តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ប្រធានាធិបតីសហរដ្ឋអាមេរិកលោក Joe Biden បានតាំងចិត្តផ្តល់អាទិភាពលើសិទ្ធិមនុស្សនៅក្នុងគោលនយោបាយការបរទេសអាមេរិក។ នេះបើតាមការបញ្ជាក់របស់រដ្ឋលេខាធិការក្រសួងការបរទេសអាមេរិកអ្នកស្រី Uzra Zeya នៅក្នុងសុន្ទរកថាកាលពីពេលថ្មីៗនេះនៅឯពិធីប្រគល់ពានរង្វាន់អ្នកការពារសិទ្ធិមនុស្ស។
អ្នកស្រីបានថ្លែងថា៖ «យើងបានធ្វើឱ្យមានការវិវឌ្ឍទៅមុខនិងនវានុវត្តន៍ដ៏សំខាន់ដែលនឹងបន្សល់ទុកនូវកេរដំណែលដ៏យូរអង្វែងអំពីសិទ្ធិមនុស្សនៅទូទាំងសាកលលោក ដែលក្នុងនោះរួមមានទាំងការលើកស្ទួយដល់ស្ថាប័នសាកលនានាដើម្បីឆ្លើយតបដល់អាទិភាពសិទ្ធិមនុស្សរបស់សហរដ្ឋអាមេរិកផងដែរ។ នៅក្នុងអាទិភាពនោះយើងបានធ្វើការតាំងចិត្តយ៉ាងមុតមាំនៅក្នុងការអះអាងជាថ្មីអំពីភាពជាអ្នកដឹកនាំបែបពហុភាគីរបស់សហរដ្ឋអាមេរិក ការវិលត្រឡប់ទៅរកស្ថាប័ននានារបស់អង្គការសហប្រជាជាតិដូចជាក្រុមប្រឹក្សាសិទ្ធិមនុស្ស និងការស្ថាបនាចំណងទាក់ទងថ្មីជាមួយដៃគូថ្មីនិងដៃគូដែលលេចឡើងខ្លាំង»។
លទ្ធផលដ៏សំខាន់រួមមានការបញ្ឈប់រុស្ស៊ីបណ្តោះអាសន្នពីក្រុមប្រឹក្សាសិទ្ធិមនុស្សអង្គការសហប្រជាជាតិដោយសារតែរុស្ស៊ីបានឈ្លានពានប្រទេសអ៊ុយក្រែន និងការធ្វើឱ្យមានការមូលមតិគ្នាជាសាកលលើសេចក្តីសម្រេចរបស់មហាសន្និបាតអង្គការសហប្រជាជាតិលើកដំបូងបង្អស់ស្តីពីការធ្វើឱ្យប្រសើរទៅមុខនូវបច្ចេកវិទ្យា AI ដែលមានសុវត្ថិភាព សន្តិសុខ និងទំនុកចិត្តសម្រាប់ការអភិវឌ្ឍប្រកបដោយនិរន្តភាព។
អ្នកស្រីរដ្ឋលេខាធិការ Zeya បាននិយាយថា៖ «យើងក៏បានសម្រេចបាននូវសន្ធិសញ្ញាដំបូងបង្អស់របស់ពិភពលោកស្តីពីបច្ចេកវិទ្យា AI នៅឯក្រុមប្រឹក្សាអឺរ៉ុបផងដែរ ដែលសន្ធិសញ្ញានេះកំណត់នូវចក្ខុវិស័យរួមអំពីថាតើរដ្ឋាភិបាលដែលគោរពសិទ្ធិមនុស្សនឹងគិតគូរយ៉ាងដូចម្ដេចចំពោះបច្ចេកវិទ្យា AI នេះនៅក្នុងរបៀបមួយដែលស្របទៅតាមការគោរពសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ»។
