Accessibility links

Breaking News

បទវិចារណកថា៖ សហរដ្ឋ​អាមេរិក យល់ព្រម​ពិភាក្សា​ជាមួយ​ប្រទេស​អ៊ីរ៉ង់


រូបឯកសារ៖ លោក​ប្រធានាធិបតី Joe Biden ថ្លែង​អំពី​គោលនយោបាយ​ការបរទេស​នៅ​ក្រសួង​ការបរទេស​សហរដ្ឋ​អាមេរិក ក្នុង​រដ្ឋធានី​វ៉ាស៊ីនតោន កាលពី​ថ្ងៃទី៤ ខែកុម្ភៈ ឆ្នាំ២០២១។

តទៅនេះ​ គឺ​ជា​បទ​វិចារណកថា​ដែល​ឆ្លុះ​បញ្ចាំង​ពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

ថ្លែងទៅ​កាន់​សន្និសីទសន្តិសុខ​ Munich តាម​វីដេអូ​កាល​ពី​ពេល​ថ្មីៗ​នេះ​ លោកប្រធានាធិបតី Joe Biden បានមាន​ប្រសាសន៍​ថា​ ការ​គំរាមកំហែងនៃ​ការ​រីកសាយ​អាវុធ​នុយ​ក្លេអ៊ែរ​ «នៅ​តែ​បន្ត​តម្រូវ​ឱ្យ​មាន​កិច្ចការ​ទូត​ដោយប្រុងប្រយ័ត្ន​ និង​កិច្ច​សហប្រតិបត្តិការ»​ ដើម្បី«កាត់​បន្ថយ​គ្រោះថ្នាក់​នៃការ​យល់ច្រឡំ​ ឬ​កំហុស​ខាង​យុទ្ធសាស្ត្រ​ឱ្យ​មកនៅ​ត្រឹម​កំរិត​ទាប​បំផុត»។ លោក​ប្រធានាធិបតី Biden បាន​ថ្លែងថា៖

«ហេតុដូច្នេះ​ហើយ​បាន​ជា​យើង​និយាយ​ថា យើង​ប្រុងប្រៀប​ធ្វើការ​ចរចា​ជាថ្មី​ជា​មួយ​បណ្តា​ប្រទេស P5+1 (សមាជិក​នៃ​ក្រុម​ប្រឹក្សា​សន្តិសុខ​អង្គការ​សហ​ប្រជាជាតិ​ទាំង៥ ​បូក​ជាមួយ​ប្រទេស​អល្លឺម៉ង់) អំពីកម្មវិធី​នុយក្លេអ៊ែរនៃប្រទេស​អ៊ីរ៉ង់។ យើង​ក៏​ត្រូវ​ដោះស្រាយ​ដែរ​នូវ​សកម្មភាព​របស់​អ៊ីរ៉ង់​ដែល​នាំ​ឱ្យមាន​អស្ថិរភាពនៅ​ទូទាំង​មជ្ឈិម​បូព៌ា ហើយ​យើង​នឹងធ្វើការ​ដោយ​មាន​កិច្ចសហប្រតិបត្តិកា​រ​ជិត​ស្និទ្ធ​ជា​មួយ​ពួក​ដៃ​គូ​អឺរ៉ុប និង​ដៃគូ​ឯ​ទៀតៗ​របស់​យើង​នៅ​ពេល​ដែល​យើង​បន្ត​ដំណើរ»។

សុន្ទរកថា​របស់​លោក​ប្រធានាធិបតី​ Biden បានធ្វើឡើង​មួយ​ថ្ងៃ​ក្រោយសហរដ្ឋ​អាមេរិក រួម​ជាមួយ​ប្រទេស​អាល្លឺម៉ង់ បារាំង​និង​ចក្រភពអង់គ្លេស បានចេញ​ផ្សាយ​សេចក្តីថ្លែងការណ៍មួយ​សម្តែង​គោលដៅ​រួមគ្នា​របស់​ពួកគេ​ឱ្យ​អ៊ីរ៉ង់វិល​ត្រឡប់មក​ធ្វើតាម​ការ​ប្តេជ្ញា​របស់​ខ្លួន​តាមរយៈកិច្ច​ព្រមព្រៀងនុយក្លេអ៊ែរ​អ៊ីរ៉ង់ឆ្នាំ​២០១៥ ​ដែល​ហៅ​កាត់​ថា JCPOA ឱ្យ​បាន​ពេញលេញ​។ ប្រទេស​មហា​អំណាចទាំងបួននេះ បានកត់​សម្គាល់​ថា លោកប្រធានាធិបតី Biden បាន​មានប្រសាសន៍ថា ​ប្រសិនបើ​អ៊ីរ៉ង់គោរព​តាម​កិច្ចព្រមព្រៀង​នោះ​ដោយ​ពេញ​លេញ​វិញ សហរដ្ឋ​អាមេរិក ​ក៏នឹង​ធ្វើ​ដូ​ច្នេះ​ដែរ​«ហើយអាមេរិក ប្រុងប្រៀបធ្វើ​ការ​ពិភាក្សាជា​មួយ​អ៊ីរ៉ង់ដើម្បីឱ្យ​បាន​សម្រេចគោលដៅ​នេះ»។

