តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
នៅខែកក្កដានេះជាខួបលើកទី២៥ចាប់តាំងពីសាធារណរដ្ឋប្រជាមានិតចិន ឬ PRC បានចាប់ផ្តើមយុទ្ធនាការគាបសង្កត់ប្រឆាំងនឹងអ្នកកាន់សាសនា Falun Gong ដែលពួកគេពិពណ៌នាខ្លួនឯងថាជាអ្នកប្រតិបត្តិខាងផ្នែកវិញ្ញាណស្មារតី។ ការប្រតិបត្តិសំខាន់ៗរបស់ក្រុមនេះគឺ ការហាត់សមាធិ និងការបង្រៀនដែលរំឭកអំពីការប្រតិបត្តិតាមទំនៀមទម្លាប់ព្រះពុទ្ធសាសនា និងទំនៀមទម្លាប់បែបសាសនាតៅនិយមដោយសង្កត់ធ្ងន់ទៅលើសច្ចៈធម៌ មេត្តាធម៌ និងភាពអត់ទ្រាំ។ ខណៈពេលដែលសាសនា Falun Gong មានរួមបញ្ចូលការប្រតិបត្តិបែបវិញ្ញាណនិងស្មារតី សាសនានេះត្រូវបានរៀបចំឡើងដោយធូររលុង និងខ្វះអាចារ្យដែលមានជំនាញវិជ្ជាជីវៈ សមាជិកភាពផ្លូវការ ការទទួលយកការបរិច្ចាគ និងកន្លែងគោរពប្រតិបត្តិពិសេស នេះបើតាមការឱ្យដឹងរបស់អង្គការសិទ្ធិមនុស្ស Freedom House។
អស់រយៈពេល២ទស្សវត្សរ៍កន្លះមកនេះ អាជ្ញាធរចិនបានកំណត់គោលដៅលើអ្នកប្រតិបត្តិសាសនា Falun Gong និងក្រុមគ្រួសាររបស់ពួកគេនៅក្នុងយុទ្ធនាការដែលមានលក្ខណៈរំលោភបំពាន និងការរំលោភសិទ្ធិ។ តាមការចុះផ្សាយរបស់បណ្តាញផ្សព្វផ្សាយ Minghui ដែលមានទំនាក់ទំនងជាមួយអ្នកកាន់សាសនា Falun Gong បានឱ្យដឹងថា អ្នកកាន់សាសនា Falun Gong ចំនួន១៨៨នាក់ បានស្លាប់នៅក្នុងឆ្នាំ២០២៣ ដោយសារការធ្វើទុក្ខបុកម្នេញ។ បណ្តាញផ្សព្វផ្សាយ Minghui ក៏បានរាយការណ៍ផងដែរថា ក្នុងឆ្នាំ២០២៣ អាជ្ញាធរបានចាប់អ្នកកាន់សាសនា Falun Gong ចំនួន៧៥៥នាក់ដាក់ពន្ធនាគារ និងចាប់ខ្លួនចំនួន៣.៤៥៧នាក់ និងយាយីចំនួន២.៧៤៩នាក់ ហើយការបៀតបៀននិងការយាយី និងការចាប់ខ្លួនពាក់ព័ន្ធនឹងព្រឹត្តិការណ៍រស៊ើបផ្នែកនយោបាយមានការកើនឡើង។
