្រើនទសវត្សរ៍ទៅមុខទៀត»៕