សហរដ្ឋ​អាមេរិក ​បានឈប់​ចូល​រួមក្នុងកិច្ច​ព្រមព្រៀងនុយក្លេអ៊ែរ​អ៊ីរ៉ង់ ហៅកាត់ JCPOA កាល​ពី​ឆ្នាំ២០១៨​ បានដាក់​ទណ្ឌកម្ម​សេដ្ឋកិច្ច​ជា​ថ្មី ដែល​បានត្រូវលុបចោល​តាម​រយៈកិច្ច​ព្រមព្រៀង​នោះ​ ហើយ​បាន​ដាក់ទណ្ឌកម្ម​ថ្មីៗលើ​អ៊ីរ៉ង់។ សហរដ្ឋ​អាមេរិក​ក៏​បានរឹតត្បិត​ការ​ធ្វើ​ដំណើររបស់​ក្រុម​អ្នកការទូត​អ៊ីរ៉ង់ និង​ចាត់វិធានការដើម្បី​ដាក់​ទណ្ឌកម្មពហុភាគី​របស់​អង្គការ​សហប្រជាជាតិ​លើ​អ៊ីរ៉ង់​ឡើងវិញ​ផងដែរ។ កាល​ពី​ប៉ុន្មាន​ខែមុន​នេះ​ អ៊ីរ៉ង់​បាន​ចាត់វិធានការ​មួយ​ចំនួន​លើស​ពីកម្រិត​នៃ​កិច្ចព្រមព្រៀង JCPOA ​ដោយ​មាន​រួម​បញ្ចូល​ការ​សម្រិតសម្រាំង​ដោយ​ចំហនូវ​សារធាតុ​ uranium ជិត​២០ភាគ​រយ​ គឺ​ច្រើន​លើស​ពីអ្វី​ដែល​ប្រទេស​នេះ​ ​ប្តេជ្ញា​ធ្វើ​តាមរយៈ​កិច្ចព្រមព្រៀង JCPOA ព្រម​ទាំង​បាន​ផលិតលោហធាតុ uranium ដែល​ជា​ដំណើរ​កា​រ​មួយ​សម្រាប់​អនុវត្ត​ក្នុង​ការ​ផលិត​អាវុធ​នុយក្លេអ៊ែរ។

ដើម្បី​បំបាត់ឧបសគ្គ​មិន​ចាំ​បាច់ដល់​កិច្ចការ​ទូត​ កាលពី​ថ្ងៃទី១៨ ខែកុម្ភៈ ​សហរដ្ឋ​អាមេរិក​បានលុបចោល​ការ​រឹតត្បិតលើ​ពួកអ្នក​តំណាង​អ៊ីរ៉ង់។ សហរដ្ឋ​អាមេរិក​ក៏​បានប្រកាស​ដែរថា ​ខ្លួន​បានប្រែ​ក្រឡះ​គោលជំហរ​របស់​រដ្ឋបាលមុន ​អំពី​ការ​ដាក់​ទណ្ឌកម្ម​ពហុភាគី​របស់អង្គការ​សហប្រជាជាតិ​លើ​អ៊ីរ៉ង់​ផងដែរ។

នៅ​ពេល​នេះសហភាពអឺរ៉ុបកំពុង​រៀបចំ​កិច្ចចរចា​ក្រៅផ្លូវការដែល​មានរួមបញ្ចូលអ៊ីរ៉ង់​និង​ក្រុម​ប្រទេស P5+1 គឺសមាជិក​នៃ​ក្រុម​ប្រឹក្សា​សន្តិសុខ​អង្គការ​សហ​ប្រជាជាតិ​ទាំង៥ ដែល​មាន​សហរដ្ឋ​អាមេរិក អង់គ្លេស ចិន បារាំង និង​រុស្ស៊ី បូក​ជាមួយ​ប្រទេស​អល្លឺម៉ង់ ក្នុង​គោលដៅ​ធ្វើ​ឱ្យ​មាន​កិច្ចព្រមព្រៀង JCPOA ឡើងវិញ។

លោក​ Jake Sullivan ទីប្រឹក្សាសន្តិសុខ​ជាតិសហរដ្ឋ​អាមេរិកបាន​បញ្ជាក់ថា​ ​លោក​ប្រធានាធិបតី​ Biden ប្តេជ្ញា​ថា ​នឹង​រារាំងអ៊ីរ៉ង់មិន​ឱ្យ​មាន​អាវុធនុយក្លេអ៊ែរ​ និង​ថាលោក​ប្រធានាធិបតីប្រុងប្រៀប​ជា​ស្រេច​ហើយ​ដើម្បី​ពិភាក្សា​ជា​មួយ​អ៊ីរ៉ង់​ ពីព្រោះ «លោក​មាន​ជំនឿ​ថា កិច្ច​ការទូត​ដែល​រឹងមាំ​និង​ច្បាស់លាស់​ជា​វិធី​ល្អ​បំផុតដើម្បី​ធ្វើឱ្យ​សម្រេច​គោលដៅ​នេះ»៕

XS
SM
MD
LG