តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
សង្គ្រាមក្នុងប្រទេសយេម៉ែន កំពុងអូសបន្លាយ។ ចាប់តាំងពីក្រុមឧទ្ទាម Houthi បានវាយលុកប្រឆាំងនឹងរដ្ឋាភិបាលយេម៉ែន កាលពីឆ្នាំ ២០១៤ មក សង្គ្រាមនេះ បានបណ្តាលឱ្យមនុស្សជាង ២ សែន ៣ ម៉ឺន ៣ ពាន់នាក់ ស្លាប់ និងបានបង្កើតឱ្យមានមហន្តរាយមនុស្សធម៌អាក្រក់បំផុតមួយក្នុងពិភពលោក--ដោយធ្វើឱ្យមនុស្សចំនួនជិត៨០ភាគរយនៃប្រជារាស្ត្រយេម៉ែន ៣០ លាននាក់ ពឹងពាក់លើជំនួយដើម្បីរស់រានមានជីវិត។
កាលពីពេលថ្មីៗនេះ រដ្ឋាភិបាលស.រ.អ. បានដាក់ទណ្ឌកម្មមន្ត្រី និងមេបញ្ជាការយោធា Houthi ម្នាក់ឈ្មោះ Saleh Mesfer Alshaer ដែលដឹកនាំអង្គការគាំទ្រភ័ស្តុភារយោធាដែលគ្រប់គ្រងដោយពួក Houthi។ បើតាមក្រសួងហិរញ្ញវត្ថុស.រ.អ. ថា ឈ្មោះ Alshaer ដែលជាសម្ព័ន្ធមិត្តជិតស្និទ្ធម្នាក់របស់មេដឹកនាំ Houthi ឈ្មោះ Abdul Malik al-Houthi «បានមើលការខុសត្រូវលើការរឹបអូសទ្រព្យសម្បត្តិក្នុងប្រទេសយេម៉ែនច្រើនជាង ១ រយលានដុល្លារ ដោយប្រើកលល្បិចមិនត្រឹមត្រូវតាមច្បាប់ ដោយមានរួមបញ្ជូលទាំងការជំរិតយកប្រាក់ផងដែរ»។ ក្រសួងហិរញ្ញវត្ថុ បាននិយាយនៅក្នុងសេចក្តីថ្លែងការណ៍មួយថា ធនធានដែលត្រូវរឹបអូសយកពីអ្នកប្រឆាំងនឹងពួក Houthi ត្រូវបានប្រើសម្រាប់ផ្តល់ប្រាក់កាសដល់កិច្ចខិតខំប្រឹងប្រែងយោធារបស់ក្រុម Houthi ដើម្បី«បញ្ឆេះឱ្យមានអស្ថិរភាព និងបង្កើនទុក្ខវេទនាយ៉ាងខ្លាំងដល់ប្រជារាស្ត្រយេម៉ែន»។
ប្រសិនបើពលរដ្ឋយេម៉ែន មិនព្រមធ្វើតាមការប្រឹងប្រែងរបស់ Alshaer ក្នុងការរឹបអូសយកទ្រព្យសម្បត្តិពួកគេ គាត់ប្រើវិធីជំរិត និងការឃុំឃាំងដើម្បីបង្ខិតបង្ខំពួកគេ។ ក្រសួងហិរញ្ញវត្ថុ បានប្រកាសថា «ជនណាដែលមិនបានបានធ្វើតាមបញ្ជារបស់ Alshaer ត្រូវបានឃាត់ខ្លួន និងឃុំឃាំងដោយគ្មានកំណត់ដោយការិយាល័យសន្តិសុខជាតិ ដែលគ្រប់គ្រងដោយពួក Houthi’ ហើយត្រូវលាបពណ៌ថា ជាអ្នកលួចយកការណ៏»។
លោកស្រី Andrea M. Gacki នាយិកាការិយាល័យត្រួតត្រាធនធានបរទេសហៅ OFAC បានសរសេរថា « Saleh Mesfer Alshaer ជានាយទាហាន Houthi ទទួលខុសត្រូវដល់ការលួចធនធានពលរដ្ឋយេម៉ែន និងដឹកនាំយុទ្ធនាការរឹបអូសទ្រព្យសម្បត្តិដែលនាំឱ្យសង្គ្រាមក្នុងប្រទេសនេះ អូសបន្លាយថែមទៀត។ ស.រ.អ . នៅតែប្តេជ្ញាវែកមុខក្រុមជនទាំងឡាយណាដែលធ្វើឱ្យវិបត្តិនេះកាន់តែធ្ងន់ធ្ងរឡើងក្នុងប្រទេសយេម៉ែនដោយរារាំងពួកគេមិនឱ្យចូលក្នុងប្រព័ន្ធហិរញ្ញវត្ថុសាកលបាន»។
ដោយសារការចុចឈ្មោះដាក់ទណ្ឌកម្មនេះ ធនធាន និងផលប្រយោជន៍ទាំងអស់របស់ឈ្មោះ Saleh Mesfer Alshaer នៅក្នុងស.រ.អ. ឬដាក់ឈ្មោះជនជាតិអាមេរិកាំងថា ជាម្ចាស់ ឬជាអ្នកគ្រប់គ្រងត្រូវតែរាំងខ្ទប់ និងត្រូវរាយការណ៍ប្រាប់ការិយាល័យ OFAC។ បន្ថែមលើនេះ ក្រុមបុគ្គលស.រ.អ. ត្រូវហាមប្រាមមិនឱ្យរកស៊ីជាមួយគាត់ទេ។
រដ្ឋមន្ត្រីការបរទេសស.រ.អ. លោក Antony Blinken បានមានប្រសាសន៍នៅក្នុងសេចក្តីថ្លែងការណ៍មួយថា «សកម្មភាពនេះ ជាសារមួយដល់ប្រជារាស្ត្រយេម៉ែនថា ស.រ.អ.ឈរជាមួយពួកគេ។ យើងនឹងមិនបង្អង់ដៃទេក្នុងការដាក់ទណ្ឌកម្មជនទាំងឡាយណាដែលធ្វើឱ្យវិបត្តិមនុស្សធម៌នេះ មានតទៅទៀតក្នុងប្រទេសយេម៉ែន និងទាញយកផលកម្រៃពីទុក្ខវេទនារបស់ប្រជារាស្ត្រយេម៉ែន»៕
