តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ប្រទេសអ៊ីរ៉ង់និងទីភ្នាក់ងារថាមពលបរមាណូអន្តរជាតិហៅកាត់ថា IAEA បានពន្យារពេលមួយខែកិច្ចព្រមព្រៀងត្រួតពិនិត្យកន្លែងនុយក្លេអ៊ែរនៃប្រទេសអ៊ីរ៉ង់ដែលបានផុតកំណត់កាលពីថ្ងៃទី២១ ខែឧសភា។
ការពន្យារពេលនៅនាទីចុងក្រោយបង្អស់នេះ មានឡើងនៅពេលការចរចាជុំថ្មីមួយរវាងអ៊ីរ៉ង់ និងពួកប្រទេសមហាអំណាចអំពីកិច្ចព្រមព្រៀងនុយក្លេអ៊ែរអ៊ីរ៉ង់ មានកំណត់ធ្វើនៅក្រុង Vienne។ ស.រ.អ. និងអ៊ីរ៉ង់ បាននិយាយថា ពួកគេចង់វិលទៅកាន់ការគោរពតាមកិច្ចព្រមព្រៀងនុយក្លេអ៊ែរអ៊ីរ៉ង់ ហៅកាត់ថា JCPOA វិញ។ នៅក្រោមរដ្ឋបាលលោក Trump ស.រ.អ. បានដកថយចេញពីកិច្ចព្រមព្រៀងនេះកាលពីឆ្នាំ២០១៨ ហើយបានដាក់ទណ្ឌកម្មថ្មីៗប្រឆាំងនឹងអ៊ីរ៉ង់។ ចាប់តាំងពីពេលនោះមក អ៊ីរ៉ង់ បានចាត់វិធានការមួយចំនួនដោយមានរួមបញ្ចូលទាំងការសំរិតសំរាំងគុណភាព uranium ដល់កម្រិតលើសពីការចែងក្នុងកិច្ចព្រមព្រៀង JCPOA។
កិច្ចពិភាក្សាបច្ចុប្បន្នដែលសហភាពអឺរ៉ុបជាប្រធាន ស្តីពីវិធីសម្រេចគោលដៅនៃការវិលមកគោរពតាមកិច្ចព្រមព្រៀងនេះ មានការចូលរួមរបស់ប្រទេសអ៊ីរ៉ង់ ចក្រភពអង់គ្លេស ចិន បារាំង អាល្លឺម៉ង់ និងរុស្ស៊ី និងការចូលរួមមិនផ្ទាល់តែសំខាន់របស់ស.រ.អ.ផងដែរ។
ក្រោយពីការពិភាក្សាដែលបានចប់កាលពីថ្ងៃទី១៩ ខែឧសភា លោក Enrique Mora អគ្គលេខាធិការរងនៃសេវាសកម្មភាពក្រៅប្រទេសរបស់សហភាពអឺរ៉ុបដែលជាប្រធាននៃកិច្ចចរចានោះ បានប្រកាសថា ពួកអ្នកចួលរួមបាន«ធ្វើឱ្យមានការជឿនលឿនល្អប្រសើរ។ កិច្ចព្រមព្រៀងមួយ កំពុងចេញជារូបរាងហើយ»។
លោករដ្ឋមន្ត្រីការបរទេសស.រ.អ. Antony Blinken បានមានប្រសាសន៍នៅក្នុងបទសម្ភាសន៍មួយតាមទូរទស្សន៍កាលពីពេលថ្មីៗនេះថា កិច្ចចរចានៅក្នុងក្រុង Vienne បាន«បំភ្លឺអ្វីដែលភាគីនីមួយៗត្រូវការធ្វើដើម្បីវិលត្រឡប់មកកាន់ការធ្វើតាមកិច្ចព្រមព្រៀងនេះវិញ»។
លោកបាននិយាយថា សម្រាប់ស.រ.អ. «យើងដឹងអំពីការដាក់ទណ្ឌកម្មណាខ្លះដែលគួរលុបចោលប្រសិនបើវាមិនសមស្របជាមួយកិច្ចព្រមព្រៀងនុយក្លេអ៊ែរ»។ លោកបន្ថែមថា ប៉ុន្តែអ្វីដែលសំខាន់ជាងនេះនោះគឺ អ៊ីរ៉ង់ដឹងហើយថា តើខ្លួនត្រូវធ្វើអ្វីខ្លះ ដើម្បីសមស្របក្នុងវិស័យនុយក្លេអ៊ែរ។ ហើយអ្វីដែលយើងមិនទាន់ឃើញនៅឡើយគឺថា តើអ៊ីរ៉ង់ប្រុងប្រៀប និងចង់ធ្វើសេចក្តីសម្រេចមួយអំពីអ្វីដែលខ្លួនត្រូវធ្វើនោះឬទេ។ នេះជា ការសាកល្បងមួយ ហើយយើងមិនទាន់មានចម្លើយនៅឡើយទេ»។
នៅក្នុងបទសម្ភាសន៍មួយដាច់ដោយឡែក លោករដ្ឋមន្ត្រីការបរទេស Blinken បានគូសបញ្ជាក់ថា ស.រ.អ. «ប្រុងប្រៀបពេញលេញ»ស្រេចហើយដើម្បីវិលត្រឡប់ទៅកាន់កិច្ចព្រមព្រៀង JCPOA វិញ ហើយថា ប្រសិនបើប្រទេសទាំងពីរ មានជោគជ័យក្នុងការសម្រេចគោលដៅនេះ JCPOA អាចត្រូវប្រើជាមូលដ្ឋានមួយសម្រាប់កិច្ចព្រមព្រៀងរឹងប៉ឹងជាងមុនមួយដែលនឹងដោះស្រាយបញ្ហាអាកប្បកិរិយារបស់អ៊ីរ៉ង់ដែលនាំឱ្យមានអស្ថិរភាពក្នុងតំបន់មជ្ឈិមបូព៌ា។
លោករដ្ឋមន្ត្រី Blinken បានថ្លែងថា «ក៏ប៉ុន្តែជំហានដំបូង ត្រូវការឱ្យមានការវិលត្រឡប់ទៅកាន់ការគោរពកិច្ចព្រមព្រៀងនេះ ទៅវិញទៅមក។ នេះជាអ្វីដែលយើងកំពុងធ្វើការ ហើយយើងនៅមិនទាន់ដឹងថា តើអ៊ីរ៉ង់ នឹងសុខចិត្តយល់ព្រម ឬទេ»៕