អង្គការសង្គមស៊ីវិលបន្តសម្តែងការព្រួយបារម្ភចំពោះរបាយការណ៍ដែលបានឱ្យដឹងថា អាជ្ញាធរបានបង្ខំសមាជិកនៃអង្គការសាសនា ជាពិសេសសមាជិកអ្នកកាន់សាសនា Falun Gong និងជនជាតិភាគតិច Uighurs ឱ្យបរិច្ចាគសរីរាង្គរបស់ពួកគេ នេះបើយោងតាមរបាយការណ៍ចុងក្រោយបំផុតស្តីពីសេរីភាពសាសនាអន្តរជាតិ។ នៅខែមីនា ឆ្នាំ ២០២៣ គណៈមេធាវីទីក្រុងញូវយ៉កសហរដ្ឋអាមេរិកបានចេញផ្សាយរបាយការណ៍មួយដែលមានចំណងជើងថា ការផ្គត់ផ្គង់សរីរាង្គមនុស្ស៖ របាយការណ៍ស្តីពីការពិចារណាអំពីសីលធម៌ និងការរំលោភលើការអនុវត្តការប្រមូលសរីរាង្គមនុស្ស ដែលត្រូវបានរកឃើញថាមាន «ភស្តុតាងដ៏ច្រើនដែលប្រទេសចិនបន្តចូលរួមក្នុងការប្រមូលសរីរាង្គរបស់អ្នកទោសមនសិការដោយបង្ខំ»។
របាយការណ៍សេរីភាពសាសនាអន្តរជាតិកត់សម្គាល់ថា «បក្សកុម្មុយនិស្តចិនបន្តមធ្យោបាយការពារសន្តិសុខដែលគ្រប់គ្រងដោយបក្សក្រៅច្បាប់ដើម្បីលុបបំបាត់ក្រុមអ្នកកាន់សាសនា Falun Gong និងអង្គការដែលត្រូវបានហាមឃាត់ផ្សេងៗទៀត»។
អង្គការក្រៅរដ្ឋាភិបាល និងបុគ្គលនានាបានរាយការណ៍ថា អាជ្ញាធរបានធ្វើការត្រួតពិនិត្យរូបរាងកាយ និងតាមបែបឌីជីថលនៅបរទេសទៅលើអ្នកកាន់សាសនា Falun Gong ជនជាតិ Uighur ដែលកាន់សាសនាអ៊ិស្លាមនិងអ្នកកាន់សាសនាអ៊ិស្លាមដទៃទៀត និងសមាជិកនៃក្រុមសាសនាជនជាតិភាគតិចមកពីតំបន់ស៊ីនជាំង និងពុទ្ធសាសនិកទីបេ និងបៀតបៀន ឃាត់ខ្លួន ឬធ្វើទុក្ខបុកម្នេញពួកគេ ឬបើមិនដូច្នេះទេបៀតបៀនសមាជិកគ្រួសាររបស់ពួកគេនៅប្រទេសចិន។ សាធារណរដ្ឋប្រជាមានិតចិន ក៏បានដាក់សម្ពាធដល់សមាជិកនៃក្រុមសាសនាជនជាតិភាគតិចដែលរស់នៅបរទេសឱ្យស៊ើបយកការណ៍លើជនដែលរស់នៅក្រៅប្រទេសផងដែរ។
សហរដ្ឋអាមេរិកនឹងបន្តនិយាយអំពីសិទ្ធិមនុស្ស រួមទាំងសេរីភាពខាងសាសនា ឬជំនឿ។ អ្នកនាំពាក្យក្រសួងការបរទេសសហរដ្ឋអាមេរិកលោក Matthew Miller បានបញ្ជាក់នៅក្នុងសេចក្តីថ្លែងការណ៍មួយថា «យើងក៏នឹងបន្តលើកកម្ពស់ឱ្យមានការទទួលខុសត្រូវចំពោះអ្នកដែលទទួលខុសត្រូវលើការរំលោភសិទ្ធិមនុស្ស និងការរំលោភបំពានផងដែរ។ យើងអំពាវនាវឱ្យសាធារណរដ្ឋប្រជាមានិតចិន បញ្ឈប់យុទ្ធនាការគាបសង្កត់របស់ខ្លួន និងដោះលែងអ្នកទាំងអស់ដែលត្រូវបានជាប់ពន្ធនាគារដោយសារជំនឿរបស់ពួកគេ»៕
