តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិក មានការព្រួយបារម្ភអំពីលោក Nguyen Thanh Nha លោក Doan Kien Giang និងលោក Nguyen Phuoc Trung Bao ដែលជាអ្នកកាសែតឯករាជ្យ ៣ រូប ដែលត្រូវបានអាជ្ញាធរវៀតណាមចាប់ខ្លួនកាលពីថ្ងៃទី ២០ ខែមេសា ក៏ដូចជាលោក Truong Chau Huu Danh ដែលជាសហការីរបស់ពួកគេ ដែលត្រូវបានឃុំខ្លួនកាលពីចុងខែធ្នូឆ្នាំមុនផងដែរ។
អ្នកទាំង ៤ ត្រូវបានចោទប្រកាន់ក្រោមមាត្រា ៣៣១ នៃក្រមព្រហ្មទណ្ឌវៀតណាម។ ក្រមព្រហ្មទណ្ឌនេះហាមឃាត់ «ការប្រើសេរីភាពប្រជាធិបតេយ្យហួសកម្រិតដោយធ្វើឲ្យប៉ះពាល់ដល់ផលប្រយោជន៍របស់រដ្ឋ»។ ការផ្តន្ទាទោសចំពោះការចោទប្រកាន់នេះ គឺត្រូវជាប់ពន្ធនាគារ៧ ឆ្នាំ។
លោក Tuong Chau Huu Danh គឺជាស្ថាបនិកមួយរូប និងជាអ្នកសរសេរអត្ថបទឲ្យសារព័ត៌មានឯករាជ្យតាម Facebook ឈ្មោះ Bao Sach ដែលមានន័យថា «សារព័ត៌មានស្អាតស្អំ»។
បើយោងតាមគណៈកម្មាធិការការពារអ្នកកាសែត (Committee to Protect Journalists) ដែលជាអង្គការឯករាជ្យមិនស្វែងរកប្រាក់កម្រៃមួយ នៅពេលដែលលោក Danh ត្រូវបានចាប់ខ្លួនកាលពីថ្ងៃទី ១៧ ខែធ្នូ ឆ្នាំ ២០២០ សារព័ត៌មាន Bao Sach មានអ្នកអានជាប្រចាំជាង ១០០.០០០ នាក់ នៅលើ Facebook។
សារព័ត៌មាននេះផ្ដោតលើប្រធានបទមួយចំនួនដូចជាអំពើពុករលួយជាដើម និងបានបង្ហោះរូបថតមន្ត្រីរដ្ឋាភិបាលមួយចំនួនដែលសង្ស័យពីបទពុករលួយ។ ទំព័រ Facebook របស់សារព័ត៌មាន Bao Sach ត្រូវបានបញ្ឈប់ដំណើរការ បន្ទាប់ពីលោក Danh ត្រូវបានចាប់ខ្លួន។
អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានបញ្ជាក់នៅក្នុងសេចក្ដីថ្លែងការណ៍ជាលាយលក្ខណ៍អក្សរមួយថា៖ «ការចាប់ខ្លួនអ្នកកាសែតទាំង ៤ រូបនេះ គឺជាព្រឹត្តិការណ៍ថ្មីចុងក្រោយបង្អស់នៃទំនោរដែលពោរពេញទៅដោយបញ្ហានៃការចាប់ខ្លួន និងការផ្ដន្ទាទោសពលរដ្ឋវៀតណាមដែលអនុវត្តសិទ្ធិសេរីភាពបញ្ចេញមតិរបស់ខ្លួន ដូចដែលមានចែងនៅក្នុងរដ្ឋធម្មនុញ្ញវៀតណាម»។
លោក Price បានបន្តថា៖ «សហរដ្ឋអាមេរិកអំពាវនាវឲ្យអាជ្ញាធរវៀតណាមដោះលែងអ្នកទាំងអស់នោះ ដែលត្រូវបានឃុំឃាំងដោយអយុត្តិធម៌ និងអនុញ្ញាតឲ្យបុគ្គលទាំងអស់នៅក្នុងប្រទេសវៀតណាមបញ្ចេញមតិរបស់ខ្លួនដោយសេរី និងដោយគ្មានការភ័យខ្លាចថា មានការសងសឹក។ យើងជំរុញឲ្យរដ្ឋាភិបាលវៀតណាមធានាធ្វើយ៉ាងណាឲ្យប្រាកដថា ទង្វើរបស់ខ្លួនគឺស្របតាមខដែលចែងអំពីសិទ្ធិមនុស្សនៅក្នុងរដ្ឋធម្មនុញ្ញវៀតណាម និងស្របតាមកាតព្វកិច្ចនិងការប្ដេជ្ញាជាអន្តរជាតិរបស់ខ្លួន»។
លោក Price បានបន្ថែមថា៖ «សេរីភាពសារព័ត៌មាន គឺជាមូលដ្ឋានសម្រាប់តម្លាភាពនិងអភិបាលកិច្ចដែលមានការទទួលខុសត្រូវ។ ជារឿយៗ អ្នកនិពន្ធ អ្នកសរសេរប្លុក និងអ្នកកាសែតធ្វើកិច្ចការរបស់ពួកគេដោយប្រឈមនឹងហានិភ័យខ្ពស់។ សហរដ្ឋអាមេរិកជំរុញរដ្ឋាភិបាល និងពលរដ្ឋនានានៅជុំវិញពិភពលោកឲ្យធានាយ៉ាងណាឲ្យមានការការពារចំពោះអ្នកទាំងនោះ»៕