អ្នកស្រីរដ្ឋលេខាធិការ Zeya បានបន្ថែមថា៖ «យើងក៏បានប្រើមធ្យោបាយថ្មីៗនិងប្លែកៗដើម្បីធ្វើឱ្យពួកអ្នករំលោភសិទ្ធិទទួលខុសត្រូវផងដែរ»។
អ្នកស្រីបានបញ្ជាក់ទៀតថា៖ «យើងបានពង្រីកមធ្យោបាយរបស់យើងដោយមានគោលដៅយុទ្ធសាស្ត្រនៃការផ្លាស់ប្តូរឥរិយាបថនិងកម្លារារាំងអ្នករំលោភសិទ្ធិមនុស្ស។ តាមរយៈកិច្ចសហប្រតិបត្តិការដ៏ជិតស្និទ្ធជាមួយក្រសួងពាណិជ្ជកម្មនិងក្រសួងហិរញ្ញវត្ថុសហរដ្ឋអាមេរិក យើងបានប្រើប្រាស់ការត្រួតត្រាការនាំចេញនិងការដាក់ទណ្ឌកម្មដើម្បីធ្វើឱ្យពួកអ្នកលក់មេរោគ Spyware របស់កុំព្យូទ័របែបពាណិជ្ជកម្មដូចជាក្រុមហ៊ុន NSO Group, Intellexa, Cytrox និងក្រុមហ៊ុនផ្សេងទៀតទទួលខុសត្រូវចំពោះការលក់ឧបករណ៍លបចូលក្នុងប្រព័ន្ធកំព្យូទ័រទៅឱ្យអ្នកដែលជិះជាន់លើសិទ្ធិមនុស្សនិងអ្នកដែលគំរាមកំហែងអ្នកការពារសិទ្ធិមនុស្ស»។
ក្រសួងការបរទេសអាមេរិកបានបន្តកិច្ចប្រឹងប្រែងទាំងនេះតាមរយៈការអនុវត្តការរឹតត្បិតទិដ្ឋាការលើបុគ្គលដែលប្រើប្រាស់មិនត្រឹមត្រូវនូវកម្មវិធី Spywareពាណិជ្ជកម្ម ឬទទួលបានប្រយោជន៍ហិរញ្ញវត្ថុពីការប្រើប្រាស់មិនត្រឹមត្រូវនូវបច្ចេកវិទ្យានេះ ក៏ដូចជាលើសមាជិកក្រុមគ្រួសាររបស់ពួកគេផងដែរ។
អ្នកស្រីរដ្ឋលេខាធិការ Zeya បានប្រកាសថា នៅទីបញ្ចប់ សហរដ្ឋអាមេរិកបានតតាំងនឹងបញ្ហាគំរាមកំហែងថ្មីនិងបញ្ហាគំរាមកំហែងដែលកំពុងលេចឡើងដោយចំមុខតែម្ដង។
អ្នកស្រីរដ្ឋលេខាធិការថ្លែងថា៖ «យើងបានដាក់ការគាបសង្កត់ឆ្លងប្រទេស ឬ TNR នៅលើរបៀបវារៈរបស់អង្គការសហប្រជាជាតិនិងបានបង្កើតគោលនយោបាយថ្មីមួយនៅក្នុងប្រទេសដើម្បីរឹតត្បិតទិដ្ឋាការចំពោះជនល្មើស។ យើងក៏បានផ្តល់ថវិកាជាង ១៦ លានដុល្លារនៅក្នុងកម្មវិធីមួយចំនួនដែលកំពុងដំណើរការដល់អ្នកការពារសិទ្ធិមនុស្សទាំងនោះដែលធ្វើការដើម្បីប្រឆាំងនឹងអំពើពុករលួយ ដែលក្នុងនោះរួមមានទាំងអ្នកកាសែតដែលកំពុងធ្វើការដើម្បីលាតត្រដាងអំពើពុករលួយផងដែរ»។
សហរដ្ឋអាមេរិកឈរយ៉ាងរឹងមាំដើម្បីបន្តការពារនិងលើកស្ទួយសិទ្ធិមនុស្សនៅជុំវិញពិភពលោក៕
បទវិចារណកថា៖ សហរដ្ឋអាមេរិកបានបង្កើនការគាំទ្រសិទ្ធិមនុស្ស
